១-៧៥. កុសលត្តិក-កិលេសទុកំ

១-៧. បដិច្ចវារាទិ

បច្ចយចតុក្កំ

១. អកុសលំ កិលេសំ ធម្មំ បដិច្ច អកុសលោ កិលេសោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

២. កុសលំ នោកិលេសំ ធម្មំ បដិច្ច កុសលោ នោកិលេសោ ធម្មោ ឧប្បជ្ជតិ ហេតុបច្ចយា… តីណិ.

អកុសលំ នោកិលេសំ ធម្មំ បដិច្ច អកុសលោ នោកិលេសោ ធម្មោ ឧប្បជ្ជតិ ហេតុបច្ចយា… តីណិ.

អព្យាកតំ នោកិលេសំ ធម្មំ បដិច្ច អព្យាកតោ នោកិលេសោ ធម្មោ ឧប្បជ្ជតិ ហេតុបច្ចយា. (១)

កុសលំ នោកិលេសញ្ច អព្យាកតំ នោកិលេសញ្ច ធម្មំ បដិច្ច អព្យាកតោ នោកិលេសោ ធម្មោ ឧប្បជ្ជតិ ហេតុបច្ចយា. (១)

អកុសលំ នោកិលេសញ្ច អព្យាកតំ នោកិលេសញ្ច ធម្មំ បដិច្ច អព្យាកតោ នោកិលេសោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៣. ហេតុយា នវ, អារម្មណេ តីណិ, អធិបតិយា នវ…បេ… អវិគតេ នវ (សំខិត្តំ. សហជាតវារម្បិ …បេ… សម្បយុត្តវារម្បិ បដិច្ចវារសទិសំ).

៤. កុសលោ នោកិលេសោ ធម្មោ កុសលស្ស នោកិលេសស្ស ធម្មស្ស ហេតុបច្ចយេន បច្ចយោ… តីណិ.

អព្យាកតោ នោកិលេសោ ធម្មោ អព្យាកតស្ស នោកិលេសស្ស ធម្មស្ស ហេតុបច្ចយេន បច្ចយោ. (១) (សំខិត្តំ.)

៥. ហេតុយា ចត្តារិ, អារម្មណេ នវ…បេ… អវិគតេ តេរស (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

១-៧៦. កុសលត្តិក-សំកិលេសិកទុកំ

១-៧. បដិច្ចវារាទិ

បច្ចយចតុក្កំ

៦. កុសលំ សំកិលេសិកំ ធម្មំ បដិច្ច កុសលោ សំកិលេសិកោ ធម្មោ ឧប្បជ្ជតិ ហេតុបច្ចយា… តីណិ.

អកុសលំ សំកិលេសិកំ ធម្មំ បដិច្ច អកុសលោ សំកិលេសិកោ ធម្មោ ឧប្បជ្ជតិ ហេតុបច្ចយា… តីណិ.

អព្យាកតំ សំកិលេសិកំ ធម្មំ បដិច្ច អព្យាកតោ សំកិលេសិកោ ធម្មោ ឧប្បជ្ជតិ ហេតុបច្ចយា. (១)

កុសលំ សំកិលេសិកញ្ច អព្យាកតំ សំកិលេសិកញ្ច ធម្មំ បដិច្ច អព្យាកតោ សំកិលេសិកោ ធម្មោ ឧប្បជ្ជតិ ហេតុបច្ចយា. (១)

អកុសលំ សំកិលេសិកញ្ច អព្យាកតំ សំកិលេសិកញ្ច ធម្មំ បដិច្ច អព្យាកតោ សំកិលេសិកោ ធម្មោ ឧប្បជ្ជតិ ហេតុបច្ចយា. (១)

៧. ហេតុយា នវ, អារម្មណេ តីណិ…បេ… អវិគតេ នវ (សំខិត្តំ. សហជាតវារម្បិ…បេ… សម្បយុត្តវារម្បិ វិត្ថារេតព្ពំ).

៨. កុសលោ សំកិលេសិកោ ធម្មោ អកុសលស្ស សំកិលេសិកស្ស ធម្មស្ស ហេតុបច្ចយេន បច្ចយោ… តីណិ.

អកុសលោ សំកិលេសិកោ ធម្មោ អកុសលស្ស សំកិលេសិកស្ស ធម្មស្ស ហេតុបច្ចយេន បច្ចយោ… តីណិ.

អព្យាកតោ សំកិលេសិកោ ធម្មោ អព្យាកតស្ស សំកិលេសិកស្ស ធម្មស្ស ហេតុបច្ចយេន បច្ចយោ. (១) (សំខិត្តំ.)

