១. វិភង្គវារោ

ហេតុបច្ចយោ

៣០៦. និយ្យានិកំ ធម្មំ បច្ចយា និយ្យានិកោ ធម្មោ ឧប្បជ្ជតិ ហេតុបច្ចយា… តីណិ (បដិច្ចសទិសា).

អនិយ្យានិកំ ធម្មំ បច្ចយា អនិយ្យានិកោ ធម្មោ ឧប្បជ្ជតិ ហេតុបច្ចយា – អនិយ្យានិកំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… (យាវ អជ្ឈត្តិកា មហាភូតា) វត្ថុំ បច្ចយា អនិយ្យានិកា ខន្ធា. អនិយ្យានិកំ ធម្មំ បច្ចយា និយ្យានិកោ ធម្មោ ឧប្បជ្ជតិ ហេតុបច្ចយា – វត្ថុំ បច្ចយា និយ្យានិកា ខន្ធា. អនិយ្យានិកំ ធម្មំ បច្ចយា និយ្យានិកោ ច អនិយ្យានិកោ ច ធម្មា ឧប្បជ្ជន្តិ ហេតុបច្ចយា – វត្ថុំ បច្ចយា និយ្យានិកា ខន្ធា, មហាភូតេ បច្ចយា ចិត្តសមុដ្ឋានំ រូបំ. (៣)

៣០៧. និយ្យានិកញ្ច អនិយ្យានិកញ្ច ធម្មំ បច្ចយា និយ្យានិកោ ធម្មោ ឧប្បជ្ជតិ ហេតុបច្ចយា – និយ្យានិកំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ…. និយ្យានិកញ្ច អនិយ្យានិកញ្ច ធម្មំ បច្ចយា អនិយ្យានិកោ ធម្មោ ឧប្បជ្ជតិ ហេតុបច្ចយា – និយ្យានិកេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ. និយ្យានិកញ្ច អនិយ្យានិកញ្ច ធម្មំ បច្ចយា និយ្យានិកោ ច អនិយ្យានិកោ ច ធម្មា ឧប្បជ្ជន្តិ ហេតុបច្ចយា – និយ្យានិកំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… និយ្យានិកេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ. (៣)