១. វិភង្គវារោ

ហេតុបច្ចយោ

១៣. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស ហេតុបច្ចយេន បច្ចយោ… តីណិ.

នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស ហេតុបច្ចយេន បច្ចយោ – នទស្សនេន បហាតព្ពា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អារម្មណបច្ចយោ

១៤. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អារម្មណបច្ចយេន បច្ចយោ – ទស្សនេន បហាតព្ពំ រាគំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ…បេ… វិចិកិច្ឆា ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ; ទស្សនេន បហាតព្ពំ ទិដ្ឋិំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ…បេ… វិចិកិច្ឆា…បេ… ទោមនស្សំ ឧប្បជ្ជតិ; វិចិកិច្ឆំ អារព្ភ វិចិកិច្ឆា ឧប្បជ្ជតិ, ទិដ្ឋិ…បេ… ទោមនស្សំ ឧប្បជ្ជតិ; ទស្សនេន បហាតព្ពំ ទោមនស្សំ អារព្ភ ទស្សនេន បហាតព្ពំ ទោមនស្សំ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ. (១)

ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស អារម្មណបច្ចយេន បច្ចយោ – អរិយា ទស្សនេន បហាតព្ពេ បហីនេ កិលេសេ បច្ចវេក្ខន្តិ, បុព្ពេ សមុទាចិណ្ណេ…បេ… ទស្សនេន បហាតព្ពេ ខន្ធេ អនិច្ចតោ…បេ… វិបស្សតិ, ចេតោបរិយញាណេន ទស្សនេន បហាតព្ពចិត្តសមង្គិស្ស ចិត្តំ ជានាតិ, ទស្សនេន បហាតព្ពា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (២)

១៥. នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ បច្ចវេក្ខតិ អស្សាទេតិ អភិនន្ទតិ, តំ អារព្ភ នទស្សនេន បហាតព្ពោ រាគោ ឧប្បជ្ជតិ; ឧទ្ធច្ចំ…បេ… នទស្សនេន បហាតព្ពំ ទោមនស្សំ ឧប្បជ្ជតិ, បុព្ពេ សុចិណ្ណានិ…បេ… ឈានា …បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ…បេ… ផលស្ស អាវជ្ជនាយ អារម្មណបច្ចយេន បច្ចយោ; អរិយា នទស្សនេន បហាតព្ពេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ…បេ… បុព្ពេ…បេ… ចក្ខុំ…បេ… វត្ថុំ នទស្សនេន បហាតព្ពេ ខន្ធេ អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ នទស្សនេន បហាតព្ពោ រាគោ ឧប្បជ្ជតិ, ឧទ្ធច្ចំ…បេ… នទស្សនេន បហាតព្ពំ ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ…បេ… អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… ចក្ខុំ …បេ… វត្ថុំ នទស្សនេន បហាតព្ពេ ខន្ធេ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ…បេ… វិចិកិច្ឆា…បេ… ទស្សនេន បហាតព្ពំ ទោមនស្សំ ឧប្បជ្ជតិ. (២)

អធិបតិបច្ចយោ

១៦. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទស្សនេន បហាតព្ពំ រាគំ គរុំ កត្វា អស្សាទេតិ អភិនន្ទតិ, តំ គរុំ កត្វា ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, ទិដ្ឋិំ គរុំ កត្វា…បេ…. សហជាតាធិបតិ – ទស្សនេន បហាតព្ពាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស អធិបតិបច្ចយេន បច្ចយោ. សហជាតាធិបតិ – ទស្សនេន បហាតព្ពាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

ទស្សនេន បហាតព្ពោ ធម្មោ ទស្សនេន បហាតព្ពស្ស ច នទស្សនេន បហាតព្ពស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – ទស្សនេន បហាតព្ពាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

១៧. នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ…បេ… បុព្ពេ…បេ… ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, អស្សាទេតិ អភិនន្ទតិ, តំ គរុំ កត្វា នទស្សនេន បហាតព្ពោ រាគោ ឧប្បជ្ជតិ, អរិយា មគ្គា វុដ្ឋហិត្វា មគ្គំ គរុំ កត្វា…បេ… ផលស្ស អធិបតិបច្ចយេន បច្ចយោ; ចក្ខុំ…បេ… វត្ថុំ នទស្សនេន បហាតព្ពេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា នទស្សនេន បហាតព្ពោ រាគោ ឧប្បជ្ជតិ. សហជាតាធិបតិ – នទស្សនេន បហាតព្ពាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ ទត្វា…បេ… ឈានំ…បេ… ចក្ខុំ…បេ… វត្ថុំ នទស្សនេន បហាតព្ពេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

