១. វិភង្គវារោ

ហេតុបច្ចយោ

២៤៥. រូបាវចរោ ធម្មោ រូបាវចរស្ស ធម្មស្ស ហេតុបច្ចយេន បច្ចយោ – រូបាវចរា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ…បេ…. (មូលំ កាតព្ពំ.) រូបាវចរា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (មូលំ កាតព្ពំ.) រូបាវចរា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (៣)

នរូបាវចរោ ធម្មោ នរូបាវចរស្ស ធម្មស្ស ហេតុបច្ចយេន បច្ចយោ – នរូបាវចរា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អារម្មណបច្ចយោ

២៤៦. រូបាវចរោ ធម្មោ រូបាវចរស្ស ធម្មស្ស អារម្មណបច្ចយេន បច្ចយោ – ចេតោបរិយញាណេន រូបាវចរចិត្តសមង្គិស្ស ចិត្តំ ជានាតិ, រូបាវចរា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស អារម្មណបច្ចយេន បច្ចយោ. រូបាវចរោ ធម្មោ នរូបាវចរស្ស ធម្មស្ស អារម្មណបច្ចយេន បច្ចយោ – បឋមំ ឈានំ បច្ចវេក្ខតិ…បេ… ចតុត្ថំ ឈានំ បច្ចវេក្ខតិ, ទិព្ពំ ចក្ខុំ បច្ចវេក្ខតិ, ទិព្ពំ សោតធាតុំ…បេ… ឥទ្ធិវិធញាណំ…បេ… ចេតោបរិយញាណំ…បេ… បុព្ពេនិវាសានុស្សតិញាណំ…បេ… យថាកម្មូបគញាណំ…បេ… អនាគតំសញាណំ បច្ចវេក្ខតិ, រូបាវចរេ ខន្ធេ អនិច្ចតោ…បេ… ទោមនស្សំ ឧប្បជ្ជតិ. (២)

២៤៧. នរូបាវចរោ ធម្មោ នរូបាវចរស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ…បេ… ឧបោសថកម្មំ…បេ… បុព្ពេ សុចិណ្ណានិ បច្ចវេក្ខតិ អស្សាទេតិ អភិនន្ទតិ, តំ អារព្ភ រាគោ…បេ… ទោមនស្សំ ឧប្បជ្ជតិ; អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; អរិយា បហីនេ កិលេសេ…បេ… វិក្ខម្ភិតេ កិលេសេ…បេ… បុព្ពេ…បេ… ចក្ខុំ…បេ… វត្ថុំ នរូបាវចរេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស អារម្មណបច្ចយេន បច្ចយោ. (១)

នរូបាវចរោ ធម្មោ រូបាវចរស្ស ធម្មស្ស អារម្មណបច្ចយេន បច្ចយោ – ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន នរូបាវចរចិត្តសមង្គិស្ស ចិត្តំ ជានាតិ, នរូបាវចរា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស អារម្មណបច្ចយេន បច្ចយោ. (២)

អធិបតិបច្ចយោ

២៤៨. រូបាវចរោ ធម្មោ រូបាវចរស្ស ធម្មស្ស អធិបតិបច្ចយេន បច្ចយោ. សហជាតាធិបតិ – រូបាវចរាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. រូបាវចរោ ធម្មោ នរូបាវចរស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – បឋមំ ឈានំ គរុំ កត្វា បច្ចវេក្ខតិ, អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ…បេ… ចតុត្ថំ ឈានំ…បេ… ទិព្ពំ ចក្ខុំ…បេ… ទិព្ពំ សោតធាតុំ…បេ… ឥទ្ធិវិធញាណំ…បេ… ចេតោបរិយញាណំ…បេ… បុព្ពេនិវាសានុស្សតិញាណំ…បេ… យថាកម្មូបគញាណំ…បេ… អនាគតំសញាណំ គរុំ កត្វា បច្ចវេក្ខតិ អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ, រូបាវចរេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – រូបាវចរាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. រូបាវចរោ ធម្មោ រូបាវចរស្ស ច នរូបាវចរស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – រូបាវចរាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

