១. វិភង្គវារោ

ហេតុបច្ចយោ

១១៦. សវិតក្កោ ធម្មោ សវិតក្កស្ស ធម្មស្ស ហេតុបច្ចយេន បច្ចយោ – សវិតក្កា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ…បេ…. សវិតក្កោ ធម្មោ អវិតក្កស្ស ធម្មស្ស ហេតុបច្ចយេន បច្ចយោ – សវិតក្កា ហេតូ វិតក្កស្ស ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (មូលំ កាតព្ពំ.) សវិតក្កា ហេតូ សម្បយុត្តកានំ ខន្ធានំ វិតក្កស្ស ច ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ… (៣)

អវិតក្កោ ធម្មោ អវិតក្កស្ស ធម្មស្ស ហេតុបច្ចយេន បច្ចយោ – អវិតក្កា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អារម្មណបច្ចយោ

១១៧. សវិតក្កោ ធម្មោ សវិតក្កស្ស ធម្មស្ស អារម្មណបច្ចយេន បច្ចយោ – សវិតក្កេ ខន្ធេ អារព្ភ សវិតក្កា ខន្ធា ឧប្បជ្ជន្តិ. (មូលំ កាតព្ពំ.) សវិតក្កេ ខន្ធេ អារព្ភ អវិតក្កា ខន្ធា ច វិតក្កោ ច ឧប្បជ្ជន្តិ. (មូលំ កាតព្ពំ.) សវិតក្កេ ខន្ធេ អារព្ភ សវិតក្កា ខន្ធា ច វិតក្កោ ច ឧប្បជ្ជន្តិ. (៣)

១១៨. អវិតក្កោ ធម្មោ អវិតក្កស្ស ធម្មស្ស អារម្មណបច្ចយេន បច្ចយោ – អរិយា អវិតក្កា ឈានា វុដ្ឋហិត្វា អវិតក្កំ ឈានំ បច្ចវេក្ខន្តិ, មគ្គា វុដ្ឋហិត្វា មគ្គំ បច្ចវេក្ខន្តិ, ផលា វុដ្ឋហិត្វា ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ អវិតក្កស្ស មគ្គស្ស, ផលស្ស, វិតក្កស្ស ច អារម្មណបច្ចយេន បច្ចយោ; ចក្ខុំ…បេ… វត្ថុំ អវិតក្កេ ខន្ធេ ច វិតក្កញ្ច អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ វិតក្កោ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន អវិតក្កចិត្តសមង្គិស្ស ចិត្តំ ជានាតិ, អាកាសានញ្ចាយតនំ…បេ… អាកិញ្ចញ្ញាយតនំ…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ…បេ… អវិតក្កា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស យថាកម្មូបគញាណស្ស, អនាគតំសញាណស្ស, វិតក្កស្ស ច អារម្មណបច្ចយេន បច្ចយោ; អវិតក្កេ ខន្ធេ ច វិតក្កញ្ច អារព្ភ អវិតក្កា ខន្ធា ច វិតក្កោ ច ឧប្បជ្ជន្តិ. (១)

អវិតក្កោ ធម្មោ សវិតក្កស្ស ធម្មស្ស អារម្មណបច្ចយេន បច្ចយោ – អរិយា អវិតក្កា ឈានា វុដ្ឋហិត្វា…បេ… មគ្គា វុដ្ឋហិត្វា…បេ… ផលា វុដ្ឋហិត្វា ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, សវិតក្កស្ស មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; ចក្ខុំ…បេ… វត្ថុំ អវិតក្កេ ខន្ធេ ច វិតក្កញ្ច អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ; អវិតក្កេ ខន្ធេ ច វិតក្កញ្ច អារព្ភ សវិតក្កា ខន្ធា ឧប្បជ្ជន្តិ. (២)

អវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស អារម្មណបច្ចយេន បច្ចយោ – អរិយា អវិតក្កា ឈានា វុដ្ឋហិត្វា…បេ… មគ្គា វុដ្ឋហិត្វា…បេ… ផលា វុដ្ឋហិត្វា ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, សវិតក្កស្ស មគ្គស្ស, ផលស្ស, អាវជ្ជនាយ, វិតក្កស្ស ច អារម្មណបច្ចយេន បច្ចយោ; ចក្ខុំ…បេ… វត្ថុំ អវិតក្កេ ខន្ធេ ច វិតក្កញ្ច អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ សវិតក្កា ខន្ធា ច វិតក្កោ ច ឧប្បជ្ជន្តិ, អវិតក្កេ ខន្ធេ ច វិតក្កញ្ច អារព្ភ សវិតក្កា ខន្ធា ច វិតក្កោ ច ឧប្បជ្ជន្តិ. (៣)

១១៩. សវិតក្កោ ច អវិតក្កោ ច ធម្មា សវិតក្កស្ស ធម្មស្ស អារម្មណបច្ចយេន បច្ចយោ – សវិតក្កេ ខន្ធេ ច វិតក្កញ្ច អារព្ភ សវិតក្កា ខន្ធា ឧប្បជ្ជន្តិ. (មូលំ កាតព្ពំ.) សវិតក្កេ ខន្ធេ ច វិតក្កញ្ច អារព្ភ អវិតក្កា ខន្ធា ច វិតក្កោ ច ឧប្បជ្ជន្តិ. (មូលំ កាតព្ពំ.) សវិតក្កេ ខន្ធេ ច វិតក្កញ្ច អារព្ភ សវិតក្កា ខន្ធា ច វិតក្កោ ច ឧប្បជ្ជន្តិ. (៣)

អធិបតិបច្ចយោ

១២០. សវិតក្កោ ធម្មោ សវិតក្កស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – សវិតក្កេ ខន្ធេ គរុំ កត្វា សវិតក្កា ខន្ធា ឧប្បជ្ជន្តិ. សហជាតាធិបតិ – សវិតក្កាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

សវិតក្កោ ធម្មោ អវិតក្កស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – សវិតក្កេ ខន្ធេ គរុំ កត្វា វិតក្កោ ឧប្បជ្ជតិ. សហជាតាធិបតិ – សវិតក្កាធិបតិ វិតក្កស្ស ច ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (២)

សវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – សវិតក្កេ ខន្ធេ គរុំ កត្វា សវិតក្កា ខន្ធា ច វិតក្កោ ច ឧប្បជ្ជន្តិ. សហជាតាធិបតិ – សវិតក្កាធិបតិ សម្បយុត្តកានំ ខន្ធានំ វិតក្កស្ស ច ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

១២១. អវិតក្កោ ធម្មោ អវិតក្កស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា អវិតក្កា ឈានា វុដ្ឋហិត្វា…បេ… មគ្គា វុដ្ឋហិត្វា…បេ… ផលា វុដ្ឋហិត្វា ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ, និព្ពានំ អវិតក្កស្ស មគ្គស្ស, ផលស្ស, វិតក្កស្ស ច អធិបតិបច្ចយេន បច្ចយោ; ចក្ខុំ…បេ… វត្ថុំ អវិតក្កេ ខន្ធេ ច វិតក្កញ្ច គរុំ កត្វា អស្សាទេតិ អភិនន្ទតិ, តំ គរុំ កត្វា វិតក្កោ ឧប្បជ្ជតិ. សហជាតាធិបតិ – អវិតក្កាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អវិតក្កោ ធម្មោ សវិតក្កស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា អវិតក្កា ឈានា វុដ្ឋហិត្វា…បេ… មគ្គា វុដ្ឋហិត្វា…បេ… ផលា វុដ្ឋហិត្វា ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស, សវិតក្កស្ស មគ្គស្ស, ផលស្ស អធិបតិបច្ចយេន បច្ចយោ; ចក្ខុំ…បេ… វត្ថុំ អវិតក្កេ ខន្ធេ ច វិតក្កញ្ច គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ, អវិតក្កេ ខន្ធេ ច វិតក្កញ្ច គរុំ កត្វា សវិតក្កា ខន្ធា ឧប្បជ្ជន្តិ. (២)

អវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា អវិតក្កា ឈានា វុដ្ឋហិត្វា…បេ… មគ្គា វុដ្ឋហិត្វា…បេ… ផលា វុដ្ឋហិត្វា ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស, សវិតក្កស្ស មគ្គស្ស, ផលស្ស, វិតក្កស្ស ច អធិបតិបច្ចយេន បច្ចយោ; ចក្ខុំ…បេ… វត្ថុំ អវិតក្កេ ខន្ធេ ច វិតក្កញ្ច គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ; អវិតក្កេ ខន្ធេ ច វិតក្កញ្ច គរុំ កត្វា សវិតក្កា ខន្ធា ច វិតក្កោ ច ឧប្បជ្ជន្តិ. (៣)

សវិតក្កោ ច អវិតក្កោ ច ធម្មា សវិតក្កស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – សវិតក្កេ ខន្ធេ ច វិតក្កញ្ច គរុំ កត្វា សវិតក្កា ខន្ធា ឧប្បជ្ជន្តិ. (មូលំ កាតព្ពំ.) សវិតក្កេ ខន្ធេ ច វិតក្កញ្ច គរុំ កត្វា វិតក្កោ ឧប្បជ្ជតិ. (មូលំ កាតព្ពំ.) សវិតក្កេ ខន្ធេ ច វិតក្កញ្ច គរុំ កត្វា សវិតក្កា ខន្ធា ច វិតក្កោ ច ឧប្បជ្ជន្តិ. (៣)

អនន្តរបច្ចយាទិ

១២២. សវិតក្កោ ធម្មោ សវិតក្កស្ស ធម្មស្ស អនន្តរបច្ចយេន បច្ចយោ – បុរិមា បុរិមា សវិតក្កា ខន្ធា បច្ឆិមានំ បច្ឆិមានំ សវិតក្កានំ ខន្ធានំ អនន្តរបច្ចយេន បច្ចយោ. (១)

សវិតក្កោ ធម្មោ អវិតក្កស្ស ធម្មស្ស អនន្តរបច្ចយេន បច្ចយោ – បុរិមា បុរិមា សវិតក្កា ខន្ធា បច្ឆិមស្ស បច្ឆិមស្ស វិតក្កស្ស អនន្តរបច្ចយេន បច្ចយោ; សវិតក្កំ ចុតិចិត្តំ អវិតក្កស្ស ឧបបត្តិចិត្តស្ស អនន្តរបច្ចយេន បច្ចយោ; អាវជ្ជនា បញ្ចន្នំ វិញ្ញាណានំ អនន្តរបច្ចយេន បច្ចយោ; សវិតក្កា ខន្ធា អវិតក្កស្ស វុដ្ឋានស្ស អនន្តរបច្ចយេន បច្ចយោ; ទុតិយស្ស ឈានស្ស បរិកម្មំ ទុតិយស្ស ឈានស្ស អនន្តរបច្ចយេន បច្ចយោ; តតិយស្ស ឈានស្ស បរិកម្មំ…បេ… នេវសញ្ញានាសញ្ញាយតនស្ស បរិកម្មំ នេវសញ្ញានាសញ្ញាយតនស្ស…បេ… ទិព្ពស្ស ចក្ខុស្ស បរិកម្មំ…បេ… ទិព្ពាយ សោតធាតុយា បរិកម្មំ…បេ… ឥទ្ធិវិធញាណស្ស បរិកម្មំ…បេ… ចេតោបរិយញាណស្ស បរិកម្មំ…បេ… បុព្ពេនិវាសានុស្សតិញាណស្ស បរិកម្មំ…បេ… យថាកម្មូបគញាណស្ស បរិកម្មំ យថាកម្មូបគញាណស្ស…បេ… អនាគតំសញាណស្ស បរិកម្មំ អនាគតំសញាណស្ស អនន្តរបច្ចយេន បច្ចយោ. គោត្រភុ អវិតក្កស្ស មគ្គស្ស… វោទានំ អវិតក្កស្ស មគ្គស្ស… អនុលោមំ អវិតក្កាយ ផលសមាបត្តិយា អនន្តរបច្ចយេន បច្ចយោ. (២)

សវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា សវិតក្កា ខន្ធា បច្ឆិមានំ បច្ឆិមានំ សវិតក្កានំ ខន្ធានំ វិតក្កស្ស ច អនន្តរបច្ចយេន បច្ចយោ. (៣)

១២៣. អវិតក្កោ ធម្មោ អវិតក្កស្ស ធម្មស្ស អនន្តរបច្ចយេន បច្ចយោ – បុរិមោ បុរិមោ វិតក្កោ បច្ឆិមស្ស បច្ឆិមស្ស វិតក្កស្ស អនន្តរបច្ចយេន បច្ចយោ; បុរិមា បុរិមា អវិតក្កា ខន្ធា បច្ឆិមានំ បច្ឆិមានំ អវិតក្កានំ ខន្ធានំ អនន្តរបច្ចយេន បច្ចយោ; អវិតក្កោ មគ្គោ អវិតក្កស្ស ផលស្ស…បេ… អវិតក្កំ ផលំ អវិតក្កស្ស ផលស្ស …បេ… និរោធា វុដ្ឋហន្តស្ស នេវសញ្ញានាសញ្ញាយតនំ អវិតក្កាយ ផលសមាបត្តិយា អនន្តរបច្ចយេន បច្ចយោ. (១)

អវិតក្កោ ធម្មោ សវិតក្កស្ស ធម្មស្ស អនន្តរបច្ចយេន បច្ចយោ – បុរិមោ បុរិមោ វិតក្កោ បច្ឆិមានំ បច្ឆិមានំ សវិតក្កានំ ខន្ធានំ អនន្តរបច្ចយេន បច្ចយោ; អវិតក្កំ ចុតិចិត្តំ សវិតក្កស្ស ឧបបត្តិចិត្តស្ស, អវិតក្កំ ភវង្គំ អាវជ្ជនាយ, អវិតក្កា ខន្ធា សវិតក្កស្ស វុដ្ឋានស្ស អនន្តរបច្ចយេន បច្ចយោ. (២)

អវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស អនន្តរបច្ចយេន បច្ចយោ – បុរិមោ បុរិមោ វិតក្កោ បច្ឆិមានំ បច្ឆិមានំ សវិតក្កានំ ខន្ធានំ វិតក្កស្ស ច អនន្តរបច្ចយេន បច្ចយោ. (៣)

១២៤. សវិតក្កោ ច អវិតក្កោ ច ធម្មា សវិតក្កស្ស ធម្មស្ស អនន្តរបច្ចយេន បច្ចយោ – បុរិមា បុរិមា សវិតក្កា ខន្ធា ច វិតក្កោ ច បច្ឆិមានំ បច្ឆិមានំ សវិតក្កានំ ខន្ធានំ អនន្តរបច្ចយេន បច្ចយោ. (១)

សវិតក្កោ ច អវិតក្កោ ច ធម្មា អវិតក្កស្ស ធម្មស្ស អនន្តរបច្ចយេន បច្ចយោ – បុរិមា បុរិមា សវិតក្កា ខន្ធា ច វិតក្កោ ច បច្ឆិមស្ស បច្ឆិមស្ស វិតក្កស្ស អនន្តរបច្ចយេន បច្ចយោ; សវិតក្កំ ចុតិចិត្តញ្ច វិតក្កោ ច អវិតក្កស្ស ឧបបត្តិចិត្តស្ស…បេ… អាវជ្ជនា ច វិតក្កោ ច បញ្ចន្នំ វិញ្ញាណានំ…បេ… សវិតក្កា ខន្ធា ច វិតក្កោ ច អវិតក្កស្ស វុដ្ឋានស្ស អនន្តរបច្ចយេន បច្ចយោ; ទុតិយស្ស ឈានស្ស បរិកម្មញ្ច វិតក្កោ ច…បេ… (ហេដ្ឋា លិខិតំ លេខំ ឥមិនា ការណេន ទដ្ឋព្ពំ); អនុលោមញ្ច វិតក្កោ ច អវិតក្កាយ ផលសមាបត្តិយា អនន្តរបច្ចយេន បច្ចយោ. (២)

