១-៤. បច្ចយានុលោមាទិ

ហេតុបច្ចយោ

១៦៨. សុខសហគតំ ធម្មំ បដិច្ច សុខសហគតោ ធម្មោ ឧប្បជ្ជតិ ហេតុបច្ចយា – សុខសហគតំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ; បដិសន្ធិក្ខណេ…បេ…. សុខសហគតំ ធម្មំ បដិច្ច នសុខសហគតោ ធម្មោ ឧប្បជ្ជតិ ហេតុបច្ចយា – សុខសហគតេ ខន្ធេ បដិច្ច សុខំ ចិត្តសមុដ្ឋានញ្ច រូបំ. (ឯវំ សុខសហគតទុកំ វិត្ថារេតព្ពំ, យថា សប្បីតិកទុកស្ស អនុលោមបដិច្ចវារោ.)

ហេតុយា នវ, អារម្មណេ នវ…បេ… បុរេជាតេ ឆ, អាសេវនេ ឆ, កម្មេ នវ…បេ… អវិគតេ នវ.

អនុលោមំ.

១៦៩. សុខសហគតំ ធម្មំ បដិច្ច សុខសហគតោ ធម្មោ ឧប្បជ្ជតិ នហេតុបច្ចយា – អហេតុកំ សុខសហគតំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ…បេ… (មូលំ កាតព្ពំ.) អហេតុកេ សុខសហគតេ ខន្ធេ បដិច្ច សុខញ្ច ចិត្តសមុដ្ឋានញ្ច រូបំ. សុខសហគតំ ធម្មំ បដិច្ច សុខសហគតោ ច នសុខសហគតោ ច ធម្មា ឧប្បជ្ជន្តិ នហេតុបច្ចយា – អហេតុកំ សុខសហគតំ ឯកំ ខន្ធំ បដិច្ច ទ្វេ ខន្ធា សុខញ្ច ចិត្តសមុដ្ឋានញ្ច រូបំ, ទ្វេ ខន្ធេ…បេ…. (៣)

នសុខសហគតំ ធម្មំ បដិច្ច នសុខសហគតោ ធម្មោ ឧប្បជ្ជតិ នហេតុបច្ចយា – អហេតុកំ នសុខសហគតំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកំ សុខំ បដិច្ច ចិត្តសមុដ្ឋានំ រូបំ; អហេតុកបដិសន្ធិក្ខណេ នសុខសហគតំ ឯកំ ខន្ធំ បដិច្ច តយោ ខន្ធា កដត្តា ច រូបំ …បេ… ទ្វេ ខន្ធេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ…. (យាវ អសញ្ញសត្តា) វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (យថា សប្បីតិកេ នហេតុបច្ចយសទិសំ, និន្នានំ សព្ពត្ថមេវ នវ បញ្ហា.)

នហេតុយា នវ, នអារម្មណេ តីណិ…បេ… នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ ចត្តារិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឆ, នមគ្គេ នវ, នសម្បយុត្តេ តីណិ, នវិប្បយុត្តេ ឆ, នោនត្ថិយា តីណិ, នោវិគតេ តីណិ.

បច្ចនីយំ.

(ឯវំ ឥតរេ ទ្វេ គណនាបិ សហជាតវារោបិ បដិច្ចវារសទិសា. បច្ចយវារេ បវត្តិបិ បដិសន្ធិបិ វិត្ថារេតព្ពា, យថា សប្បីតិកទុកបច្ចយវារបច្ចនីយេបិ បវត្តេ វត្ថុ ច វិត្ថារេតព្ពំ, យថា សប្បីតិកទុកេ ឯកោយេវ មោហោ, ឯវំ ឥតរេ ទ្វេ គណនាបិ និស្សយវារោបិ សំសដ្ឋវារោបិ សម្បយុត្តវារោបិ យថា សប្បីតិកទុកំ, ឯវំ កាតព្ពំ.)