១. វិភង្គវារោ

ហេតុបច្ចយោ

៧៥. កិលេសោ ចេវ សំកិលេសិកោ ច ធម្មោ កិលេសស្ស ចេវ សំកិលេសិកស្ស ច ធម្មស្ស ហេតុបច្ចយេន បច្ចយោ – កិលេសា ចេវ សំកិលេសិកា ច ហេតូ សម្បយុត្តកានំ កិលេសានំ ហេតុបច្ចយេន បច្ចយោ (ឯវំ ចត្តារិ, កិលេសទុកសទិសំ.) (៤)

អារម្មណបច្ចយោ

៧៦. កិលេសោ ចេវ សំកិលេសិកោ ច ធម្មោ កិលេសស្ស ចេវ សំកិលេសិកស្ស ច ធម្មស្ស អារម្មណបច្ចយេន បច្ចយោ – កិលេសេ អារព្ភ កិលេសា ឧប្បជ្ជន្តិ. (មូលំ កាតព្ពំ.) កិលេសេ អារព្ភ សំកិលេសិកា ចេវ នោ ច កិលេសា ខន្ធា ឧប្បជ្ជន្តិ. (មូលំ កាតព្ពំ.) កិលេសេ អារព្ភ កិលេសា ច សម្បយុត្តកា ច ខន្ធា ឧប្បជ្ជន្តិ. (៣)

៧៧. សំកិលេសិកោ ចេវ នោ ច កិលេសោ ធម្មោ សំកិលេសិកស្ស ចេវ នោ ច កិលេសស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ បច្ចវេក្ខតិ, អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ឧទ្ធច្ចំ ឧប្បជ្ជតិ, ឈានេ បរិហីនេ វិប្បដិសារិស្ស ទោមនស្សំ ឧប្បជ្ជតិ; អរិយា គោត្រភុំ បច្ចវេក្ខន្តិ, វោទានំ បច្ចវេក្ខន្តិ, ចក្ខុំ…បេ… វត្ថុំ សំកិលេសិកេ ចេវ នោ ច កិលេសេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ…បេ… អាវជ្ជនាយ អារម្មណបច្ចយេន បច្ចយោ (ឥតរេ ទ្វេ កិលេសទុកសទិសា, ឃដនារម្មណាបិ កិលេសទុកសទិសា).

អធិបតិបច្ចយោ

៧៨. កិលេសោ ចេវ សំកិលេសិកោ ច ធម្មោ កិលេសស្ស ចេវ សំកិលេសិកស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ… តីណិ.

សំកិលេសិកោ ចេវ នោ ច កិលេសោ ធម្មោ សំកិលេសិកស្ស ចេវ នោ ច កិលេសស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ…បេ… បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, សេក្ខា គោត្រភុំ គរុំ កត្វា បច្ចវេក្ខន្តិ, វោទានំ គរុំ កត្វា បច្ចវេក្ខន្តិ; ចក្ខុំ…បេ… វត្ថុំ សំកិលេសិកេ ចេវ នោ ច កិលេសេ ខន្ធេ គរុំ កត្វា សំកិលេសិកា ចេវ នោ ច កិលេសា ខន្ធា ឧប្បជ្ជន្តិ. សហជាតាធិបតិ – សំកិលេសិកា ចេវ នោ ច កិលេសាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (ឥតរេ ទ្វេបិ កិលេសទុកសទិសា. ឃដនាធិបតិបិ.)

អនន្តរបច្ចយាទិ

៧៩. កិលេសោ ចេវ សំកិលេសិកោ ច ធម្មោ កិលេសស្ស ចេវ សំកិលេសិកស្ស ច ធម្មស្ស អនន្តរបច្ចយេន បច្ចយោ… តីណិ (កិលេសទុកសទិសា).

សំកិលេសិកោ ចេវ នោ ច កិលេសោ ធម្មោ សំកិលេសិកស្ស ចេវ នោ ច កិលេសស្ស ធម្មស្ស អនន្តរបច្ចយេន បច្ចយោ – បុរិមា បុរិមា សំកិលេសិកា ចេវ នោ ច កិលេសា ខន្ធា បច្ឆិមានំ បច្ឆិមានំ សំកិលេសិកានញ្ចេវ នោ ច កិលេសានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស… អនុលោមំ វោទានស្ស… អាវជ្ជនា សំកិលេសិកានញ្ចេវ នោ ច កិលេសានំ ខន្ធានំ អនន្តរបច្ចយេន បច្ចយោ.

(ឥតរេ ទ្វេ អនន្តរា កិលេសទុកសទិសា, និន្នានាករណា. ឃដនានន្តរម្បិ សព្ពេ បច្ចយា កិលេសទុកសទិសា, និន្នានាករណា. ឧបនិស្សយេ លោកុត្តរំ នត្ថិ, ឥទំ ទុកំ កិលេសទុកសទិសំ, និន្នានាករណំ.)

កិលេសសំកិលេសិកទុកំ និដ្ឋិតំ.