១-៤. បច្ចយានុលោមាទិ

ហេតុបច្ចយោ

២០២. កាមាវចរំ ធម្មំ បច្ចយា កាមាវចរោ ធម្មោ ឧប្បជ្ជតិ ហេតុបច្ចយា – កាមាវចរំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ …បេ… ទ្វេ ខន្ធេ…បេ… បដិសន្ធិក្ខណេ…បេ… (យាវ អជ្ឈត្តិកា មហាភូតា) វត្ថុំ បច្ចយា កាមាវចរា ខន្ធា. កាមាវចរំ ធម្មំ បច្ចយា នកាមាវចរោ ធម្មោ ឧប្បជ្ជតិ ហេតុបច្ចយា – វត្ថុំ បច្ចយា នកាមាវចរា ខន្ធា; បដិសន្ធិក្ខណេ…បេ…. កាមាវចរំ ធម្មំ បច្ចយា កាមាវចរោ ច នកាមាវចរោ ច ធម្មា ឧប្បជ្ជន្តិ ហេតុបច្ចយា – វត្ថុំ បច្ចយា នកាមាវចរា ខន្ធា, មហាភូតេ បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (៣)

នកាមាវចរំ ធម្មំ បច្ចយា នកាមាវចរោ ធម្មោ ឧប្បជ្ជតិ ហេតុបច្ចយា… តីណិ (បដិច្ចសទិសា).

កាមាវចរញ្ច នកាមាវចរញ្ច ធម្មំ បច្ចយា កាមាវចរោ ធម្មោ ឧប្បជ្ជតិ ហេតុបច្ចយា (បដិច្ចសទិសា). កាមាវចរញ្ច នកាមាវចរញ្ច ធម្មំ បច្ចយា នកាមាវចរោ ធម្មោ ឧប្បជ្ជតិ ហេតុបច្ចយា – នកាមាវចរំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… បដិសន្ធិក្ខណេ…បេ…. កាមាវចរញ្ច នកាមាវចរញ្ច ធម្មំ បច្ចយា កាមាវចរោ ច នកាមាវចរោ ច ធម្មា ឧប្បជ្ជន្តិ ហេតុបច្ចយា – នកាមាវចរំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… នកាមាវចរេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (៣) (សំខិត្តំ.)

ហេតុយា នវ, អារម្មណេ ចត្តារិ, អធិបតិយា នវ, អនន្តរេ ចត្តារិ, សមនន្តរេ ចត្តារិ, សហជាតេ នវ, អញ្ញមញ្ញេ ឆ, និស្សយេ នវ, ឧបនិស្សយេ ចត្តារិ, បុរេជាតេ ចត្តារិ, អាសេវនេ ចត្តារិ, កម្មេ នវ…បេ… អវិគតេ នវ.

អនុលោមំ.

នហេតុបច្ចយាទិ

២០៣. កាមាវចរំ ធម្មំ បច្ចយា កាមាវចរោ ធម្មោ ឧប្បជ្ជតិ នហេតុបច្ចយា – អហេតុកំ កាមាវចរំ ឯកំ ខន្ធំ បច្ចយា…បេ… អហេតុកបដិសន្ធិក្ខណេ…បេ… (យាវ អសញ្ញសត្តា) ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា កាមាវចរា ខន្ធា, វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយា… តីណិ.

នអធិបតិបច្ចយាទិ

២០៤. កាមាវចរំ ធម្មំ បច្ចយា កាមាវចរោ ធម្មោ ឧប្បជ្ជតិ នអធិបតិបច្ចយា… ឯកំ (យាវ អសញ្ញសត្តា). កាមាវចរំ ធម្មំ បច្ចយា នកាមាវចរោ ធម្មោ ឧប្បជ្ជតិ នអធិបតិបច្ចយា – វត្ថុំ បច្ចយា នកាមាវចរាធិបតិ, វត្ថុំ បច្ចយា វិបាកា នកាមាវចរា ខន្ធា; បដិសន្ធិក្ខណេ…បេ…. កាមាវចរំ ធម្មំ បច្ចយា កាមាវចរោ ច នកាមាវចរោ ច ធម្មា ឧប្បជ្ជន្តិ នអធិបតិបច្ចយា – វត្ថុំ បច្ចយា វិបាកា នកាមាវចរា ខន្ធា, មហាភូតេ បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (៣)

នកាមាវចរំ ធម្មំ បច្ចយា នកាមាវចរោ ធម្មោ ឧប្បជ្ជតិ នអធិបតិបច្ចយា… តីណិ (បដិច្ចសទិសា).

កាមាវចរញ្ច នកាមាវចរញ្ច ធម្មំ បច្ចយា កាមាវចរោ ធម្មោ ឧប្បជ្ជតិ នអធិបតិបច្ចយា (បដិច្ចសទិសា. មូលំ កាតព្ពំ.) នកាមាវចរេ ខន្ធេ ច វត្ថុញ្ច បច្ចយា នកាមាវចរាធិបតិ, វិបាកំ នកាមាវចរំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… បដិសន្ធិក្ខណេ…បេ…. (មូលំ កាតព្ពំ.) វិបាកំ នកាមាវចរំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… វិបាកេ នកាមាវចរេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (៣)

នឧបនិស្សយបច្ចយា… តីណិ… នអាសេវនបច្ចយា (សុទ្ធកេ អរូបមិស្សកេ ច ‘‘វិបាក’’ន្តិ និយាមេតព្ពំ, រូបមិស្សកេ នត្ថិ. សំខិត្តំ).

សុទ្ធំ

នហេតុយា ឯកំ, នអារម្មណេ តីណិ, នអធិបតិយា នវ, នអនន្តរេ តីណិ, នសមនន្តរេ តីណិ, នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ ចត្តារិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ ឯកំ, នសម្បយុត្តេ តីណិ, នវិប្បយុត្តេ ទ្វេ, នោនត្ថិយា តីណិ, នោវិគតេ តីណិ.

បច្ចនីយំ.