១. វិភង្គវារោ

នហេតុបច្ចយោ

១០៦. សវិតក្កំ ធម្មំ បដិច្ច សវិតក្កោ ធម្មោ ឧប្បជ្ជតិ នហេតុបច្ចយា – អហេតុកំ សវិតក្កំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (សវិតក្កមូលកា អវសេសា ទ្វេ បញ្ហា កាតព្ពា, អហេតុកំ និន្នានំ.) (៣)

អវិតក្កំ ធម្មំ បដិច្ច អវិតក្កោ ធម្មោ ឧប្បជ្ជតិ នហេតុបច្ចយា – អហេតុកំ អវិតក្កំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… អហេតុកំ វិតក្កំ បដិច្ច ចិត្តសមុដ្ឋានំ រូបំ; អហេតុកបដិសន្ធិក្ខណេ វិតក្កំ បដិច្ច កដត្តារូបំ, វិតក្កំ បដិច្ច វត្ថុ, វត្ថុំ បដិច្ច វិតក្កោ, ឯកំ មហាភូតំ…បេ…. (១)

អវិតក្កំ ធម្មំ បដិច្ច សវិតក្កោ ធម្មោ ឧប្បជ្ជតិ នហេតុបច្ចយា – អហេតុកំ វិតក្កំ បដិច្ច សម្បយុត្តកា ខន្ធា, អហេតុកបដិសន្ធិក្ខណេ វិតក្កំ បដិច្ច សម្បយុត្តកា ខន្ធា; បដិសន្ធិក្ខណេ វត្ថុំ បដិច្ច អហេតុកា សវិតក្កា ខន្ធា, វិតក្កំ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (២)

អវិតក្កំ ធម្មំ បដិច្ច សវិតក្កោ ច អវិតក្កោ ច ធម្មា ឧប្បជ្ជន្តិ នហេតុបច្ចយា. (សំខិត្តំ. ហេតុបច្ចយសទិសំ. ‘‘អហេតុក’’ន្តិ និយាមេតព្ពំ.) (៣)

សវិតក្កញ្ច អវិតក្កញ្ច ធម្មំ បដិច្ច សវិតក្កោ ធម្មោ ឧប្បជ្ជតិ នហេតុបច្ចយា – អហេតុកំ សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ…បេ… អហេតុកបដិសន្ធិក្ខណេ សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ…បេ… អហេតុកបដិសន្ធិក្ខណេ សវិតក្កំ ឯកំ ខន្ធញ្ច វត្ថុញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ ច វិតក្កញ្ច បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (អវសេសា ទ្វេ បញ្ហា ហេតុបច្ចយសទិសា និន្នានា, អហេតុកន្តិ និយាមេតព្ពំ.) (៣)