១. វិភង្គវារោ

នហេតុបច្ចយោ

៦២. ទស្សនេន បហាតព្ពហេតុកំ ធម្មំ បច្ចយា នទស្សនេន បហាតព្ពហេតុកោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ បច្ចយា វិចិកិច្ឆាសហគតោ មោហោ. (១)

នទស្សនេន បហាតព្ពហេតុកំ ធម្មំ បច្ចយា នទស្សនេន បហាតព្ពហេតុកោ ធម្មោ ឧប្បជ្ជតិ នហេតុបច្ចយា – អហេតុកំ នទស្សនេន បហាតព្ពហេតុកំ…បេ… (យាវ អសញ្ញសត្តា) ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា នទស្សនេន បហាតព្ពហេតុកា ខន្ធា, ឧទ្ធច្ចសហគតេ ខន្ធេ ច វត្ថុញ្ច បច្ចយា ឧទ្ធច្ចសហគតោ មោហោ. (១)

ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ បច្ចយា នទស្សនេន បហាតព្ពហេតុកោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ មោហោ (សំខិត្តំ). (១)