១. វិភង្គវារោ

នហេតុបច្ចយោ

៥. កិលេសំ ធម្មំ បដិច្ច កិលេសោ ធម្មោ ឧប្បជ្ជតិ នហេតុបច្ចយា – វិចិកិច្ឆំ បដិច្ច មោហោ, ឧទ្ធច្ចំ បដិច្ច មោហោ. (១)

នោកិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ នហេតុបច្ចយា – អហេតុកំ នោកិលេសំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… (យាវ អសញ្ញសត្តា). (១)

នោកិលេសំ ធម្មំ បដិច្ច កិលេសោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (២)

កិលេសញ្ច នោកិលេសញ្ច ធម្មំ បដិច្ច កិលេសោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ ច វិចិកិច្ឆញ្ច បដិច្ច វិចិកិច្ឆាសហគតោ មោហោ, ឧទ្ធច្ចសហគតេ ខន្ធេ ច ឧទ្ធច្ចញ្ច បដិច្ច ឧទ្ធច្ចសហគតោ មោហោ. (១)

នអារម្មណបច្ចយាទិ

៦. កិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ នអារម្មណបច្ចយា – កិលេសេ បដិច្ច ចិត្តសមុដ្ឋានំ រូបំ. (១)

នោកិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ នអារម្មណបច្ចយា – នោកិលេសេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… ខន្ធេ បដិច្ច វត្ថុ (យាវ អសញ្ញសត្តា). (១)

កិលេសញ្ច នោកិលេសញ្ច ធម្មំ បដិច្ច នោកិលេសោ ធម្មោ ឧប្បជ្ជតិ នអារម្មណបច្ចយា – កិលេសេ ច សម្បយុត្តកេ ច ខន្ធេ បដិច្ច ចិត្តសមុដ្ឋានំ រូបំ, កិលេសេ ច មហាភូតេ ច បដិច្ច ចិត្តសមុដ្ឋានំ រូបំ. (១)

នអធិបតិបច្ចយា… នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា.

នបុរេជាតបច្ចយាទិ

៧. កិលេសំ ធម្មំ បដិច្ច កិលេសោ ធម្មោ ឧប្បជ្ជតិ នបុរេជាតបច្ចយា – អរូបេ លោភំ បដិច្ច មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ ទិដ្ឋិ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ មានោ ថិនំ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ មានោ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ ថិនំ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ ឧទ្ធច្ចំ អហិរិកំ អនោត្តប្បំ; វិចិកិច្ឆំ បដិច្ច មោហោ ឧទ្ធច្ចំ អហិរិកំ អនោត្តប្បំ; ឧទ្ធច្ចំ បដិច្ច មោហោ អហិរិកំ អនោត្តប្បំ (អរូបេ ទោសមូលកំ នត្ថិ). (១)

កិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ នបុរេជាតបច្ចយា – អរូបេ កិលេសេ បដិច្ច សម្បយុត្តកា ខន្ធា, កិលេសេ បដិច្ច ចិត្តសមុដ្ឋានំ រូបំ (ឯវំ នវបិ បញ្ហា កាតព្ពា), នបច្ឆាជាតបច្ចយា, នអាសេវនបច្ចយា.

នកម្មបច្ចយោ

៨. កិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ នកម្មបច្ចយា – កិលេសេ បដិច្ច សម្បយុត្តកា ចេតនា. (១)

នោកិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ នកម្មបច្ចយា – នោកិលេសេ ខន្ធេ បដិច្ច សម្បយុត្តកា ចេតនា; ពាហិរំ… អាហារសមុដ្ឋានំ… ឧតុសមុដ្ឋានំ…បេ…. (១)

កិលេសញ្ច នោកិលេសញ្ច ធម្មំ បដិច្ច នោកិលេសោ ធម្មោ ឧប្បជ្ជតិ នកម្មបច្ចយា – កិលេសេ ច សម្បយុត្តកេ ច ខន្ធេ បដិច្ច សម្បយុត្តកា ចេតនា. (១) (ឯវំ សព្ពេ បច្ចយា កាតព្ពា.)