១. វិភង្គវារោ

ហេតុបច្ចយោ

៨០. កិលេសញ្ចេវ សំកិលិដ្ឋញ្ច ធម្មំ បដិច្ច កិលេសោ ចេវ សំកិលិដ្ឋោ ច ធម្មោ ឧប្បជ្ជតិ ហេតុបច្ចយា – លោភំ បដិច្ច មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ (ចក្កំ). (១)

កិលេសញ្ចេវ សំកិលិដ្ឋញ្ច ធម្មំ បដិច្ច សំកិលិដ្ឋោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា – កិលេសេ បដិច្ច សម្បយុត្តកា ខន្ធា. (២)

កិលេសញ្ចេវ សំកិលិដ្ឋញ្ច ធម្មំ បដិច្ច កិលេសោ ចេវ សំកិលិដ្ឋោ ច សំកិលិដ្ឋោ ចេវ នោ ច កិលេសោ ច ធម្មា ឧប្បជ្ជន្តិ ហេតុបច្ចយា – លោភំ បដិច្ច មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ សម្បយុត្តកា ច ខន្ធា (ចក្កំ). (៣)

៨១. សំកិលិដ្ឋញ្ចេវ នោ ច កិលេសំ ធម្មំ បដិច្ច សំកិលិដ្ឋោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា – សំកិលិដ្ឋញ្ចេវ នោ ច កិលេសំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

សំកិលិដ្ឋញ្ចេវ នោ ច កិលេសំ ធម្មំ បដិច្ច កិលេសោ ចេវ សំកិលិដ្ឋោ ច ធម្មោ ឧប្បជ្ជតិ ហេតុបច្ចយា – សំកិលិដ្ឋេ ចេវ នោ ច កិលេសេ ខន្ធេ បដិច្ច កិលេសា. (២)

សំកិលិដ្ឋញ្ចេវ នោ ច កិលេសំ ធម្មំ បដិច្ច កិលេសោ ចេវ សំកិលិដ្ឋោ ច សំកិលិដ្ឋោ ចេវ នោ ច កិលេសោ ច ធម្មា ឧប្បជ្ជន្តិ ហេតុបច្ចយា – សំកិលិដ្ឋញ្ចេវ នោ ច កិលេសំ ឯកំ ខន្ធំ បដិច្ច តយោ ខន្ធា កិលេសា ច…បេ… ទ្វេ ខន្ធេ…បេ…. (៣)

៨២. កិលេសញ្ចេវ សំកិលិដ្ឋញ្ច សំកិលិដ្ឋញ្ចេវ នោ ច កិលេសញ្ច ធម្មំ បដិច្ច កិលេសោ ចេវ សំកិលិដ្ឋោ ច ធម្មោ ឧប្បជ្ជតិ ហេតុបច្ចយា – លោភញ្ច សម្បយុត្តកេ ច ខន្ធេ បដិច្ច មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ (ចក្កំ). (១)

កិលេសញ្ចេវ សំកិលិដ្ឋញ្ច សំកិលិដ្ឋញ្ចេវ នោ ច កិលេសញ្ច ធម្មំ បដិច្ច សំកិលិដ្ឋោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា – សំកិលិដ្ឋញ្ចេវ នោ ច កិលេសំ ឯកំ ខន្ធញ្ច កិលេសេ ច បដិច្ច តយោ ខន្ធា…បេ… ទ្វេ ខន្ធេ ច…បេ…. (២)

កិលេសញ្ចេវ សំកិលិដ្ឋញ្ច សំកិលិដ្ឋញ្ចេវ នោ ច កិលេសញ្ច ធម្មំ បដិច្ច កិលេសោ ចេវ សំកិលិដ្ឋោ ច សំកិលិដ្ឋោ ចេវ នោ ច កិលេសោ ច ធម្មា ឧប្បជ្ជន្តិ ហេតុបច្ចយា – សំកិលិដ្ឋញ្ចេវ នោ ច កិលេសំ ឯកំ ខន្ធញ្ច លោភញ្ច បដិច្ច តយោ ខន្ធា មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ…បេ… ទ្វេ ខន្ធេ ច…បេ… (ចក្កំ). (៣)