១-៥៥. កុសលត្តិក-សារម្មណទុកំ

១-៧. បដិច្ចវារាទិ

បច្ចយចតុក្កំ

១. កុសលំ សារម្មណំ ធម្មំ បដិច្ច កុសលោ សារម្មណោ ធម្មោ ឧប្បជ្ជតិ ហេតុបច្ចយា. (១)

អកុសលំ សារម្មណំ ធម្មំ បដិច្ច អកុសលោ សារម្មណោ ធម្មោ ឧប្បជ្ជតិ ហេតុបច្ចយា. (១)

អព្យាកតំ សារម្មណំ ធម្មំ បដិច្ច អព្យាកតោ សារម្មណោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

២. ហេតុយា តីណិ, អារម្មណេ តីណិ…បេ… អវិគតេ តីណិ (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

ហេតុ-អារម្មណបច្ចយា

៣. កុសលោ សារម្មណោ ធម្មោ កុសលស្ស សារម្មណស្ស ធម្មស្ស ហេតុបច្ចយេន បច្ចយោ. (១)

អកុសលោ សារម្មណោ ធម្មោ អកុសលស្ស សារម្មណស្ស ធម្មស្ស ហេតុបច្ចយេន បច្ចយោ. (១)

អព្យាកតោ សារម្មណោ ធម្មោ អព្យាកតស្ស សារម្មណស្ស ធម្មស្ស ហេតុបច្ចយេន បច្ចយោ. (១)

កុសលោ សារម្មណោ ធម្មោ កុសលស្ស សារម្មណស្ស ធម្មស្ស អារម្មណបច្ចយេន បច្ចយោ (សំខិត្តំ).

៤. ហេតុយា តីណិ, អារម្មណេ នវ, អធិបតិយា សត្ត…បេ… អវិគតេ តីណិ (សំខិត្តំ).

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)

ហេតុសហជាតបច្ចយាទិ

៥. អព្យាកតំ អនារម្មណំ ធម្មំ បដិច្ច អព្យាកតោ អនារម្មណោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ…បេ… អវិគតេ ឯកំ (សំខិត្តំ).

នហេតុយា ឯកំ…បេ… (សំខិត្តំ).

(សហជាតវារម្បិ…បេ… សម្បយុត្តវារម្បិ បដិច្ចវារសទិសំ.)

៦. អព្យាកតោ អនារម្មណោ ធម្មោ អព្យាកតស្ស អនារម្មណស្ស ធម្មស្ស សហជាតបច្ចយេន បច្ចយោ… អញ្ញមញ្ញបច្ចយេន បច្ចយោ… និស្សយបច្ចយេន បច្ចយោ… អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… អត្ថិបច្ចយេន បច្ចយោ… អវិគតបច្ចយេន បច្ចយោ (សព្ពត្ថ ឯកំ. សំខិត្តំ.)

១-៥៦. កុសលត្តិក-ចិត្តទុកំ

១-៧. បដិច្ចវារាទិ

បច្ចយចតុក្កំ

៧. កុសលោ ចិត្តោ ធម្មោ កុសលស្ស ចិត្តស្ស ធម្មស្ស អារម្មណបច្ចយេន បច្ចយោ (សំខិត្តំ).

អារម្មណេ នវ, អធិបតិយា សត្ត (សំខិត្តំ).

នហេតុយា នវ, នអារម្មណេ នវ (សំខិត្តំ).

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)

៨. កុសលំ នោចិត្តំ ធម្មំ បដិច្ច កុសលោ នោចិត្តោ ធម្មោ ឧប្បជ្ជតិ ហេតុបច្ចយា… តីណិ.

អកុសលំ នោចិត្តំ ធម្មំ បដិច្ច អកុសលោ នោចិត្តោ ធម្មោ ឧប្បជ្ជតិ ហេតុបច្ចយា… តីណិ.

អព្យាកតំ នោចិត្តំ ធម្មំ បដិច្ច អព្យាកតោ នោចិត្តោ ធម្មោ ឧប្បជ្ជតិ ហេតុបច្ចយា. (១)

កុសលំ នោចិត្តញ្ច អព្យាកតំ នោចិត្តញ្ច ធម្មំ បដិច្ច អព្យាកតោ នោចិត្តោ ធម្មោ ឧប្បជ្ជតិ ហេតុបច្ចយា. (១)

អកុសលំ នោចិត្តញ្ច អព្យាកតំ នោចិត្តញ្ច ធម្មំ បដិច្ច អព្យាកតោ នោចិត្តោ ធម្មោ ឧប្បជ្ជតិ ហេតុបច្ចយា. (១)

កុសលំ នោចិត្តំ ធម្មំ បដិច្ច កុសលោ នោចិត្តោ ធម្មោ ឧប្បជ្ជតិ អារម្មណបច្ចយា (សំខិត្តំ).

