១-៤. បច្ចយចតុក្កំ

៣៤៧. សរណំ ធម្មំ បច្ចយា សរណោ ធម្មោ ឧប្បជ្ជតិ ហេតុបច្ចយា – សរណំ ឯកំ ខន្ធំ បច្ចយា តយោ ខន្ធា…បេ… ទ្វេ ខន្ធេ…បេ… (យថា អរូបាវចរទុកស្ស បច្ចយវារោបិ ឯវំ កាតព្ពោ).

ហេតុយា នវ, អារម្មណេ ចត្តារិ, អធិបតិយា នវ…បេ… អវិគតេ នវ.

អនុលោមំ.

៣៤៨. សរណំ ធម្មំ បច្ចយា សរណោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

អរណំ ធម្មំ បច្ចយា អរណោ ធម្មោ ឧប្បជ្ជតិ នហេតុបច្ចយា – អហេតុកំ អរណំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… (យាវ អសញ្ញសត្តា) ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា ខន្ធា. អរណំ ធម្មំ បច្ចយា សរណោ ធម្មោ ឧប្បជ្ជតិ នហេតុបច្ចយា – វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

សរណញ្ច អរណញ្ច ធម្មំ បច្ចយា សរណោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នហេតុយា ចត្តារិ, នអារម្មណេ តីណិ, នអធិបតិយា នវ, នអនន្តរេ តីណិ, នសមនន្តរេ តីណិ, នអញ្ញមញ្ញេ តីណិ, នឧបនិស្សយេ តីណិ, នបុរេជាតេ ចត្តារិ, នបច្ឆាជាតេ នវ, នអាសេវនេ នវ, នកម្មេ ចត្តារិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ ឯកំ, នសម្បយុត្តេ តីណិ, នវិប្បយុត្តេ ទ្វេ, នោនត្ថិយា តីណិ, នោវិគតេ តីណិ.

បច្ចនីយំ.