១. វិភង្គវារោ

ហេតុបច្ចយោ

១០២. សវិតក្កំ ធម្មំ បដិច្ច សវិតក្កោ ធម្មោ ឧប្បជ្ជតិ ហេតុបច្ចយា – សវិតក្កំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. សវិតក្កំ ធម្មំ បដិច្ច អវិតក្កោ ធម្មោ ឧប្បជ្ជតិ ហេតុបច្ចយា – សវិតក្កេ ខន្ធេ បដិច្ច វិតក្កោ ចិត្តសមុដ្ឋានញ្ច រូបំ; បដិសន្ធិក្ខណេ…បេ…. សវិតក្កំ ធម្មំ បដិច្ច សវិតក្កោ ច អវិតក្កោ ច ធម្មា ឧប្បជ្ជន្តិ ហេតុបច្ចយា – សវិតក្កំ ឯកំ ខន្ធំ បដិច្ច តយោ ខន្ធា វិតក្កោ ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)

១០៣. អវិតក្កំ ធម្មំ បដិច្ច អវិតក្កោ ធម្មោ ឧប្បជ្ជតិ ហេតុបច្ចយា – អវិតក្កំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វិតក្កំ បដិច្ច ចិត្តសមុដ្ឋានំ រូបំ; បដិសន្ធិក្ខណេ អវិតក្កំ ឯកំ ខន្ធំ បដិច្ច តយោ ខន្ធា កដត្តា ច រូបំ…បេ… ទ្វេ ខន្ធេ…បេ… វិតក្កំ បដិច្ច កដត្តារូបំ, ខន្ធេ បដិច្ច វត្ថុ, វត្ថុំ បដិច្ច ខន្ធា, វិតក្កំ បដិច្ច វត្ថុ, វត្ថុំ បដិច្ច វិតក្កោ, ឯកំ មហាភូតំ…បេ…. (១)

អវិតក្កំ ធម្មំ បដិច្ច សវិតក្កោ ធម្មោ ឧប្បជ្ជតិ ហេតុបច្ចយា – វិតក្កំ បដិច្ច សម្បយុត្តកា ខន្ធា; បដិសន្ធិក្ខណេ វិតក្កំ បដិច្ច សម្បយុត្តកា ខន្ធា, បដិសន្ធិក្ខណេ វត្ថុំ បដិច្ច សវិតក្កា ខន្ធា. (២)

អវិតក្កំ ធម្មំ បដិច្ច សវិតក្កោ ច អវិតក្កោ ច ធម្មា ឧប្បជ្ជន្តិ ហេតុបច្ចយា – វិតក្កំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ, វិតក្កំ បដិច្ច សវិតក្កា ខន្ធា, មហាភូតេ បដិច្ច ចិត្តសមុដ្ឋានំ រូបំ; បដិសន្ធិក្ខណេ វិតក្កំ បដិច្ច សម្បយុត្តកា ខន្ធា កដត្តា ច រូបំ, បដិសន្ធិក្ខណេ វិតក្កំ បដិច្ច សវិតក្កា ខន្ធា, មហាភូតេ បដិច្ច កដត្តារូបំ, បដិសន្ធិក្ខណេ វត្ថុំ បដិច្ច សវិតក្កា ខន្ធា, មហាភូតេ បដិច្ច កដត្តារូបំ, បដិសន្ធិក្ខណេ វត្ថុំ បដិច្ច វិតក្កោ សម្បយុត្តកា ច ខន្ធា. (៣)

១០៤. សវិតក្កញ្ច អវិតក្កញ្ច ធម្មំ បដិច្ច សវិតក្កោ ធម្មោ ឧប្បជ្ជតិ ហេតុបច្ចយា – សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ …បេ… បដិសន្ធិក្ខណេ សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ សវិតក្កំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ…បេ…. (១)

សវិតក្កញ្ច អវិតក្កញ្ច ធម្មំ បដិច្ច អវិតក្កោ ធម្មោ ឧប្បជ្ជតិ ហេតុបច្ចយា – សវិតក្កេ ខន្ធេ ច វិតក្កញ្ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ សវិតក្កេ ខន្ធេ ច វិតក្កញ្ច មហាភូតេ ច បដិច្ច កដត្តារូបំ, បដិសន្ធិក្ខណេ សវិតក្កេ ខន្ធេ ច វត្ថុញ្ច បដិច្ច វិតក្កោ. (២)

សវិតក្កញ្ច អវិតក្កញ្ច ធម្មំ បដិច្ច សវិតក្កោ ច អវិតក្កោ ច ធម្មា ឧប្បជ្ជន្តិ ហេតុបច្ចយា – សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ…បេ… សវិតក្កេ ខន្ធេ ច វិតក្កញ្ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា កដត្តា ច រូបំ…បេ… ទ្វេ ខន្ធេ…បេ… បដិសន្ធិក្ខណេ សវិតក្កំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ…បេ… សវិតក្កេ ខន្ធេ ច វិតក្កញ្ច មហាភូតេ ច បដិច្ច កដត្តារូបំ, បដិសន្ធិក្ខណេ សវិតក្កំ ឯកំ ខន្ធញ្ច វត្ថុញ្ច បដិច្ច តយោ ខន្ធា វិតក្កោ ច…បេ… ទ្វេ ខន្ធេ…បេ…. (៣) (សំខិត្តំ.)