១-៧. បដិច្ចវារាទិ

ហេតុបច្ចយោ

២៨. អកុសលំ កិលេសញ្ចេវ កិលេសសម្បយុត្តញ្ច ធម្មំ បដិច្ច អកុសលោ កិលេសោ ចេវ កិលេសសម្បយុត្តោ ច ធម្មោ ឧប្បជ្ជតិ ហេតុបច្ចយា.

ហេតុយា ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

២៩. អកុសលំ កិលេសសម្បយុត្តញ្ចេវ នោ ច កិលេសំ ធម្មំ បដិច្ច អកុសលោ កិលេសសម្បយុត្តោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)