១. វិភង្គវារោ

ហេតុបច្ចយាទិ

១៨៦. ឧបេក្ខាសហគតោ ធម្មោ ឧបេក្ខាសហគតស្ស ធម្មស្ស ហេតុបច្ចយេន បច្ចយោ – ឧបេក្ខាសហគតា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ…បេ…. (ឯវំ ចត្តារិ បញ្ហា យថា សវិតក្កទុកស្ស.)

ឧបេក្ខាសហគតោ ធម្មោ ឧបេក្ខាសហគតស្ស ធម្មស្ស អារម្មណបច្ចយេន បច្ចយោ… អធិបតិបច្ចយេន បច្ចយោ. (យថា សប្បីតិកទុកំ ឯវំ អារម្មណម្បិ អធិបតិបិ វិត្ថារេតព្ពា, ‘‘ឧបេក្ខា’’តិ នានំ.)

អនន្តរបច្ចយាទិ

១៨៧. ឧបេក្ខាសហគតោ ធម្មោ ឧបេក្ខាសហគតស្ស ធម្មស្ស អនន្តរបច្ចយេន បច្ចយោ – បុរិមា បុរិមា ឧបេក្ខាសហគតា ខន្ធា បច្ឆិមានំ បច្ឆិមានំ ឧបេក្ខាសហគតានំ ខន្ធានំ អនន្តរបច្ចយេន បច្ចយោ. (១)

ឧបេក្ខាសហគតោ ធម្មោ នឧបេក្ខាសហគតស្ស ធម្មស្ស អនន្តរបច្ចយេន បច្ចយោ – បុរិមា បុរិមា ឧបេក្ខាសហគតា ខន្ធា បច្ឆិមាយ បច្ឆិមាយ ឧបេក្ខាយ អនន្តរបច្ចយេន បច្ចយោ; ឧបេក្ខាសហគតំ ចុតិចិត្តំ នឧបេក្ខាសហគតស្ស ឧបបត្តិចិត្តស្ស… អាវជ្ជនា នឧបេក្ខាសហគតានំ ខន្ធានំ… វិបាកមនោធាតុ នឧបេក្ខាសហគតាយ វិបាកមនោវិញ្ញាណធាតុយា… ឧបេក្ខាសហគតំ ភវង្គំ នឧបេក្ខាសហគតស្ស ភវង្គស្ស… ឧបេក្ខាសហគតំ កុសលាកុសលំ នឧបេក្ខាសហគតស្ស វុដ្ឋានស្ស… កិរិយំ វុដ្ឋានស្ស… ផលំ វុដ្ឋានស្ស… និរោធា វុដ្ឋហន្តស្ស នេវសញ្ញានាសញ្ញាយតនំ នឧបេក្ខាសហគតាយ ផលសមាបត្តិយា អនន្តរបច្ចយេន បច្ចយោ. (២)

ឧបេក្ខាសហគតោ ធម្មោ ឧបេក្ខាសហគតស្ស ច នឧបេក្ខាសហគតស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា ឧបេក្ខាសហគតា ខន្ធា បច្ឆិមានំ បច្ឆិមានំ ឧបេក្ខាសហគតានំ ខន្ធានំ ឧបេក្ខាយ ច អនន្តរបច្ចយេន បច្ចយោ. (៣)

១៨៨. នឧបេក្ខាសហគតោ ធម្មោ នឧបេក្ខាសហគតស្ស ធម្មស្ស អនន្តរបច្ចយេន បច្ចយោ – បុរិមា បុរិមា ឧបេក្ខា បច្ឆិមាយ បច្ឆិមាយ ឧបេក្ខាយ អនន្តរបច្ចយេន បច្ចយោ; បុរិមា បុរិមា នឧបេក្ខាសហគតា ខន្ធា បច្ឆិមានំ បច្ឆិមានំ នឧបេក្ខាសហគតានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… អនុលោមំ ផលសមាបត្តិយា អនន្តរបច្ចយេន បច្ចយោ. (មូលំ កាតព្ពំ.) បុរិមា បុរិមា ឧបេក្ខា បច្ឆិមានំ បច្ឆិមានំ ឧបេក្ខាសហគតានំ ខន្ធានំ អនន្តរបច្ចយេន បច្ចយោ; នឧបេក្ខាសហគតំ ចុតិចិត្តំ ឧបេក្ខាសហគតស្ស ឧបបត្តិចិត្តស្ស… នឧបេក្ខាសហគតំ ភវង្គំ អាវជ្ជនាយ… កាយវិញ្ញាណធាតុ វិបាកមនោធាតុយា… នឧបេក្ខាសហគតា វិបាកមនោវិញ្ញាណធាតុ កិរិយមនោវិញ្ញាណធាតុយា… នឧបេក្ខាសហគតំ ភវង្គំ ឧបេក្ខាសហគតស្ស ភវង្គស្ស… នឧបេក្ខាសហគតំ កុសលាកុសលំ ឧបេក្ខាសហគតស្ស វុដ្ឋានស្ស… កិរិយំ វុដ្ឋានស្ស… ផលំ វុដ្ឋានស្ស អនន្តរបច្ចយេន បច្ចយោ. (២)