៩. ហេតុយា នវ, អារម្មណេ តីណិ, អធិបតិយា នវ…បេ… អវិគតេ នវ (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

១០. កុសលោ នោចិត្តោ ធម្មោ កុសលស្ស នោចិត្តស្ស ធម្មស្ស ហេតុបច្ចយេន បច្ចយោ (សំខិត្តំ).

ហេតុយា សត្ត, អារម្មណេ នវ, អធិបតិយា ទស…បេ… អវិគតេ តេរស (សំខិត្តំ).

១-៥៧. កុសលត្តិក-ចេតសិកទុកំ

១-៧. បដិច្ចវារាទិ

បច្ចយចតុក្កំ

១១. កុសលំ ចេតសិកំ ធម្មំ បដិច្ច កុសលោ ចេតសិកោ ធម្មោ ឧប្បជ្ជតិ ហេតុបច្ចយា. (១)

អកុសលំ ចេតសិកំ ធម្មំ បដិច្ច អកុសលោ ចេតសិកោ ធម្មោ ឧប្បជ្ជតិ ហេតុបច្ចយា. (១)

អព្យាកតំ ចេតសិកំ ធម្មំ បដិច្ច អព្យាកតោ ចេតសិកោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១២. ហេតុយា តីណិ, អារម្មណេ តីណិ…បេ… (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

ហេតុ-អារម្មណបច្ចយា

១៣. កុសលោ ចេតសិកោ ធម្មោ កុសលស្ស ចេតសិកស្ស ធម្មស្ស ហេតុបច្ចយេន បច្ចយោ. (១)

អកុសលោ ចេតសិកោ ធម្មោ អកុសលស្ស ចេតសិកស្ស ធម្មស្ស ហេតុបច្ចយេន បច្ចយោ. (១)

អព្យាកតោ ចេតសិកោ ធម្មោ អព្យាកតស្ស ចេតសិកស្ស ធម្មស្ស ហេតុបច្ចយេន បច្ចយោ. (១)

កុសលោ ចេតសិកោ ធម្មោ កុសលស្ស ចេតសិកស្ស ធម្មស្ស អារម្មណបច្ចយេន បច្ចយោ… តីណិ.

អកុសលោ ចេតសិកោ ធម្មោ អកុសលស្ស ចេតសិកស្ស ធម្មស្ស អារម្មណបច្ចយេន បច្ចយោ… តីណិ.

អព្យាកតោ ចេតសិកោ ធម្មោ អព្យាកតស្ស ចេតសិកស្ស ធម្មស្ស អារម្មណបច្ចយេន បច្ចយោ… តីណិ (សំខិត្តំ).

១៤. ហេតុយា តីណិ, អារម្មណេ នវ, អធិបតិយា សត្ត…បេ… អវិគតេ តីណិ (សំខិត្តំ).

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)

១៥. កុសលំ អចេតសិកំ ធម្មំ បដិច្ច អព្យាកតោ អចេតសិកោ ធម្មោ ឧប្បជ្ជតិ ហេតុបច្ចយា. (១)

អកុសលំ អចេតសិកំ ធម្មំ បដិច្ច អព្យាកតោ អចេតសិកោ ធម្មោ ឧប្បជ្ជតិ ហេតុបច្ចយា. (១)

អព្យាកតំ អចេតសិកំ ធម្មំ បដិច្ច អព្យាកតោ អចេតសិកោ ធម្មោ ឧប្បជ្ជតិ ហេតុបច្ចយា. (១)

កុសលំ អចេតសិកញ្ច អព្យាកតំ អចេតសិកញ្ច ធម្មំ បដិច្ច អព្យាកតោ អចេតសិកោ ធម្មោ ឧប្បជ្ជតិ ហេតុបច្ចយា. (១)

អកុសលំ អចេតសិកញ្ច អព្យាកតំ អចេតសិកញ្ច ធម្មំ បដិច្ច អព្យាកតោ អចេតសិកោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១៦. ហេតុយា បញ្ច, អារម្មណេ ឯកំ…បេ… អវិគតេ បញ្ច.

នហេតុយា ឯកំ, នអារម្មណេ បញ្ច, នោវិគតេ បញ្ច.

(សហជាតវារម្បិ…បេ… បញ្ហាវារម្បិ ឯវំ វិត្ថារេតព្ពំ.)