២៤៩. នរូបាវចរោ ធម្មោ នរូបាវចរស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ…បេ… បុព្ពេ សុចិណ្ណានិ គរុំ កត្វា បច្ចវេក្ខតិ អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ; អរិយា មគ្គា វុដ្ឋហិត្វា មគ្គំ គរុំ កត្វា…បេ… ផលំ…បេ… និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ; ចក្ខុំ…បេ… វត្ថុំ នរូបាវចរេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ; អាកាសានញ្ចាយតនំ គរុំ កត្វា បច្ចវេក្ខតិ…បេ… នេវសញ្ញានាសញ្ញាយតនំ គរុំ កត្វា បច្ចវេក្ខតិ. សហជាតាធិបតិ – នរូបាវចរាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អនន្តរបច្ចយាទិ

២៥០. រូបាវចរោ ធម្មោ រូបាវចរស្ស ធម្មស្ស អនន្តរបច្ចយេន បច្ចយោ – បុរិមា បុរិមា រូបាវចរា ខន្ធា បច្ឆិមានំ បច្ឆិមានំ រូបាវចរានំ ខន្ធានំ អនន្តរបច្ចយេន បច្ចយោ. រូបាវចរោ ធម្មោ នរូបាវចរស្ស ធម្មស្ស អនន្តរបច្ចយេន បច្ចយោ – រូបាវចរំ ចុតិចិត្តំ នរូបាវចរស្ស ឧបបត្តិចិត្តស្ស អនន្តរបច្ចយេន បច្ចយោ; រូបាវចរំ ភវង្គំ អាវជ្ជនាយ… រូបាវចរា ខន្ធា នរូបាវចរស្ស វុដ្ឋានស្ស អនន្តរបច្ចយេន បច្ចយោ. (២)

២៥១. នរូបាវចរោ ធម្មោ នរូបាវចរស្ស ធម្មស្ស អនន្តរបច្ចយេន បច្ចយោ – បុរិមា បុរិមា នរូបាវចរា ខន្ធា បច្ឆិមានំ បច្ឆិមានំ នរូបាវចរានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… នេវសញ្ញានាសញ្ញាយតនំ ផលសមាបត្តិយា អនន្តរបច្ចយេន បច្ចយោ. នរូបាវចរោ ធម្មោ រូបាវចរស្ស ធម្មស្ស អនន្តរបច្ចយេន បច្ចយោ – នរូបាវចរំ ចុតិចិត្តំ រូបាវចរស្ស ឧបបត្តិចិត្តស្ស អនន្តរបច្ចយេន បច្ចយោ; នរូបាវចរា ខន្ធា រូបាវចរស្ស វុដ្ឋានស្ស អនន្តរបច្ចយេន បច្ចយោ; បឋមស្ស ឈានស្ស បរិកម្មំ បឋមស្ស ឈានស្ស អនន្តរបច្ចយេន បច្ចយោ…បេ… ចតុត្ថស្ស ឈានស្ស…បេ… ទិព្ពស្ស ចក្ខុស្ស…បេ… ទិព្ពាយ សោតធាតុយា…បេ… ឥទ្ធិវិធញាណស្ស…បេ… ចេតោបរិយញាណស្ស…បេ… បុព្ពេនិវាសានុស្សតិញាណស្ស…បេ… យថាកម្មូបគញាណស្ស…បេ… អនាគតំសញាណស្ស, បរិកម្មំ អនាគតំសញាណស្ស អនន្តរបច្ចយេន បច្ចយោ. (២)

សមនន្តរបច្ចយេន បច្ចយោ… សហជាតបច្ចយេន បច្ចយោ… សត្ត… អញ្ញមញ្ញបច្ចយេន បច្ចយោ… ឆ… និស្សយបច្ចយេន បច្ចយោ… សត្ត.

ឧបនិស្សយបច្ចយោ

២៥២. រូបាវចរោ ធម្មោ រូបាវចរស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – រូបាវចរំ សទ្ធំ ឧបនិស្សាយ រូបាវចរំ ឈានំ ឧប្បាទេតិ, អភិញ្ញំ…បេ… សមាបត្តិំ ឧប្បាទេតិ; រូបាវចរំ សីលំ…បេ… បញ្ញំ ឧបនិស្សាយ រូបាវចរំ ឈានំ…បេ… អភិញ្ញំ…បេ… សមាបត្តិំ ឧប្បាទេតិ; រូបាវចរា សទ្ធា…បេ… បញ្ញា រូបាវចរាយ សទ្ធាយ…បេ… បញ្ញាយ ឧបនិស្សយបច្ចយេន បច្ចយោ, បឋមំ ឈានំ ទុតិយស្ស ឈានស្ស ឧបនិស្សយបច្ចយេន បច្ចយោ, ទុតិយំ ឈានំ តតិយស្ស ឈានស្ស…បេ… តតិយំ ឈានំ ចតុត្ថស្ស ឈានស្ស ឧបនិស្សយបច្ចយេន បច្ចយោ. (១)