នឧបេក្ខាសហគតោ ធម្មោ ឧបេក្ខាសហគតស្ស ច នឧបេក្ខាសហគតស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា ឧបេក្ខា បច្ឆិមានំ បច្ឆិមានំ ឧបេក្ខាសហគតានំ ខន្ធានំ ឧបេក្ខាយ ច អនន្តរបច្ចយេន បច្ចយោ. (៣)

១៨៩. ឧបេក្ខាសហគតោ ច នឧបេក្ខាសហគតោ ច ធម្មា ឧបេក្ខាសហគតស្ស ធម្មស្ស អនន្តរបច្ចយេន បច្ចយោ – បុរិមា បុរិមា ឧបេក្ខាសហគតា ខន្ធា ច ឧបេក្ខា ច បច្ឆិមានំ បច្ឆិមានំ ឧបេក្ខាសហគតានំ ខន្ធានំ អនន្តរបច្ចយេន បច្ចយោ. (មូលំ កាតព្ពំ.) បុរិមា បុរិមា ឧបេក្ខាសហគតា ខន្ធា ច ឧបេក្ខា ច បច្ឆិមាយ បច្ឆិមាយ ឧបេក្ខាយ អនន្តរបច្ចយេន បច្ចយោ; ឧបេក្ខាសហគតំ ចុតិចិត្តញ្ច ឧបេក្ខា ច នឧបេក្ខាសហគតស្ស ឧបបត្តិចិត្តស្ស… អាវជ្ជនា ច ឧបេក្ខា ច នឧបេក្ខាសហគតានំ ខន្ធានំ… វិបាកមនោធាតុ ច ឧបេក្ខា ច នឧបេក្ខាសហគតាយ វិបាកមនោវិញ្ញាណធាតុយា… ឧបេក្ខាសហគតំ ភវង្គញ្ច ឧបេក្ខា ច នឧបេក្ខាសហគតស្ស ភវង្គស្ស… ឧបេក្ខាសហគតំ កុសលាកុសលញ្ច ឧបេក្ខា ច នឧបេក្ខាសហគតស្ស វុដ្ឋានស្ស… កិរិយញ្ច ឧបេក្ខា ច វុដ្ឋានស្ស… ផលញ្ច ឧបេក្ខា ច វុដ្ឋានស្ស… និរោធា វុដ្ឋហន្តស្ស នេវសញ្ញានាសញ្ញាយតនញ្ច ឧបេក្ខា ច នឧបេក្ខាសហគតាយ ផលសមាបត្តិយា អនន្តរបច្ចយេន បច្ចយោ. (មូលំ កាតព្ពំ.) បុរិមា បុរិមា ឧបេក្ខាសហគតា ខន្ធា ច ឧបេក្ខា ច បច្ឆិមានំ បច្ឆិមានំ ឧបេក្ខាសហគតានំ ខន្ធានំ ឧបេក្ខាយ ច អនន្តរបច្ចយេន បច្ចយោ. (៣)

សមនន្តរបច្ចយេន បច្ចយោ… សហជាតបច្ចយេន បច្ចយោ… នវ… អញ្ញមញ្ញបច្ចយេន បច្ចយោ… នវ… និស្សយបច្ចយេន បច្ចយោ… នវ.

ឧបនិស្សយបច្ចយោ

១៩០. ឧបេក្ខាសហគតោ ធម្មោ ឧបេក្ខាសហគតស្ស ធម្មស្ស ឧបនិស្សយបច្ចយេន បច្ចយោ… តីណិ.