៩. ហេតុយា សត្ត, អារម្មណេ នវ, អធិបតិយា នវ…បេ… អវិគតេ តេរស (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

១០. កុសលំ អសំកិលេសិកំ ធម្មំ បដិច្ច កុសលោ អសំកិលេសិកោ ធម្មោ ឧប្បជ្ជតិ ហេតុបច្ចយា. (១)

អព្យាកតំ អសំកិលេសិកំ ធម្មំ បដិច្ច អព្យាកតោ អសំកិលេសិកោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១១. ហេតុយា ទ្វេ, អារម្មណេ ទ្វេ…បេ… អវិគតេ ទ្វេ (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

១២. កុសលោ អសំកិលេសិកោ ធម្មោ កុសលស្ស អសំកិលេសិកស្ស ធម្មស្ស ហេតុបច្ចយេន បច្ចយោ. (១)

អព្យាកតោ អសំកិលេសិកោ ធម្មោ អព្យាកតស្ស អសំកិលេសិកស្ស ធម្មស្ស ហេតុបច្ចយេន បច្ចយោ. (១)

អព្យាកតោ អសំកិលេសិកោ ធម្មោ អព្យាកតស្ស អសំកិលេសិកស្ស ធម្មស្ស អារម្មណបច្ចយេន បច្ចយោ. អព្យាកតោ អសំកិលេសិកោ ធម្មោ កុសលស្ស អសំកិលេសិកស្ស ធម្មស្ស អារម្មណបច្ចយេន បច្ចយោ. (២) (សំខិត្តំ.)

១៣. ហេតុយា ទ្វេ, អារម្មណេ ទ្វេ, អធិបតិយា តីណិ, អនន្តរេ ទ្វេ…បេ… ឧបនិស្សយេ ចត្តារិ…បេ… អវិគតេ ទ្វេ (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

១-៧៧. កុសលត្តិក-សំកិលិដ្ឋទុកំ

១-៧. បដិច្ចវារាទិ

ហេតុ-អារម្មណបច្ចយា

១៤. អកុសលំ សំកិលិដ្ឋំ ធម្មំ បដិច្ច អកុសលោ សំកិលិដ្ឋោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

១៥. កុសលំ អសំកិលិដ្ឋំ ធម្មំ បដិច្ច កុសលោ អសំកិលិដ្ឋោ ធម្មោ ឧប្បជ្ជតិ ហេតុបច្ចយា. កុសលំ អសំកិលិដ្ឋំ ធម្មំ បដិច្ច អព្យាកតោ អសំកិលិដ្ឋោ ធម្មោ ឧប្បជ្ជតិ ហេតុបច្ចយា. កុសលំ អសំកិលិដ្ឋំ ធម្មំ បដិច្ច កុសលោ អសំកិលិដ្ឋោ ច អព្យាកតោ អសំកិលិដ្ឋោ ច ធម្មា ឧប្បជ្ជន្តិ ហេតុបច្ចយា. (៣)

អព្យាកតំ អសំកិលិដ្ឋំ ធម្មំ បដិច្ច អព្យាកតោ អសំកិលិដ្ឋោ ធម្មោ ឧប្បជ្ជតិ ហេតុបច្ចយា. កុសលំ អសំកិលិដ្ឋញ្ច អព្យាកតំ អសំកិលិដ្ឋញ្ច ធម្មំ បដិច្ច អព្យាកតោ អសំកិលិដ្ឋោ ធម្មោ ឧប្បជ្ជតិ ហេតុបច្ចយា. (២)

១៦. កុសលំ អសំកិលិដ្ឋំ ធម្មំ បដិច្ច កុសលោ អសំកិលិដ្ឋោ ធម្មោ ឧប្បជ្ជតិ អារម្មណបច្ចយា. (១)

អព្យាកតំ អសំកិលិដ្ឋំ ធម្មំ បដិច្ច អព្យាកតោ អសំកិលិដ្ឋោ ធម្មោ ឧប្បជ្ជតិ អារម្មណបច្ចយា. (១) (សំខិត្តំ.)

១៧. ហេតុយា បញ្ច, អារម្មណេ ទ្វេ, អធិបតិយា បញ្ច…បេ… អវិគតេ បញ្ច (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

១៨. កុសលោ អសំកិលិដ្ឋោ ធម្មោ កុសលស្ស អសំកិលិដ្ឋស្ស ធម្មស្ស ហេតុបច្ចយេន បច្ចយោ… តីណិ.

អព្យាកតោ អសំកិលិដ្ឋោ ធម្មោ អព្យាកតស្ស អសំកិលិដ្ឋស្ស ធម្មស្ស ហេតុបច្ចយេន បច្ចយោ. (១)

កុសលោ អសំកិលិដ្ឋោ ធម្មោ កុសលស្ស អសំកិលិដ្ឋស្ស ធម្មស្ស អារម្មណបច្ចយេន បច្ចយោ… ទ្វេ.