រូបាវចរោ ធម្មោ នរូបាវចរស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – រូបាវចរំ សទ្ធំ ឧបនិស្សាយ ទានំ ទេតិ, សីលំ…បេ… ឧបោសថកម្មំ ករោតិ; រូបាវចរំ ឈានំ…បេ… វិបស្សនំ…បេ… មគ្គំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; រូបាវចរំ សីលំ…បេ… បញ្ញំ ឧបនិស្សាយ ទានំ ទេតិ…បេ… មានំ ជប្បេតិ, ទិដ្ឋិំ គណ្ហាតិ; រូបាវចរា សទ្ធា…បេ… បញ្ញា នរូបាវចរាយ សទ្ធាយ…បេ… បញ្ញាយ… រាគស្ស…បេ… បត្ថនាយ… កាយិកស្ស សុខស្ស… កាយិកស្ស ទុក្ខស្ស… មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (២)

២៥៣. នរូបាវចរោ ធម្មោ នរូបាវចរស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – នរូបាវចរំ សទ្ធំ ឧបនិស្សាយ ទានំ…បេ… សីលំ…បេ… ឧបោសថកម្មំ ករោតិ; នរូបាវចរំ ឈានំ…បេ… វិបស្សនំ…បេ… មគ្គំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; នរូបាវចរំ សីលំ…បេ… បញ្ញំ, រាគំ…បេ… ភោជនំ, សេនាសនំ ឧបនិស្សាយ ទានំ ទេតិ…បេ… បាណំ ហនតិ…បេ… សង្ឃំ ភិន្ទតិ; នរូបាវចរា សទ្ធា…បេ… បញ្ញា… រាគោ…បេ… សេនាសនំ នរូបាវចរាយ សទ្ធាយ…បេ… បញ្ញាយ… រាគស្ស…បេ… បត្ថនាយ… កាយិកស្ស សុខស្ស… កាយិកស្ស ទុក្ខស្ស… មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

នរូបាវចរោ ធម្មោ រូបាវចរស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – នរូបាវចរំ សទ្ធំ ឧបនិស្សាយ រូបាវចរំ ឈានំ…បេ… អភិញ្ញំ …បេ… សមាបត្តិំ ឧប្បាទេតិ; នរូបាវចរំ សីលំ…បេ… សេនាសនំ ឧបនិស្សាយ រូបាវចរំ ឈានំ…បេ… អភិញ្ញំ…បេ… សមាបត្តិំ ឧប្បាទេតិ; នរូបាវចរា សទ្ធា…បេ… សេនាសនំ រូបាវចរាយ សទ្ធាយ…បេ… បញ្ញាយ ឧបនិស្សយបច្ចយេន បច្ចយោ, បឋមស្ស ឈានស្ស បរិកម្មំ បឋមស្ស ឈានស្ស ឧបនិស្សយបច្ចយេន បច្ចយោ…បេ… ចតុត្ថស្ស ឈានស្ស…បេ… ទិព្ពស្ស ចក្ខុស្ស បរិកម្មំ…បេ… ទិព្ពាយ សោតធាតុយា…បេ… ឥទ្ធិវិធញាណស្ស…បេ… ចេតោបរិយញាណស្ស…បេ… បុព្ពេនិវាសានុស្សតិញាណស្ស…បេ… យថាកម្មូបគញាណស្ស…បេ… អនាគតំសញាណស្ស បរិកម្មំ អនាគតំសញាណស្ស ឧបនិស្សយបច្ចយេន បច្ចយោ. (២)

បុរេជាតបច្ចយាទិ

២៥៤. នរូបាវចរោ ធម្មោ នរូបាវចរស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ …បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស បុរេជាតបច្ចយេន បច្ចយោ; វត្ថុ នរូបាវចរានំ ខន្ធានំ បុរេជាតបច្ចយេន បច្ចយោ. នរូបាវចរោ ធម្មោ រូបាវចរស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. វត្ថុបុរេជាតំ – វត្ថុ រូបាវចរានំ ខន្ធានំ បុរេជាតបច្ចយេន បច្ចយោ. (២)

បច្ឆាជាតបច្ចយេន បច្ចយោ… ទ្វេ… អាសេវនបច្ចយេន បច្ចយោ… តីណិ.