អនន្តរបច្ចយោ

១៨. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អនន្តរបច្ចយេន បច្ចយោ – បុរិមា បុរិមា ទស្សនេន បហាតព្ពា ខន្ធា បច្ឆិមានំ បច្ឆិមានំ ទស្សនេន បហាតព្ពានំ ខន្ធានំ អនន្តរបច្ចយេន បច្ចយោ. (១)

ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស អនន្តរបច្ចយេន បច្ចយោ – ទស្សនេន បហាតព្ពា ខន្ធា វុដ្ឋានស្ស អនន្តរបច្ចយេន បច្ចយោ. (មូលំ កាតព្ពំ.) បុរិមា បុរិមា នទស្សនេន បហាតព្ពា ខន្ធា…បេ… ផលសមាបត្តិយា អនន្តរបច្ចយេន បច្ចយោ. (មូលំ កាតព្ពំ.) អាវជ្ជនា ទស្សនេន បហាតព្ពានំ ខន្ធានំ អនន្តរបច្ចយេន បច្ចយោ. (២)

សមនន្តរបច្ចយេន បច្ចយោ… សហជាតបច្ចយេន បច្ចយោ… បញ្ច… អញ្ញមញ្ញបច្ចយេន បច្ចយោ… ទ្វេ… និស្សយបច្ចយេន បច្ចយោ… សត្ត.

ឧបនិស្សយបច្ចយោ

១៩. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ទស្សនេន បហាតព្ពំ រាគំ ឧបនិស្សាយ បាណំ ហនតិ…បេ… សង្ឃំ ភិន្ទតិ; ទស្សនេន បហាតព្ពំ ទោសំ… មោហំ… ទិដ្ឋិំ… បត្ថនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; ទស្សនេន បហាតព្ពោ រាគោ…បេ… បត្ថនា ទស្សនេន បហាតព្ពស្ស រាគស្ស…បេ… បត្ថនាយ ឧបនិស្សយបច្ចយេន បច្ចយោ. (២)

ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ទស្សនេន បហាតព្ពំ រាគំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ ទស្សនេន បហាតព្ពំ ទោសំ… មោហំ… ទិដ្ឋិំ… បត្ថនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ; ទស្សនេន បហាតព្ពោ រាគោ…បេ… បត្ថនា សទ្ធាយ…បេ… បញ្ញាយ នទស្សនេន បហាតព្ពស្ស រាគស្ស… ទោសស្ស… មោហស្ស… មានស្ស … បត្ថនាយ… កាយិកស្ស សុខស្ស…បេ… ផលសមាបត្តិយា ឧបនិស្សយបច្ចយេន បច្ចយោ. (២)

២០. នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ; សីលំ…បេ… បញ្ញំ, នទស្សនេន បហាតព្ពំ រាគំ… ទោសំ… មោហំ… មានំ… បត្ថនំ… កាយិកំ សុខំ…បេ… សេនាសនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ; សទ្ធា…បេ… បញ្ញា, នទស្សនេន បហាតព្ពោ រាគោ…បេ… បត្ថនា… កាយិកំ សុខំ…បេ… សេនាសនំ សទ្ធាយ…បេ… បញ្ញាយ នទស្សនេន បហាតព្ពស្ស រាគស្ស…បេ… បត្ថនាយ… កាយិកស្ស សុខស្ស… កាយិកស្ស ទុក្ខស្ស… មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (២)

នទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទិដ្ឋិំ គណ្ហាតិ; សីលំ…បេ… បញ្ញំ ឧបនិស្សាយ ទិដ្ឋិំ គណ្ហាតិ, នទស្សនេន បហាតព្ពំ រាគំ… ទោសំ… មោហំ… មានំ… បត្ថនំ… កាយិកំ សុខំ…បេ… សេនាសនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; សទ្ធា…បេ… សេនាសនំ ទស្សនេន បហាតព្ពស្ស រាគស្ស… ទោសស្ស… មោហស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. (២)

