១. វិភង្គវារោ

ហេតុបច្ចយោ

២៧៩. អរូបាវចរោ ធម្មោ អរូបាវចរស្ស ធម្មស្ស ហេតុបច្ចយេន បច្ចយោ – អរូបាវចរា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ…បេ…. (មូលំ កាតព្ពំ.) អរូបាវចរា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. (មូលំ កាតព្ពំ.) អរូបាវចរា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

នអរូបាវចរោ ធម្មោ នអរូបាវចរស្ស ធម្មស្ស ហេតុបច្ចយេន បច្ចយោ – នអរូបាវចរា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អារម្មណបច្ចយោ

២៨០. អរូបាវចរោ ធម្មោ អរូបាវចរស្ស ធម្មស្ស អារម្មណបច្ចយេន បច្ចយោ – អាកាសានញ្ចាយតនំ វិញ្ញាណញ្ចាយតនស្ស អារម្មណបច្ចយេន បច្ចយោ; អាកិញ្ចញ្ញាយតនំ នេវសញ្ញានាសញ្ញាយតនស្ស អារម្មណបច្ចយេន បច្ចយោ. អរូបាវចរោ ធម្មោ នអរូបាវចរស្ស ធម្មស្ស អារម្មណបច្ចយេន បច្ចយោ – អាកាសានញ្ចាយតនំ បច្ចវេក្ខតិ, វិញ្ញាណញ្ចាយតនំ…បេ… អាកិញ្ចញ្ញាយតនំ…បេ… នេវសញ្ញានាសញ្ញាយតនំ បច្ចវេក្ខតិ, អរូបាវចរេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ចេតោបរិយញាណេន អរូបាវចរចិត្តសមង្គិស្ស ចិត្តំ ជានាតិ, អរូបាវចរា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (២)

នអរូបាវចរោ ធម្មោ នអរូបាវចរស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ បច្ចវេក្ខតិ អស្សាទេតិ អភិនន្ទតិ, តំ អារព្ភ រាគោ…បេ… ទោមនស្សំ ឧប្បជ្ជតិ; បុព្ពេ សុចិណ្ណានិ…បេ… ឈានា…បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; អរិយា បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ…បេ… បុព្ពេ…បេ… ចក្ខុំ…បេ… វត្ថុំ នអរូបាវចរេ ខន្ធេ អនិច្ចតោ…បេ… ទោមនស្សំ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន នអរូបាវចរចិត្តសមង្គិស្ស ចិត្តំ ជានាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… នអរូបាវចរា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អធិបតិបច្ចយោ

២៨១. អរូបាវចរោ ធម្មោ អរូបាវចរស្ស ធម្មស្ស អធិបតិបច្ចយេន បច្ចយោ. សហជាតាធិបតិ – អរូបាវចរាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. អរូបាវចរោ ធម្មោ នអរូបាវចរស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អាកាសានញ្ចាយតនំ គរុំ កត្វា បច្ចវេក្ខតិ…បេ… នេវសញ្ញានាសញ្ញាយតនំ គរុំ កត្វា បច្ចវេក្ខតិ, អរូបាវចរេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – អរូបាវចរាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (មូលំ កាតព្ពំ.) អរូបាវចរាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

២៨២. នអរូបាវចរោ ធម្មោ នអរូបាវចរស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ; បុព្ពេ សុចិណ្ណានិ…បេ… ឈានា…បេ… អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, ផលំ…បេ… និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ; ចក្ខុំ…បេ… វត្ថុំ នអរូបាវចរេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នអរូបាវចរាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អនន្តរបច្ចយាទិ

២៨៣. អរូបាវចរោ ធម្មោ អរូបាវចរស្ស ធម្មស្ស អនន្តរបច្ចយេន បច្ចយោ – បុរិមា បុរិមា អរូបាវចរា ខន្ធា បច្ឆិមានំ បច្ឆិមានំ អរូបាវចរានំ ខន្ធានំ អនន្តរបច្ចយេន បច្ចយោ. អរូបាវចរោ ធម្មោ នអរូបាវចរស្ស ធម្មស្ស អនន្តរបច្ចយេន បច្ចយោ – អរូបាវចរំ ចុតិចិត្តំ នអរូបាវចរស្ស ឧបបត្តិចិត្តស្ស, អរូបាវចរំ ភវង្គំ អាវជ្ជនាយ, អរូបាវចរា ខន្ធា នអរូបាវចរស្ស វុដ្ឋានស្ស, និរោធា វុដ្ឋហន្តស្ស នេវសញ្ញានាសញ្ញាយតនំ ផលសមាបត្តិយា អនន្តរបច្ចយេន បច្ចយោ. (២)