កម្មបច្ចយាទិ

២៥៥. រូបាវចរោ ធម្មោ រូបាវចរស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – រូបាវចរា ចេតនា សម្បយុត្តកានំ ខន្ធានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – រូបាវចរា ចេតនា វិបាកានំ រូបាវចរានំ ខន្ធានំ កម្មបច្ចយេន បច្ចយោ. រូបាវចរោ ធម្មោ នរូបាវចរស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – រូបាវចរា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – រូបាវចរា ចេតនា កដត្តារូបានំ កម្មបច្ចយេន បច្ចយោ. រូបាវចរោ ធម្មោ រូបាវចរស្ស ច នរូបាវចរស្ស ច ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – រូបាវចរា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – រូបាវចរា ចេតនា វិបាកានំ រូបាវចរានំ ខន្ធានំ កដត្តា ច រូបានំ កម្មបច្ចយេន បច្ចយោ. (៣)

នរូបាវចរោ ធម្មោ នរូបាវចរស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នរូបាវចរា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នរូបាវចរា ចេតនា វិបាកានំ នរូបាវចរានំ ខន្ធានំ កដត្តា ច រូបានំ កម្មបច្ចយេន បច្ចយោ…. (១)

វិបាកបច្ចយេន បច្ចយោ… ចត្តារិ… អាហារបច្ចយេន បច្ចយោ… ចត្តារិ… ឥន្ទ្រិយបច្ចយេន បច្ចយោ… ចត្តារិ… ឈានបច្ចយេន បច្ចយោ… ចត្តារិ… មគ្គបច្ចយេន បច្ចយោ… ចត្តារិ… សម្បយុត្តបច្ចយេន បច្ចយោ… ទ្វេ.

វិប្បយុត្តបច្ចយោ

២៥៦. រូបាវចរោ ធម្មោ នរូបាវចរស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

នរូបាវចរោ ធម្មោ នរូបាវចរស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (សំខិត្តំ). នរូបាវចរោ ធម្មោ រូបាវចរស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ រូបាវចរានំ ខន្ធានំ វិប្បយុត្តបច្ចយេន បច្ចយោ. បុរេជាតំ – វត្ថុ រូបាវចរានំ ខន្ធានំ វិប្បយុត្តបច្ចយេន បច្ចយោ. (២)

អត្ថិបច្ចយាទិ

២៥៧. រូបាវចរោ ធម្មោ រូបាវចរស្ស ធម្មស្ស អត្ថិបច្ចយេន បច្ចយោ (បដិច្ចសទិសំ). រូបាវចរោ ធម្មោ នរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ. រូបាវចរោ ធម្មោ រូបាវចរស្ស ច នរូបាវចរស្ស ច ធម្មស្ស អត្ថិបច្ចយេន បច្ចយោ (បដិច្ចសទិសំ). (៣)

នរូបាវចរោ ធម្មោ នរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ). នរូបាវចរោ ធម្មោ រូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ រូបាវចរានំ ខន្ធានំ អត្ថិបច្ចយេន បច្ចយោ. បុរេជាតំ – ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, វត្ថុ រូបាវចរានំ ខន្ធានំ អត្ថិបច្ចយេន បច្ចយោ. (២)

២៥៨. រូបាវចរោ ច នរូបាវចរោ ច ធម្មា រូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – រូបាវចរោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… បដិសន្ធិក្ខណេ…បេ…. រូបាវចរោ ច នរូបាវចរោ ច ធម្មា នរូបាវចរស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – រូបាវចរា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ; បដិសន្ធិក្ខណេ…បេ…. បច្ឆាជាតា – រូបាវចរា ខន្ធា ច កពឡីការោ អាហារោ ច បុរេជាតស្ស ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – រូបាវចរា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

នត្ថិបច្ចយេន បច្ចយោ… វិគតបច្ចយេន បច្ចយោ… អវិគតបច្ចយេន បច្ចយោ.