នឧបេក្ខាសហគតោ ធម្មោ នឧបេក្ខាសហគតស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – នឧបេក្ខាសហគតំ សទ្ធំ ឧបនិស្សាយ នឧបេក្ខាសហគតេន ចិត្តេន ទានំ ទេតិ, សីលំ…បេ… ឧបោសថកម្មំ…បេ… នឧបេក្ខាសហគតំ ឈានំ…បេ… វិបស្សនំ…បេ… មគ្គំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; នឧបេក្ខាសហគតំ សីលំ…បេ… បញ្ញំ… រាគំ… ទោសំ… មោហំ… មានំ… ទិដ្ឋិំ… បត្ថនំ… កាយិកំ សុខំ… កាយិកំ ទុក្ខំ… ឧតុំ… ភោជនំ… សេនាសនំ ឧបេក្ខំ ឧបនិស្សាយ នឧបេក្ខាសហគតេន ចិត្តេន ទានំ ទេតិ…បេ… សមាបត្តិំ ឧប្បាទេតិ, បាណំ ហនតិ…បេ… សង្ឃំ ភិន្ទតិ; នឧបេក្ខាសហគតា សទ្ធា…បេ… សេនាសនំ ឧបេក្ខា ច នឧបេក្ខាសហគតាយ សទ្ធាយ…បេ… បញ្ញាយ… រាគស្ស…បេ… បត្ថនាយ… កាយិកស្ស សុខស្ស… កាយិកស្ស ទុក្ខស្ស … មគ្គស្ស, ផលសមាបត្តិយា ឧបេក្ខាយ ច ឧបនិស្សយបច្ចយេន បច្ចយោ. (១)

នឧបេក្ខាសហគតោ ធម្មោ ឧបេក្ខាសហគតស្ស ធម្មស្ស ឧបនិស្សយបច្ចយេន បច្ចយោ (តីណិបិ ឧបនិស្សយា). នឧបេក្ខាសហគតំ សទ្ធំ ឧបនិស្សាយ ឧបេក្ខាសហគតេន ចិត្តេន ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; នឧបេក្ខាសហគតំ សីលំ…បេ… សេនាសនំ ឧបេក្ខំ ឧបនិស្សាយ ឧបេក្ខាសហគតេន ចិត្តេន ទានំ ទេតិ…បេ… សមាបត្តិំ ឧប្បាទេតិ, ឧបេក្ខាសហគតេន ចិត្តេន អទិន្នំ អាទិយតិ, មុសា ភណតិ, បិសុណំ…បេ… សម្ផំ…បេ… សន្ធិំ…បេ… និល្លោបំ…បេ… ឯកាគារិកំ…បេ… បរិបន្ថេ…បេ… បរទារំ…បេ… គាមឃាតំ…បេ… និគមឃាតំ ករោតិ; នឧបេក្ខាសហគតា សទ្ធា…បេ… សេនាសនំ ឧបេក្ខា ច ឧបេក្ខាសហគតាយ សទ្ធាយ…បេ… បត្ថនាយ… មគ្គស្ស, ផលសមាបត្តិយា ឧបនិស្សយបច្ចយេន បច្ចយោ.

នឧបេក្ខាសហគតោ ធម្មោ ឧបេក្ខាសហគតស្ស ច នឧបេក្ខាសហគតស្ស ច ធម្មស្ស ឧបនិស្សយបច្ចយេន បច្ចយោ (តីណិ ឧបនិស្សយា ទុតិយគមនសទិសា). (៣)

ឧបេក្ខាសហគតោ ច នឧបេក្ខាសហគតោ ច ធម្មា ឧបេក្ខាសហគតស្ស ធម្មស្ស ឧបនិស្សយបច្ចយេន បច្ចយោ… តីណិ.

បុរេជាតបច្ចយោ

១៩១. នឧបេក្ខាសហគតោ ធម្មោ នឧបេក្ខាសហគតស្ស ធម្មស្ស បុរេជាតបច្ចយេន បច្ចយោ… តីណិ (សប្បីតិកទុកសទិសា).

បច្ឆាជាតបច្ចយាទិ

១៩២. ឧបេក្ខាសហគតោ ធម្មោ នឧបេក្ខាសហគតស្ស ធម្មស្ស បច្ឆាជាតបច្ចយេន បច្ចយោ… តីណិ… អាសេវនបច្ចយេន បច្ចយោ… នវ… កម្មបច្ចយេន បច្ចយោ… ឆ. (ចត្តារិ សហជាតា នានាក្ខណិកា កាតព្ពា, ទ្វេ នានាក្ខណិកា ច.)… វិបាកបច្ចយេន បច្ចយោ… នវ… អាហារបច្ចយេន បច្ចយោ… ចត្តារិ… ឥន្ទ្រិយបច្ចយេន បច្ចយោ… នវ… ឈានបច្ចយេន បច្ចយោ… នវ… មគ្គបច្ចយេន បច្ចយោ… ចត្តារិ… សម្បយុត្តបច្ចយេន បច្ចយោ… ឆ… វិប្បយុត្តបច្ចយេន បច្ចយោ… បញ្ច… អត្ថិបច្ចយេន បច្ចយោ… នវ… នត្ថិបច្ចយេន បច្ចយោ… វិគតបច្ចយេន បច្ចយោ… អវិគតបច្ចយេន បច្ចយោ. (ឥមានិ បច្ចយានិ សប្បីតិកករណេន វិភជិតព្ពានិ.)