សវិតក្កោ ច អវិតក្កោ ច ធម្មា សវិតក្កស្ស ច អវិតក្កស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា សវិតក្កា ខន្ធា ច វិតក្កោ ច បច្ឆិមានំ បច្ឆិមានំ សវិតក្កានំ ខន្ធានំ វិតក្កស្ស ច អនន្តរបច្ចយេន បច្ចយោ. (៣)

សមនន្តរបច្ចយេន បច្ចយោ… សហជាតបច្ចយេន បច្ចយោ… នវ… អញ្ញមញ្ញបច្ចយេន បច្ចយោ… នវ… និស្សយបច្ចយេន បច្ចយោ… នវ.

ឧបនិស្សយបច្ចយោ

១២៥. សវិតក្កោ ធម្មោ សវិតក្កស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សវិតក្កា ខន្ធា សវិតក្កានំ ខន្ធានំ ឧបនិស្សយបច្ចយេន បច្ចយោ. (មូលំ កាតព្ពំ.) សវិតក្កា ខន្ធា អវិតក្កានំ ខន្ធានំ វិតក្កស្ស ច ឧបនិស្សយបច្ចយេន បច្ចយោ. (មូលំ កាតព្ពំ.) សវិតក្កា ខន្ធា សវិតក្កានំ ខន្ធានំ វិតក្កស្ស ច ឧបនិស្សយបច្ចយេន បច្ចយោ. (៣)

១២៦. អវិតក្កោ ធម្មោ អវិតក្កស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អវិតក្កំ សទ្ធំ ឧបនិស្សាយ អវិតក្កំ ឈានំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ; អវិតក្កំ សីលំ…បេ… បញ្ញំ… កាយិកំ សុខំ… កាយិកំ ទុក្ខំ… ឧតុំ… ភោជនំ… សេនាសនំ វិតក្កំ ឧបនិស្សាយ អវិតក្កំ ឈានំ ឧប្បាទេតិ, មគ្គំ…បេ… អភិញ្ញំ…បេ… សមាបត្តិំ ឧប្បាទេតិ; អវិតក្កា សទ្ធា…បេ… សេនាសនំ វិតក្កោ ច អវិតក្កាយ សទ្ធាយ…បេ… បញ្ញាយ… កាយិកស្ស សុខស្ស… កាយិកស្ស ទុក្ខស្ស… អវិតក្កស្ស មគ្គស្ស… ផលសមាបត្តិយា ឧបនិស្សយបច្ចយេន បច្ចយោ. (១)

អវិតក្កោ ធម្មោ សវិតក្កស្ស ធម្មស្ស ឧបនិស្សយបច្ចយេន បច្ចយោ (តីណិបិ ឧបនិស្សយា សព្ពត្ថ កាតព្ពា). អវិតក្កំ សទ្ធំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ; សវិតក្កំ ឈានំ ឧប្បាទេតិ, វិបស្សនំ…បេ… មគ្គំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; អវិតក្កំ សីលំ…បេ… សេនាសនំ វិតក្កំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, បាណំ ហនតិ…បេ… សង្ឃំ ភិន្ទតិ; អវិតក្កា សទ្ធា…បេ… សេនាសនំ វិតក្កោ ច សវិតក្កាយ សទ្ធាយ…បេ… បញ្ញាយ… រាគស្ស…បេ… បត្ថនាយ សវិតក្កស្ស មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (២)

អវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស ឧបនិស្សយបច្ចយេន បច្ចយោ – អវិតក្កំ សទ្ធំ ឧបនិស្សាយ ទានំ ទេតិ…បេ… (ទុតិយវារេ លិខិតបទា សព្ពេ កាតព្ពា) សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; សីលំ…បេ… បញ្ញំ…បេ… សេនាសនំ វិតក្កំ ឧបនិស្សាយ ទានំ ទេតិ…បេ… បាណំ ហនតិ…បេ… សង្ឃំ ភិន្ទតិ; អវិតក្កា សទ្ធា…បេ… សេនាសនំ វិតក្កោ ច សវិតក្កាយ សទ្ធាយ…បេ… បញ្ញាយ… រាគស្ស …បេ… បត្ថនាយ សវិតក្កស្ស មគ្គស្ស, ផលសមាបត្តិយា វិតក្កស្ស ច ឧបនិស្សយបច្ចយេន បច្ចយោ. (៣)

១២៧. សវិតក្កោ ច អវិតក្កោ ច ធម្មា សវិតក្កស្ស ធម្មស្ស ឧបនិស្សយបច្ចយេន បច្ចយោ – សវិតក្កា ខន្ធា ច វិតក្កោ ច សវិតក្កានំ ខន្ធានំ ឧបនិស្សយបច្ចយេន បច្ចយោ. (មូលំ កាតព្ពំ.) សវិតក្កា ខន្ធា ច វិតក្កោ ច អវិតក្កានំ ខន្ធានំ វិតក្កស្ស ច ឧបនិស្សយបច្ចយេន បច្ចយោ. (មូលំ កាតព្ពំ.) សវិតក្កា ខន្ធា ច វិតក្កោ ច សវិតក្កានំ ខន្ធានំ វិតក្កស្ស ច ឧបនិស្សយបច្ចយេន បច្ចយោ. (៣)

បុរេជាតបច្ចយោ

១២៨. អវិតក្កោ ធម្មោ អវិតក្កស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ វិតក្កោ ឧប្បជ្ជតិ, ទិព្ពេន ចក្ខុនា រូបំ បស្សតិ…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ អវិតក្កានំ ខន្ធានំ វិតក្កស្ស ច បុរេជាតបច្ចយេន បច្ចយោ.

អវិតក្កោ ធម្មោ សវិតក្កស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ សវិតក្កា ខន្ធា ឧប្បជ្ជន្តិ. វត្ថុបុរេជាតំ – វត្ថុ សវិតក្កានំ ខន្ធានំ បុរេជាតបច្ចយេន បច្ចយោ.

អវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… វិបស្សតិ, អស្សាទេតិ អភិនន្ទតិ, តំ អារព្ភ សវិតក្កា ខន្ធា ច វិតក្កោ ច ឧប្បជ្ជន្តិ. វត្ថុបុរេជាតំ – វត្ថុ សវិតក្កានំ ខន្ធានំ វិតក្កស្ស ច បុរេជាតបច្ចយេន បច្ចយោ. (៣)

បច្ឆាជាតាសេវនបច្ចយា

១២៩. សវិតក្កោ ធម្មោ អវិតក្កស្ស ធម្មស្ស បច្ឆាជាតបច្ចយេន បច្ចយោ (តីណិ, បច្ឆាជាតា)… អាសេវនបច្ចយេន បច្ចយោ… នវ.

កម្មបច្ចយាទិ

១៣០. សវិតក្កោ ធម្មោ សវិតក្កស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – សវិតក្កា ចេតនា សម្បយុត្តកានំ ខន្ធានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – សវិតក្កា ចេតនា វិបាកានំ សវិតក្កានំ ខន្ធានំ កម្មបច្ចយេន បច្ចយោ. (ឯវំ ចត្តារិ, សហជាតាបិ នានាក្ខណិកាបិ កាតព្ពា.)