២៨៤. នអរូបាវចរោ ធម្មោ នអរូបាវចរស្ស ធម្មស្ស អនន្តរបច្ចយេន បច្ចយោ – បុរិមា បុរិមា នអរូបាវចរា ខន្ធា បច្ឆិមានំ បច្ឆិមានំ នអរូបាវចរានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… អនុលោមំ ផលសមាបត្តិយា អនន្តរបច្ចយេន បច្ចយោ. នអរូបាវចរោ ធម្មោ អរូបាវចរស្ស ធម្មស្ស អនន្តរបច្ចយេន បច្ចយោ – នអរូបាវចរំ ចុតិចិត្តំ អរូបាវចរស្ស ឧបបត្តិចិត្តស្ស អនន្តរបច្ចយេន បច្ចយោ; នអរូបាវចរា ខន្ធា អរូបាវចរស្ស វុដ្ឋានស្ស អនន្តរបច្ចយេន បច្ចយោ; អាកាសានញ្ចាយតនស្ស បរិកម្មំ អាកាសានញ្ចាយតនស្ស អនន្តរបច្ចយេន បច្ចយោ; វិញ្ញាណញ្ចាយតនស្ស…បេ… អាកិញ្ចញ្ញាយតនស្ស…បេ… នេវសញ្ញានាសញ្ញាយតនស្ស បរិកម្មំ នេវសញ្ញានាសញ្ញាយតនស្ស អនន្តរបច្ចយេន បច្ចយោ. (២)

សមនន្តរបច្ចយេន បច្ចយោ… សហជាតបច្ចយេន បច្ចយោ… បញ្ច… អញ្ញមញ្ញបច្ចយេន បច្ចយោ… ទ្វេ… និស្សយបច្ចយេន បច្ចយោ… សត្ត.

ឧបនិស្សយបច្ចយោ

២៨៥. អរូបាវចរោ ធម្មោ អរូបាវចរស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អាកាសានញ្ចាយតនំ វិញ្ញាណញ្ចាយតនស្ស ឧបនិស្សយបច្ចយេន បច្ចយោ; វិញ្ញាណញ្ចាយតនំ អាកិញ្ចញ្ញាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស ឧបនិស្សយបច្ចយេន បច្ចយោ. អរូបាវចរោ ធម្មោ នអរូបាវចរស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អរូបាវចរំ សទ្ធំ ឧបនិស្សាយ ទានំ ទេតិ, សីលំ…បេ… ឧបោសថកម្មំ ករោតិ, នអរូបាវចរំ ឈានំ ឧប្បាទេតិ, វិបស្សនំ…បេ… មគ្គំ…បេ… អភិញ្ញំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; អរូបាវចរំ សីលំ…បេ… បញ្ញំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ… មានំ ជប្បេតិ… ទិដ្ឋិំ គណ្ហាតិ; អរូបាវចរា សទ្ធា…បេ… បញ្ញា នអរូបាវចរាយ សទ្ធាយ…បេ… បញ្ញាយ… រាគស្ស…បេ… បត្ថនាយ… កាយិកស្ស សុខស្ស… កាយិកស្ស ទុក្ខស្ស… មគ្គស្ស ផលសមាបត្តិយា ឧបនិស្សយបច្ចយេន បច្ចយោ. (២)

២៨៦. នអរូបាវចរោ ធម្មោ នអរូបាវចរស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – នអរូបាវចរំ សទ្ធំ ឧបនិស្សាយ ទានំ ទេតិ, សីលំ…បេ… ឧបោសថកម្មំ ករោតិ, នអរូបាវចរំ ឈានំ ឧប្បាទេតិ, វិបស្សនំ…បេ… មគ្គំ…បេ… អភិញ្ញំ…បេ… សមាបត្តិំ ឧប្បាទេតិ, មានំ ជប្បេតិ… ទិដ្ឋិំ គណ្ហាតិ; នអរូបាវចរំ សីលំ…បេ… បញ្ញំ…បេ… រាគំ…បេ… បត្ថនំ…បេ… កាយិកំ សុខំ… កាយិកំ ទុក្ខំ… ឧតុំ… ភោជនំ… សេនាសនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ… បាណំ ហនតិ…បេ… សង្ឃំ ភិន្ទតិ; នអរូបាវចរា សទ្ធា…បេ… សេនាសនំ នអរូបាវចរាយ សទ្ធាយ…បេ… បត្ថនាយ… កាយិកស្ស សុខស្ស… កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

