១-៤. បច្ចយចតុក្កំ

ហេតុបច្ចយោ

៦៤. ទស្សនេន បហាតព្ពហេតុកំ ធម្មំ សំសដ្ឋោ ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពហេតុកំ ឯកំ ខន្ធំ សំសដ្ឋា តយោ ខន្ធា…បេ… ទ្វេ ខន្ធេ…បេ…. (១)

នទស្សនេន បហាតព្ពហេតុកំ ធម្មំ សំសដ្ឋោ នទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – នទស្សនេន បហាតព្ពហេតុកំ ឯកំ ខន្ធំ សំសដ្ឋា តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. (១)

នទស្សនេន បហាតព្ពហេតុកំ ធម្មំ សំសដ្ឋោ ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ មោហំ សំសដ្ឋា សម្បយុត្តកា ខន្ធា. (២)

ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ សំសដ្ឋោ ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ ឯកំ ខន្ធញ្ច មោហញ្ច សំសដ្ឋា តយោ ខន្ធា…បេ… ទ្វេ ខន្ធេ ច…បេ…. (១)

អារម្មណបច្ចយោ

៦៥. ទស្សនេន បហាតព្ពហេតុកំ ធម្មំ សំសដ្ឋោ ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា… តីណិ (បដិច្ចសទិសា).

នទស្សនេន បហាតព្ពហេតុកំ ធម្មំ សំសដ្ឋោ នទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – នទស្សនេន បហាតព្ពហេតុកំ ឯកំ ខន្ធំ សំសដ្ឋា តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. (១)

នទស្សនេន បហាតព្ពហេតុកំ ធម្មំ សំសដ្ឋោ ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា (បដិច្ចសទិសំ). (២)

ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ សំសដ្ឋោ ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា (បដិច្ចសទិសំ, សំខិត្តំ). (១)

៦៦. ហេតុយា ចត្តារិ, អារម្មណេ ឆ, អធិបតិយា ទ្វេ, អនន្តរេ ឆ (សព្ពត្ថ ឆ), វិបាកេ ឯកំ…បេ… អវិគតេ ឆ.

អនុលោមំ.

នហេតុបច្ចយោ

៦៧. ទស្សនេន បហាតព្ពហេតុកំ ធម្មំ សំសដ្ឋោ នទស្សនេន បហាតព្ពហេតុកោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ សំសដ្ឋោ វិចិកិច្ឆាសហគតោ មោហោ. (១)

នទស្សនេន បហាតព្ពហេតុកំ ធម្មំ សំសដ្ឋោ នទស្សនេន បហាតព្ពហេតុកោ ធម្មោ ឧប្បជ្ជតិ នហេតុបច្ចយា – អហេតុកំ នទស្សនេន បហាតព្ពហេតុកំ ឯកំ ខន្ធំ សំសដ្ឋា តយោ ខន្ធា…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ឧទ្ធច្ចសហគតេ ខន្ធេ សំសដ្ឋោ ឧទ្ធច្ចសហគតោ មោហោ. (១)

នហេតុយា ទ្វេ, នអធិបតិយា ឆ, នបុរេជាតេ ឆ, នបច្ឆាជាតេ ឆ, នអាសេវនេ ឆ, នកម្មេ ចត្តារិ, នវិបាកេ ឆ, នឈានេ ឯកំ, នមគ្គេ ឯកំ, នវិប្បយុត្តេ ឆ.

បច្ចនីយំ.

ហេតុទុកំ

ហេតុបច្ចយា នអធិបតិយា ចត្តារិ, នបុរេជាតេ ចត្តារិ…បេ… នវិប្បយុត្តេ ចត្តារិ.

នហេតុទុកំ

នហេតុបច្ចយា អារម្មណេ ទ្វេ, អនន្តរេ ទ្វេ…បេ… វិបាកេ ឯកំ…បេ… អវិគតេ ទ្វេ.