វិបាកបច្ចយេន បច្ចយោ… នវ… អាហារបច្ចយេន បច្ចយោ… ចត្តារិ… ឥន្ទ្រិយបច្ចយេន បច្ចយោ… ចត្តារិ… ឈានបច្ចយេន បច្ចយោ… នវ… មគ្គបច្ចយេន បច្ចយោ… នវ… សម្បយុត្តបច្ចយេន បច្ចយោ… ឆ.

១៣១. សវិតក្កោ ធម្មោ សវិតក្កស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

អវិតក្កោ ធម្មោ អវិតក្កស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (សំខិត្តំ). អវិតក្កោ ធម្មោ សវិតក្កស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ (សំខិត្តំ). អវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ វិតក្កស្ស សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ. បុរេជាតំ – វត្ថុ វិតក្កស្ស សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ. (៣)

សវិតក្កោ ច អវិតក្កោ ច ធម្មា អវិតក្កស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ).

អត្ថិបច្ចយាទិ

១៣២. សវិតក្កោ ធម្មោ សវិតក្កស្ស ធម្មស្ស អត្ថិបច្ចយេន បច្ចយោ (ឯកំ, បដិច្ចសទិសំ). សវិតក្កោ ធម្មោ អវិតក្កស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ (សំខិត្តំ). សវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស អត្ថិបច្ចយេន បច្ចយោ (បដិច្ចសទិសំ). (៣)

អវិតក្កោ ធម្មោ អវិតក្កស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ). អវិតក្កោ ធម្មោ សវិតក្កស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ (សំខិត្តំ). អវិតក្កោ ធម្មោ សវិតក្កស្ស ច អវិតក្កស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – វិតក្កោ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ; បដិសន្ធិក្ខណេ វិតក្កោ សម្បយុត្តកានំ ខន្ធានំ កដត្តា ច រូបានំ អត្ថិបច្ចយេន បច្ចយោ, បដិសន្ធិក្ខណេ វត្ថុ វិតក្កស្ស សម្បយុត្តកានញ្ច ខន្ធានំ អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ វិតក្កោ ច សម្បយុត្តកា ច ខន្ធា ឧប្បជ្ជន្តិ, វត្ថុ វិតក្កស្ស សម្បយុត្តកានញ្ច ខន្ធានំ អត្ថិបច្ចយេន បច្ចយោ. (៣)

១៣៣. សវិតក្កោ ច អវិតក្កោ ច ធម្មា សវិតក្កស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – សវិតក្កោ ឯកោ ខន្ធោ ច វិតក្កោ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. សហជាតោ – សវិតក្កោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… (បដិសន្ធិក្ខណេ សហជាតាបិ ទ្វេបិ កាតព្ពា). (១)

សវិតក្កោ ច អវិតក្កោ ច ធម្មា អវិតក្កស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតា – សវិតក្កា ខន្ធា ច វិតក្កោ ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. សហជាតា – សវិតក្កា ខន្ធា ច វត្ថុ ច វិតក្កស្ស អត្ថិបច្ចយេន បច្ចយោ (បដិសន្ធិក្ខណេ, តីណិ). បច្ឆាជាតា – សវិតក្កា ខន្ធា ច វិតក្កោ ច បុរេជាតស្ស ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – សវិតក្កា ខន្ធា ច វិតក្កោ ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – សវិតក្កា ខន្ធា ច វិតក្កោ ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (៣)

សវិតក្កោ ច អវិតក្កោ ច ធម្មា សវិតក្កស្ស ច អវិតក្កស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – សវិតក្កោ ឯកោ ខន្ធោ ច វិតក្កោ ច តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. សហជាតោ – សវិតក្កោ ឯកោ ខន្ធោ ច វត្ថុ ច តិណ្ណន្នំ ខន្ធានំ វិតក្កស្ស ច អត្ថិបច្ចយេន បច្ចយោ…បេ… ទ្វេ ខន្ធា ច…បេ… (បដិសន្ធិយាបិ ទ្វេ). (៣)

នត្ថិបច្ចយេន បច្ចយោ… វិគតបច្ចយេន បច្ចយោ… អវិគតបច្ចយេន បច្ចយោ.