១. វិភង្គវារោ

ហេតុបច្ចយោ

១. កិលេសំ ធម្មំ បដិច្ច កិលេសោ ធម្មោ ឧប្បជ្ជតិ ហេតុបច្ចយា – លោភំ បដិច្ច មោហោ ទិដ្ឋិ ថិនំ [ថីនំ (សី. ស្យា.)] ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ ទិដ្ឋិ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ មានោ ថិនំ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ មានោ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ ថិនំ ឧទ្ធច្ចំ អហិរិកំ អនោត្តប្បំ, លោភំ បដិច្ច មោហោ ឧទ្ធច្ចំ អហិរិកំ អនោត្តប្បំ; ទោសំ បដិច្ច មោហោ ថិនំ ឧទ្ធច្ចំ អហិរិកំ អនោត្តប្បំ, ទោសំ បដិច្ច មោហោ ឧទ្ធច្ចំ អហិរិកំ អនោត្តប្បំ; វិចិកិច្ឆំ បដិច្ច មោហោ ឧទ្ធច្ចំ អហិរិកំ អនោត្តប្បំ; ឧទ្ធច្ចំ បដិច្ច មោហោ អហិរិកំ អនោត្តប្បំ. (១)

កិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ ហេតុបច្ចយា – កិលេសំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (២)

កិលេសំ ធម្មំ បដិច្ច កិលេសោ ច នោកិលេសោ ច ធម្មា ឧប្បជ្ជន្តិ ហេតុបច្ចយា – លោភំ បដិច្ច មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ សម្បយុត្តកា ច ខន្ធា ចិត្តសមុដ្ឋានញ្ច រូបំ (ចក្កំ). (៣)

២. នោកិលេសំ ធម្មំ បដិច្ច នោកិលេសោ ធម្មោ ឧប្បជ្ជតិ ហេតុបច្ចយា – នោកិលេសំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ…. (១)

នោកិលេសំ ធម្មំ បដិច្ច កិលេសោ ធម្មោ ឧប្បជ្ជតិ ហេតុបច្ចយា – នោកិលេសេ ខន្ធេ បដិច្ច កិលេសា. (២)

នោកិលេសំ ធម្មំ បដិច្ច កិលេសោ ច នោកិលេសោ ច ធម្មា ឧប្បជ្ជន្តិ ហេតុបច្ចយា – នោកិលេសំ ឯកំ ខន្ធំ បដិច្ច តយោ ខន្ធា កិលេសា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៣. កិលេសញ្ច នោកិលេសញ្ច ធម្មំ បដិច្ច កិលេសោ ធម្មោ ឧប្បជ្ជតិ ហេតុបច្ចយា – លោភញ្ច សម្បយុត្តកេ ច ខន្ធេ បដិច្ច មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ (ចក្កំ). (១)

កិលេសញ្ច នោកិលេសញ្ច ធម្មំ បដិច្ច នោកិលេសោ ធម្មោ ឧប្បជ្ជតិ ហេតុបច្ចយា – នោកិលេសំ ឯកំ ខន្ធញ្ច កិលេសេ ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… កិលេសេ ច មហាភូតេ ច បដិច្ច ចិត្តសមុដ្ឋានំ រូបំ. (២)

កិលេសញ្ច នោកិលេសញ្ច ធម្មំ បដិច្ច កិលេសោ ច នោកិលេសោ ច ធម្មា ឧប្បជ្ជន្តិ ហេតុបច្ចយា – នោកិលេសំ ឯកំ ខន្ធញ្ច លោភញ្ច បដិច្ច តយោ ខន្ធា មោហោ ទិដ្ឋិ ថិនំ ឧទ្ធច្ចំ អហិរិកំ អនោត្តប្បំ ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… (ចក្កំ, សំខិត្តំ). (៣)