១. វិភង្គវារោ

នហេតុបច្ចយោ

១៤៤. សប្បីតិកំ ធម្មំ បដិច្ច សប្បីតិកោ ធម្មោ ឧប្បជ្ជតិ នហេតុបច្ចយា – អហេតុកំ សប្បីតិកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. សប្បីតិកំ ធម្មំ បដិច្ច អប្បីតិកោ ធម្មោ ឧប្បជ្ជតិ នហេតុបច្ចយា – អហេតុកេ សប្បីតិកេ ខន្ធេ បដិច្ច បីតិ ច ចិត្តសមុដ្ឋានញ្ច រូបំ. សប្បីតិកំ ធម្មំ បដិច្ច សប្បីតិកោ ច អប្បីតិកោ ច ធម្មា ឧប្បជ្ជន្តិ នហេតុបច្ចយា – អហេតុកំ សប្បីតិកំ ឯកំ ខន្ធំ បដិច្ច តយោ ខន្ធា បីតិ ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

អប្បីតិកំ ធម្មំ បដិច្ច អប្បីតិកោ ធម្មោ ឧប្បជ្ជតិ នហេតុបច្ចយា – អហេតុកំ អប្បីតិកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បីតិំ បដិច្ច ចិត្តសមុដ្ឋានំ រូបំ; អហេតុកបដិសន្ធិក្ខណេ អប្បីតិកំ ឯកំ ខន្ធំ បដិច្ច តយោ ខន្ធា កដត្តា ច រូបំ…បេ… ទ្វេ ខន្ធេ បដិច្ច ទ្វេ ខន្ធា កដត្តា ច រូបំ, ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… (យាវ អសញ្ញសត្តាបិ) វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. អប្បីតិកំ ធម្មំ បដិច្ច សប្បីតិកោ ធម្មោ ឧប្បជ្ជតិ នហេតុបច្ចយា – អហេតុកំ បីតិំ បដិច្ច សប្បីតិកា ខន្ធា. (មូលំ កាតព្ពំ.) បីតិំ បដិច្ច សប្បីតិកា ខន្ធា ចិត្តសមុដ្ឋានញ្ច រូបំ. (៣)

១៤៥. សប្បីតិកញ្ច អប្បីតិកញ្ច ធម្មំ បដិច្ច សប្បីតិកោ ធម្មោ ឧប្បជ្ជតិ នហេតុបច្ចយា – អហេតុកំ សប្បីតិកំ ឯកំ ខន្ធញ្ច បីតិញ្ច បដិច្ច តយោ ខន្ធា…បេ… ទ្វេ ខន្ធេ ច…បេ…. សប្បីតិកញ្ច អប្បីតិកញ្ច ធម្មំ បដិច្ច អប្បីតិកោ ធម្មោ ឧប្បជ្ជតិ នហេតុបច្ចយា – អហេតុកេ សប្បីតិកេ ខន្ធេ ច បីតិញ្ច បដិច្ច ចិត្តសមុដ្ឋានំ រូបំ, អហេតុកេ សប្បីតិកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. សប្បីតិកញ្ច អប្បីតិកញ្ច ធម្មំ បដិច្ច សប្បីតិកោ ច អប្បីតិកោ ច ធម្មា ឧប្បជ្ជន្តិ នហេតុបច្ចយា – អហេតុកំ សប្បីតិកំ ឯកំ ខន្ធញ្ច បីតិញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… អហេតុកំ សប្បីតិកំ ឯកំ ខន្ធញ្ច បីតិញ្ច បដិច្ច តយោ ខន្ធា…បេ… ទ្វេ ខន្ធេ ច…បេ… អហេតុកេ សប្បីតិកេ ខន្ធេ ច បីតិញ្ច មហាភូតេ ច បដិច្ច ចិត្តសមុដ្ឋានំ រូបំ. (៣)