១. វិភង្គវារោ

ហេតុបច្ចយោ

៥៧. ទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា… តីណិ.

នទស្សនេន បហាតព្ពហេតុកំ ធម្មំ បច្ចយា នទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – នទស្សនេន បហាតព្ពហេតុកំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… (យាវ អជ្ឈត្តិកា មហាភូតា) វត្ថុំ បច្ចយា នទស្សនេន បហាតព្ពហេតុកា ខន្ធា. (១)

នទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – វត្ថុំ បច្ចយា ទស្សនេន បហាតព្ពហេតុកា ខន្ធា, វិចិកិច្ឆាសហគតំ មោហំ បច្ចយា សម្បយុត្តកា ខន្ធា. (២)

នទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ច នទស្សនេន បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – វត្ថុំ បច្ចយា ទស្សនេន បហាតព្ពហេតុកា ខន្ធា, មហាភូតេ បច្ចយា ចិត្តសមុដ្ឋានំ រូបំ, វិចិកិច្ឆាសហគតំ មោហំ បច្ចយា សម្បយុត្តកា ខន្ធា ចិត្តសមុដ្ឋានញ្ច រូបំ. (៣)

៥៨. ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពហេតុកំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… វិចិកិច្ឆាសហគតំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ…. (១)

ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ បច្ចយា នទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពហេតុកេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ, វិចិកិច្ឆាសហគតេ ខន្ធេ ច មោហញ្ច បច្ចយា ចិត្តសមុដ្ឋានំ រូបំ. (២)

ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ បច្ចយា ទស្សនេន បហាតព្ពហេតុកោ ច នទស្សនេន បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – ទស្សនេន បហាតព្ពហេតុកំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… ទស្សនេន បហាតព្ពហេតុកេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ, វិចិកិច្ឆាសហគតំ ឯកំ ខន្ធញ្ច មោហញ្ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ…. (៣)

អារម្មណបច្ចយោ

៥៩. ទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា… តីណិ (បដិច្ចសទិសា).

នទស្សនេន បហាតព្ពហេតុកំ ធម្មំ បច្ចយា នទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – នទស្សនេន បហាតព្ពហេតុកំ ឯកំ ខន្ធំ បច្ចយា តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ… ចក្ខាយតនំ បច្ចយា ចក្ខុវិញ្ញាណំ…បេ… វត្ថុំ បច្ចយា នទស្សនេន បហាតព្ពហេតុកា ខន្ធា, វត្ថុំ បច្ចយា វិចិកិច្ឆាសហគតោ មោហោ. នទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – វត្ថុំ បច្ចយា ទស្សនេន បហាតព្ពហេតុកា ខន្ធា, វិចិកិច្ឆាសហគតំ មោហំ បច្ចយា សម្បយុត្តកា ខន្ធា. នទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ច នទស្សនេន បហាតព្ពហេតុកោ ច ធម្មា ឧប្បជ្ជន្តិ អារម្មណបច្ចយា – វត្ថុំ បច្ចយា វិចិកិច្ឆាសហគតា ខន្ធា ច មោហោ ច. (៣)

៦០. ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – ទស្សនេន បហាតព្ពហេតុកំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… វិចិកិច្ឆាសហគតំ ឯកំ ខន្ធញ្ច មោហញ្ច បច្ចយា តយោ ខន្ធា…បេ… ទ្វេ ខន្ធេ ច…បេ…. (១)

ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ បច្ចយា នទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – វិចិកិច្ឆាសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ មោហោ. (២)

ទស្សនេន បហាតព្ពហេតុកញ្ច នទស្សនេន បហាតព្ពហេតុកញ្ច ធម្មំ បច្ចយា ទស្សនេន បហាតព្ពហេតុកោ ច នទស្សនេន បហាតព្ពហេតុកោ ច ធម្មា ឧប្បជ្ជន្តិ អារម្មណបច្ចយា – វិចិកិច្ឆាសហគតំ ឯកំ ខន្ធញ្ច វត្ថុញ្ច បច្ចយា តយោ ខន្ធា មោហោ ច…បេ… ទ្វេ ខន្ធេ ច…បេ…. (៣)