បុរេជាតបច្ចយោ

២១. នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ នទស្សនេន បហាតព្ពោ រាគោ …បេ… ឧទ្ធច្ចំ…បេ… នទស្សនេន បហាតព្ពំ ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស …បេ… កាយាយតនំ កាយវិញ្ញាណស្ស…បេ… វត្ថុ នទស្សនេន បហាតព្ពានំ ខន្ធានំ បុរេជាតបច្ចយេន បច្ចយោ. (១)

នទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ…បេ… ទិដ្ឋិ…បេ… វិចិកិច្ឆា…បេ… ទស្សនេន បហាតព្ពំ ទោមនស្សំ ឧប្បជ្ជតិ. វត្ថុបុរេជាតំ – វត្ថុ ទស្សនេន បហាតព្ពានំ ខន្ធានំ បុរេជាតបច្ចយេន បច្ចយោ. (២)

បច្ឆាជាតាសេវនបច្ចយា

២២. ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស បច្ឆាជាតបច្ចយេន បច្ចយោ (សំខិត្តំ). (១)

នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស បច្ឆាជាតបច្ចយេន បច្ចយោ (សំខិត្តំ)… អាសេវនបច្ចយេន បច្ចយោ… ទ្វេ.

កម្មបច្ចយោ

២៣. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស កម្មបច្ចយេន បច្ចយោ – ទស្សនេន បហាតព្ពា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – ទស្សនេន បហាតព្ពា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. នានាក្ខណិកា – ទស្សនេន បហាតព្ពា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (២)

ទស្សនេន បហាតព្ពោ ធម្មោ ទស្សនេន បហាតព្ពស្ស ច នទស្សនេន បហាតព្ពស្ស ច ធម្មស្ស កម្មបច្ចយេន បច្ចយោ – ទស្សនេន បហាតព្ពា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

២៤. នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នទស្សនេន បហាតព្ពា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នទស្សនេន បហាតព្ពា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ.

វិបាកបច្ចយាទិ

២៥. នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស វិបាកបច្ចយេន បច្ចយោ… ឯកំ… អាហារបច្ចយេន បច្ចយោ… ចត្តារិ… ឥន្ទ្រិយបច្ចយេន បច្ចយោ… ចត្តារិ… ឈានបច្ចយេន បច្ចយោ… ចត្តារិ… មគ្គបច្ចយេន បច្ចយោ… ចត្តារិ… សម្បយុត្តបច្ចយេន បច្ចយោ… ទ្វេ.

វិប្បយុត្តបច្ចយោ

២៦. ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (សំខិត្តំ).

នទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ ទស្សនេន បហាតព្ពានំ ខន្ធានំ វិប្បយុត្តបច្ចយេន បច្ចយោ. (២)

អត្ថិបច្ចយាទិ

២៧. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ (បដិច្ចសទិសំ). ទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ (សំខិត្តំ). ទស្សនេន បហាតព្ពោ ធម្មោ ទស្សនេន បហាតព្ពស្ស ច នទស្សនេន បហាតព្ពស្ស ច ធម្មស្ស អត្ថិបច្ចយេន បច្ចយោ (បដិច្ចវារសទិសា). (៣)

នទស្សនេន បហាតព្ពោ ធម្មោ នទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ). នទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ. បុរេជាតំ – ចក្ខុំ…បេ… (សំខិត្តំ, បុរេជាតសទិសំ). (២)

២៨. ទស្សនេន បហាតព្ពោ ច នទស្សនេន បហាតព្ពោ ច ធម្មា ទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – ទស្សនេន បហាតព្ពោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. (១)

ទស្សនេន បហាតព្ពោ ច នទស្សនេន បហាតព្ពោ ច ធម្មា នទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – ទស្សនេន បហាតព្ពា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – ទស្សនេន បហាតព្ពា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – ទស្សនេន បហាតព្ពា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

នត្ថិបច្ចយេន បច្ចយោ, វិគតបច្ចយេន បច្ចយោ, អវិគតបច្ចយេន បច្ចយោ.