១. វិភង្គវារោ

នហេតុបច្ចយោ

៩. ទស្សនេន បហាតព្ពំ ធម្មំ បច្ចយា ទស្សនេន បហាតព្ពោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ បច្ចយា វិចិកិច្ឆាសហគតោ មោហោ. (១)

នទស្សនេន បហាតព្ពំ ធម្មំ បច្ចយា នទស្សនេន បហាតព្ពោ ធម្មោ ឧប្បជ្ជតិ នហេតុបច្ចយា – អហេតុកំ នទស្សនេន បហាតព្ពំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ …បេ… ទ្វេ ខន្ធេ…បេ… (យាវ អសញ្ញសត្តា) ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ; វត្ថុំ បច្ចយា អហេតុកា នទស្សនេន បហាតព្ពា ខន្ធា, ឧទ្ធច្ចសហគតេ ខន្ធេ បច្ចយា ឧទ្ធច្ចសហគតោ មោហោ, វត្ថុំ បច្ចយា ឧទ្ធច្ចសហគតោ មោហោ. (១)

នទស្សនេន បហាតព្ពំ ធម្មំ បច្ចយា ទស្សនេន បហាតព្ពោ ធម្មោ ឧប្បជ្ជតិ នហេតុបច្ចយា – វត្ថុំ បច្ចយា វិចិកិច្ឆាសហគតោ មោហោ. (២)

ទស្សនេន បហាតព្ពញ្ច នទស្សនេន បហាតព្ពញ្ច ធម្មំ បច្ចយា ទស្សនេន បហាតព្ពោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ មោហោ. (១)