អព្យាកតោ អសំកិលិដ្ឋោ ធម្មោ អព្យាកតស្ស អសំកិលិដ្ឋស្ស ធម្មស្ស អារម្មណបច្ចយេន បច្ចយោ… ទ្វេ (សំខិត្តំ).

១៩. ហេតុយា ចត្តារិ, អារម្មណេ ចត្តារិ, អធិបតិយា បញ្ច, អនន្តរេ ចត្តារិ…បេ… ឧបនិស្សយេ ចត្តារិ…បេ… អវិគតេ សត្ត (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

១-៧៨. កុសលត្តិក-កិលេសសម្បយុត្តទុកំ

១-៧. បដិច្ចវារាទិ

ហេតុបច្ចយោ

២០. អកុសលំ កិលេសសម្បយុត្តំ ធម្មំ បដិច្ច អកុសលោ កិលេសសម្បយុត្តោ ធម្មោ ឧប្បជ្ជតិ ហេតុបច្ចយា (សំកិលិដ្ឋទុកសទិសំ).

១-៧៩. កុសលត្តិក-កិលេសសំកិលេសិកទុកំ

១-៧. បដិច្ចវារាទិ

ហេតុបច្ចយោ

២១. អកុសលំ កិលេសញ្ចេវ សំកិលេសិកញ្ច ធម្មំ បដិច្ច អកុសលោ កិលេសោ ចេវ សំកិលេសិកោ ច ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

២២. កុសលំ សំកិលេសិកញ្ចេវ នោ ច កិលេសំ ធម្មំ បដិច្ច កុសលោ សំកិលេសិកោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា… តីណិ.

អកុសលំ សំកិលេសិកញ្ចេវ នោ ច កិលេសំ ធម្មំ បដិច្ច អកុសលោ សំកិលេសិកោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា… តីណិ.

អព្យាកតំ សំកិលេសិកញ្ចេវ នោ ច កិលេសំ ធម្មំ បដិច្ច អព្យាកតោ សំកិលេសិកោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា.

កុសលំ សំកិលេសិកញ្ចេវ នោ ច កិលេសញ្ច អព្យាកតំ សំកិលេសិកញ្ចេវ នោ ច កិលេសញ្ច ធម្មំ បដិច្ច អព្យាកតោ សំកិលេសិកោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា. (១)

អកុសលំ សំកិលេសិកញ្ចេវ នោ ច កិលេសញ្ច អព្យាកតំ សំកិលេសិកញ្ចេវ នោ ច កិលេសញ្ច ធម្មំ បដិច្ច អព្យាកតោ សំកិលេសិកោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា (សំខិត្តំ).

២៣. ហេតុយា នវ, អារម្មណេ តីណិ…បេ… អវិគតេ នវ (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

២៤. កុសលោ សំកិលេសិកោ ចេវ នោ ច កិលេសោ ធម្មោ កុសលស្ស សំកិលេសិកស្ស ចេវ នោ ច កិលេសស្ស ធម្មស្ស ហេតុបច្ចយេន បច្ចយោ… តីណិ.

អព្យាកតោ សំកិលេសិកោ ចេវ នោ ច កិលេសោ ធម្មោ អព្យាកតស្ស សំកិលេសិកស្ស ចេវ នោ ច កិលេសស្ស ធម្មស្ស ហេតុបច្ចយេន បច្ចយោ. (១) (សំខិត្តំ.)

២៥. ហេតុយា ចត្តារិ, អារម្មណេ នវ, អធិបតិយា នវ…បេ… អវិគតេ តេរស (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

១-៨០. កុសលត្តិក-កិលេសសំកិលិដ្ឋទុកំ

១-៧. បដិច្ចវារាទិ

ហេតុបច្ចយោ

២៦. អកុសលំ កិលេសញ្ចេវ សំកិលិដ្ឋញ្ច ធម្មំ បដិច្ច អកុសលោ កិលេសោ ចេវ សំកិលិដ្ឋោ ច ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ).

២៧. អកុសលំ សំកិលិដ្ឋញ្ចេវ នោ ច កិលេសំ ធម្មំ បដិច្ច អកុសលោ សំកិលិដ្ឋោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា.

ហេតុយា ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

១-៨១. កុសលត្តិក-កិលេសកិលេសសម្បយុត្តទុកំ

១-៧. បដិច្ចវារាទិ

ហេតុបច្ចយោ

២៨. អកុសលំ កិលេសញ្ចេវ កិលេសសម្បយុត្តញ្ច ធម្មំ បដិច្ច អកុសលោ កិលេសោ ចេវ កិលេសសម្បយុត្តោ ច ធម្មោ ឧប្បជ្ជតិ ហេតុបច្ចយា.

