១. វិភង្គវារោ

ហេតុបច្ចយោ

១១០. សវិតក្កំ ធម្មំ បច្ចយា សវិតក្កោ ធម្មោ ឧប្បជ្ជតិ ហេតុបច្ចយា… តីណិ (បដិច្ចវារសទិសា).

អវិតក្កំ ធម្មំ បច្ចយា អវិតក្កោ ធម្មោ ឧប្បជ្ជតិ ហេតុបច្ចយា – អវិតក្កំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វិតក្កំ បច្ចយា ចិត្តសមុដ្ឋានំ រូបំ; បដិសន្ធិក្ខណេ អវិតក្កំ ឯកំ ខន្ធំ បច្ចយា តយោ ខន្ធា កដត្តា ច រូបំ…បេ… ទ្វេ ខន្ធេ…បេ… បដិសន្ធិក្ខណេ វិតក្កំ បច្ចយា កដត្តារូបំ, ខន្ធេ បច្ចយា វត្ថុ, វត្ថុំ បច្ចយា ខន្ធា, វិតក្កំ បច្ចយា វត្ថុ, វត្ថុំ បច្ចយា វិតក្កោ, ឯកំ មហាភូតំ បច្ចយា តយោ មហាភូតា…បេ… វត្ថុំ បច្ចយា អវិតក្កា ខន្ធា, វត្ថុំ បច្ចយា វិតក្កោ.

អវិតក្កំ ធម្មំ បច្ចយា សវិតក្កោ ធម្មោ ឧប្បជ្ជតិ ហេតុបច្ចយា – វិតក្កំ បច្ចយា សម្បយុត្តកា ខន្ធា, វត្ថុំ បច្ចយា សវិតក្កា ខន្ធា (បដិសន្ធិយាបិ ទ្វេ).

អវិតក្កំ ធម្មំ បច្ចយា សវិតក្កោ ច អវិតក្កោ ច ធម្មា ឧប្បជ្ជន្តិ ហេតុបច្ចយា – វិតក្កំ បច្ចយា សម្បយុត្តកា ខន្ធា ចិត្តសមុដ្ឋានញ្ច រូបំ, វិតក្កំ បច្ចយា សម្បយុត្តកា ខន្ធា, មហាភូតេ បច្ចយា ចិត្តសមុដ្ឋានំ រូបំ, វត្ថុំ បច្ចយា សវិតក្កា ខន្ធា, មហាភូតេ បច្ចយា ចិត្តសមុដ្ឋានំ រូបំ, វត្ថុំ បច្ចយា វិតក្កោ សម្បយុត្តកា ច ខន្ធា; បដិសន្ធិក្ខណេ…បេ… (បដិសន្ធិយាបិ បវត្តិសទិសាយេវ). (៣)

១១១. សវិតក្កញ្ច អវិតក្កញ្ច ធម្មំ បច្ចយា សវិតក្កោ ធម្មោ ឧប្បជ្ជតិ ហេតុបច្ចយា – សវិតក្កំ ឯកំ ខន្ធញ្ច វិតក្កញ្ច បច្ចយា តយោ ខន្ធា…បេ… ទ្វេ ខន្ធេ…បេ… សវិតក្កំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… (បដិសន្ធិក្ខណេ ទ្វេ កាតព្ពា). (១)

សវិតក្កញ្ច អវិតក្កញ្ច ធម្មំ បច្ចយា អវិតក្កោ ធម្មោ ឧប្បជ្ជតិ ហេតុបច្ចយា – សវិតក្កេ ខន្ធេ ច វិតក្កញ្ច បច្ចយា ចិត្តសមុដ្ឋានំ រូបំ, សវិតក្កេ ខន្ធេ ច វិតក្កញ្ច មហាភូតេ ច បច្ចយា ចិត្តសមុដ្ឋានំ រូបំ, សវិតក្កេ ខន្ធេ ច វត្ថុញ្ច បច្ចយា វិតក្កោ; បដិសន្ធិក្ខណេ…បេ… (តីណិ, បដិសន្ធិយាបិ). (២)

សវិតក្កញ្ច អវិតក្កញ្ច ធម្មំ បច្ចយា សវិតក្កោ ច អវិតក្កោ ច ធម្មា ឧប្បជ្ជន្តិ ហេតុបច្ចយា – សវិតក្កំ ឯកំ ខន្ធញ្ច វិតក្កញ្ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… សវិតក្កំ ឯកំ ខន្ធញ្ច វិតក្កញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… សវិតក្កេ ខន្ធេ ច វិតក្កញ្ច មហាភូតេ ច បច្ចយា ចិត្តសមុដ្ឋានំ រូបំ, សវិតក្កំ ឯកំ ខន្ធញ្ច វត្ថុញ្ច បច្ចយា តយោ ខន្ធា វិតក្កោ ច…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)