នអរូបាវចរោ ធម្មោ អរូបាវចរស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អាកាសានញ្ចាយតនស្ស បរិកម្មំ អាកាសានញ្ចាយតនស្ស ឧបនិស្សយបច្ចយេន បច្ចយោ…បេ… នេវសញ្ញានាសញ្ញាយតនស្ស បរិកម្មំ នេវសញ្ញានាសញ្ញាយតនស្ស ឧបនិស្សយបច្ចយេន បច្ចយោ. (២)

បុរេជាតបច្ចយាទិ

២៨៧. នអរូបាវចរោ ធម្មោ នអរូបាវចរស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នអរូបាវចរានំ ខន្ធានំ បុរេជាតបច្ចយេន បច្ចយោ. នអរូបាវចរោ ធម្មោ អរូបាវចរស្ស ធម្មស្ស បុរេជាតបច្ចយេន បច្ចយោ. វត្ថុបុរេជាតំ – វត្ថុ អរូបាវចរានំ ខន្ធានំ បុរេជាតបច្ចយេន បច្ចយោ. (២)

បច្ឆាជាតបច្ចយេន បច្ចយោ… ទ្វេ… អាសេវនបច្ចយេន បច្ចយោ… តីណិ.

កម្មបច្ចយោ

២៨៨. អរូបាវចរោ ធម្មោ អរូបាវចរស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា…បេ…. អរូបាវចរោ ធម្មោ នអរូបាវចរស្ស ធម្មស្ស កម្មបច្ចយេន បច្ចយោ – អរូបាវចរា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. (មូលំ កាតព្ពំ.) អរូបាវចរា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

នអរូបាវចរោ ធម្មោ នអរូបាវចរស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នអរូបាវចរា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ (សំខិត្តំ). (១)

វិបាកបច្ចយាទិ

២៨៩. អរូបាវចរោ ធម្មោ អរូបាវចរស្ស ធម្មស្ស វិបាកបច្ចយេន បច្ចយោ (សំខិត្តំ).

នអរូបាវចរោ ធម្មោ នអរូបាវចរស្ស ធម្មស្ស វិបាកបច្ចយេន បច្ចយោ (សំខិត្តំ)… អាហារបច្ចយេន បច្ចយោ… ចត្តារិ… ឥន្ទ្រិយបច្ចយេន បច្ចយោ… ចត្តារិ… ឈានបច្ចយេន បច្ចយោ… ចត្តារិ… មគ្គបច្ចយេន បច្ចយោ… ចត្តារិ… សម្បយុត្តបច្ចយេន បច្ចយោ… ទ្វេ.

វិប្បយុត្តបច្ចយោ

២៩០. អរូបាវចរោ ធម្មោ នអរូបាវចរស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

នអរូបាវចរោ ធម្មោ នអរូបាវចរស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (សំខិត្តំ). នអរូបាវចរោ ធម្មោ អរូបាវចរស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ អរូបាវចរានំ ខន្ធានំ វិប្បយុត្តបច្ចយេន បច្ចយោ. (២)

អត្ថិបច្ចយាទិ

២៩១. អរូបាវចរោ ធម្មោ អរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ…បេ…. អរូបាវចរោ ធម្មោ នអរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ…បេ…. អរូបាវចរោ ធម្មោ អរូបាវចរស្ស ច នអរូបាវចរស្ស ច ធម្មស្ស អត្ថិបច្ចយេន បច្ចយោ – សហជាតំ (សំខិត្តំ). (៣)

នអរូបាវចរោ ធម្មោ នអរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ). នអរូបាវចរោ ធម្មោ អរូបាវចរស្ស ធម្មស្ស អត្ថិបច្ចយេន បច្ចយោ. បុរេជាតំ – វត្ថុ អរូបាវចរានំ ខន្ធានំ អត្ថិបច្ចយេន បច្ចយោ. (២)

២៩២. អរូបាវចរោ ច នអរូបាវចរោ ច ធម្មា អរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – អរូបាវចរោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. អរូបាវចរោ ច នអរូបាវចរោ ច ធម្មា នអរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – អរូបាវចរា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – អរូបាវចរា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – អរូបាវចរា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

នត្ថិបច្ចយេន បច្ចយោ… វិគតបច្ចយេន បច្ចយោ… អវិគតបច្ចយេន បច្ចយោ.