ហេតុយា ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

២៩. អកុសលំ កិលេសសម្បយុត្តញ្ចេវ នោ ច កិលេសំ ធម្មំ បដិច្ច អកុសលោ កិលេសសម្បយុត្តោ ចេវ នោ ច កិលេសោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

១-៨២. កុសលត្តិក-កិលេសវិប្បយុត្តសំកិលេសិកទុកំ

១-៧. បដិច្ចវារាទិ

ហេតុបច្ចយោ

៣០. កុសលំ កិលេសវិប្បយុត្តំ សំកិលេសិកំ ធម្មំ បដិច្ច កុសលោ កិលេសវិប្បយុត្តោ សំកិលេសិកោ ធម្មោ ឧប្បជ្ជតិ ហេតុបច្ចយា. កុសលំ កិលេសវិប្បយុត្តំ សំកិលេសិកំ ធម្មំ បដិច្ច អព្យាកតោ កិលេសវិប្បយុត្តោ សំកិលេសិកោ ធម្មោ ឧប្បជ្ជតិ ហេតុបច្ចយា. កុសលំ កិលេសវិប្បយុត្តំ សំកិលេសិកំ ធម្មំ បដិច្ច កុសលោ កិលេសវិប្បយុត្តោ សំកិលេសិកោ ច អព្យាកតោ កិលេសវិប្បយុត្តោ សំកិលេសិកោ ច ធម្មា ឧប្បជ្ជន្តិ ហេតុបច្ចយា. (៣)

អព្យាកតំ កិលេសវិប្បយុត្តំ សំកិលេសិកំ ធម្មំ បដិច្ច អព្យាកតោ កិលេសវិប្បយុត្តោ សំកិលេសិកោ ធម្មោ ឧប្បជ្ជតិ ហេតុបច្ចយា. (១)

កុសលំ កិលេសវិប្បយុត្តំ សំកិលេសិកញ្ច អព្យាកតំ កិលេសវិប្បយុត្តំ សំកិលេសិកញ្ច ធម្មំ បដិច្ច អព្យាកតោ កិលេសវិប្បយុត្តោ សំកិលេសិកោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៣១. ហេតុយា បញ្ច, អារម្មណេ ទ្វេ…បេ… អវិគតេ បញ្ច (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

៣២. កុសលោ កិលេសវិប្បយុត្តោ សំកិលេសិកោ ធម្មោ កុសលស្ស កិលេសវិប្បយុត្តស្ស សំកិលេសិកស្ស ធម្មស្ស ហេតុបច្ចយេន បច្ចយោ… តីណិ.

អព្យាកតោ កិលេសវិប្បយុត្តោ សំកិលេសិកោ ធម្មោ អព្យាកតស្ស កិលេសវិប្បយុត្តស្ស សំកិលេសិកស្ស ធម្មស្ស ហេតុបច្ចយេន បច្ចយោ. (១) (សំខិត្តំ.)

៣៣. ហេតុយា ចត្តារិ, អារម្មណេ ចត្តារិ…បេ… អវិគតេ សត្ត (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

៣៤. កុសលំ កិលេសវិប្បយុត្តំ អសំកិលេសិកំ ធម្មំ បដិច្ច កុសលោ កិលេសវិប្បយុត្តោ អសំកិលេសិកោ ធម្មោ ឧប្បជ្ជតិ ហេតុបច្ចយា.

អព្យាកតំ កិលេសវិប្បយុត្តំ អសំកិលេសិកំ ធម្មំ បដិច្ច អព្យាកតោ កិលេសវិប្បយុត្តោ អសំកិលេសិកោ ធម្មោ ឧប្បជ្ជតិ ហេតុបច្ចយា.

ហេតុយា ទ្វេ…បេ… អវិគតេ ទ្វេ (សំខិត្តំ. សហជាតវារម្បិ …បេ… សម្បយុត្តវារម្បិ បដិច្ចវារសទិសំ).

៣៥. កុសលោ កិលេសវិប្បយុត្តោ អសំកិលេសិកោ ធម្មោ កុសលស្ស កិលេសវិប្បយុត្តស្ស អសំកិលេសិកស្ស ធម្មស្ស ហេតុបច្ចយេន បច្ចយោ. (១)

អព្យាកតោ កិលេសវិប្បយុត្តោ អសំកិលេសិកោ ធម្មោ អព្យាកតស្ស កិលេសវិប្បយុត្តស្ស អសំកិលេសិកស្ស ធម្មស្ស ហេតុបច្ចយេន បច្ចយោ. (១) (សំខិត្តំ.)

៣៦. ហេតុយា ទ្វេ, អារម្មណេ ទ្វេ, អធិបតិយា តីណិ, អនន្តរេ ទ្វេ…បេ… ឧបនិស្សយេ ចត្តារិ…បេ… អវិគតេ ទ្វេ (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

កុសលត្តិកកិលេសគោច្ឆកំ និដ្ឋិតំ.