១-៤. បច្ចយានុលោមាទិ

ហេតុបច្ចយោ

១៨៣. ឧបេក្ខាសហគតំ ធម្មំ បច្ចយា ឧបេក្ខាសហគតោ ធម្មោ ឧប្បជ្ជតិ ហេតុបច្ចយា – ឧបេក្ខាសហគតំ ឯកំ ខន្ធំ បច្ចយា ទ្វេ ខន្ធា, ទ្វេ ខន្ធេ…បេ… បដិសន្ធិក្ខណេ…បេ… (យថា សវិតក្កទុកសទិសំ បច្ចយវារេ នានាករណំ. ‘‘ឧបេក្ខ’’ន្តិ នវបិ បញ្ហា កាតព្ពា, បដិសន្ធិបវត្តិបិ វត្ថុបិ.)

ហេតុយា នវ, អារម្មណេ នវ…បេ… បុរេជាតេ នវ, អាសេវនេ នវ (សព្ពត្ថ នវ), អវិគតេ នវ.

អនុលោមំ.

១៨៤. ឧបេក្ខាសហគតំ ធម្មំ បច្ចយា ឧបេក្ខាសហគតោ ធម្មោ ឧប្បជ្ជតិ នហេតុបច្ចយា – អហេតុកំ ឧបេក្ខាសហគតំ ឯកំ ខន្ធំ បច្ចយា ទ្វេ ខន្ធា, ទ្វេ ខន្ធេ…បេ… អហេតុកបដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (ឯវំ នវបិ បញ្ហា បវត្តិបដិសន្ធិយោ យថា សវិតក្កទុកស្ស ឯវំ កាតព្ពា. តីណិយេវ មោហោ, បវត្តេ វត្ថុបិ កាតព្ពា.)

នហេតុយា នវ, នអារម្មណេ តីណិ, នអធិបតិយា នវ, នអនន្តរេ តីណិ, នសមនន្តរេ តីណិ, នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ ចត្តារិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ នវ, នសម្បយុត្តេ តីណិ, នវិប្បយុត្តេ ឆ, នោនត្ថិយា តីណិ, នោវិគតេ តីណិ.

បច្ចនីយំ.