១-៥៨-៦៥. កុសលត្តិក-ចិត្តសម្បយុត្តាទិទុកានិ

១-៧. បដិច្ចវារាទិ

១៧. កុសលំ ចិត្តសម្បយុត្តំ ធម្មំ បដិច្ច…បេ… កុសលំ ចិត្តសំសដ្ឋំ ធម្មំ បដិច្ច…បេ… កុសលំ ចិត្តសមុដ្ឋានំ ធម្មំ បដិច្ច…បេ… កុសលំ ចិត្តសហភុំ ធម្មំ បដិច្ច…បេ… កុសលំ ចិត្តានុបរិវត្តិំ ធម្មំ បដិច្ច…បេ… កុសលំ ចិត្តសំសដ្ឋសមុដ្ឋានំ ធម្មំ បដិច្ច…បេ… កុសលំ ចិត្តសំសដ្ឋសមុដ្ឋានសហភុំ ធម្មំ បដិច្ច…បេ… កុសលំ ចិត្តសំសដ្ឋសមុដ្ឋានានុបរិវត្តិំ ធម្មំ បដិច្ច កុសលោ ចិត្តសំសដ្ឋសមុដ្ឋានានុបរិវត្តិ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា តីណិ, អារម្មណេ តីណិ…បេ… អវិគតេ តីណិ (សំខិត្តំ. សហជាតវារម្បិ…បេ… សម្បយុត្តវារម្បិ បញ្ហាវារម្បិ ឯវំ វិត្ថារេតព្ពំ).

១-៦៦. កុសលត្តិក-អជ្ឈត្តិកទុកំ

១-៧. បដិច្ចវារាទិ

បច្ចយចតុក្កំ

១៨. អព្យាកតំ អជ្ឈត្តិកំ ធម្មំ បដិច្ច អព្យាកតោ អជ្ឈត្តិកោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ, សហជាតេ ឯកំ…បេ… អវិគតេ ឯកំ (សំខិត្តំ).

(សហជាតវារម្បិ…បេ… សម្បយុត្តវារម្បិ បដិច្ចវារសទិសំ.)

១៩. កុសលោ អជ្ឈត្តិកោ ធម្មោ កុសលស្ស អជ្ឈត្តិកស្ស ធម្មស្ស អារម្មណបច្ចយេន បច្ចយោ. កុសលោ អជ្ឈត្តិកោ ធម្មោ អកុសលស្ស អជ្ឈត្តិកស្ស ធម្មស្ស អារម្មណបច្ចយេន បច្ចយោ. កុសលោ អជ្ឈត្តិកោ ធម្មោ អព្យាកតស្ស អជ្ឈត្តិកស្ស ធម្មស្ស អារម្មណបច្ចយេន បច្ចយោ. (៣)

អកុសលោ អជ្ឈត្តិកោ ធម្មោ អកុសលស្ស អជ្ឈត្តិកស្ស ធម្មស្ស អារម្មណបច្ចយេន បច្ចយោ… តីណិ.

អព្យាកតោ អជ្ឈត្តិកោ ធម្មោ អព្យាកតស្ស អជ្ឈត្តិកស្ស ធម្មស្ស អារម្មណបច្ចយេន បច្ចយោ… តីណិ (សំខិត្តំ).

២០. អារម្មណេ នវ, បុរេជាតេ តីណិ…បេ… អវិគតេ បញ្ច (សំខិត្តំ. យថា កុសលត្តិកេ បញ្ហាវារំ, ឯវំ វិត្ថារេតព្ពំ).

២១. កុសលំ ពាហិរំ ធម្មំ បដិច្ច កុសលោ ពាហិរោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា នវ, អារម្មណេ តីណិ…បេ… វិបាកេ ឯកំ…បេ… អវិគតេ នវ (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

២២. កុសលោ ពាហិរោ ធម្មោ កុសលស្ស ពាហិរស្ស ធម្មស្ស ហេតុបច្ចយេន បច្ចយោ (សំខិត្តំ).

ហេតុយា សត្ត, អារម្មណេ នវ…បេ… អវិគតេ តេរស (សំខិត្តំ).

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)

១-៦៧. កុសលត្តិក-ឧបាទាទុកំ

១-៧. បដិច្ចវារាទិ

បច្ចយចតុក្កំ

២៣. អព្យាកតោ ឧបាទា ធម្មោ អព្យាកតស្ស ឧបាទា ធម្មស្ស អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… អត្ថិបច្ចយេន បច្ចយោ… អវិគតបច្ចយេន បច្ចយោ.

អាហារេ ឯកំ, ឥន្ទ្រិយេ អត្ថិយា អវិគតេ ឯកំ (សំខិត្តំ).

២៤. កុសលំ នោឧបាទា ធម្មំ បដិច្ច កុសលោ នោឧបាទា ធម្មោ ឧប្បជ្ជតិ ហេតុបច្ចយា… តីណិ.

អកុសលំ នោឧបាទា ធម្មំ បដិច្ច អកុសលោ នោឧបាទា ធម្មោ ឧប្បជ្ជតិ ហេតុបច្ចយា… តីណិ.

អព្យាកតំ នោឧបាទា ធម្មំ បដិច្ច អព្យាកតោ នោឧបាទា ធម្មោ ឧប្បជ្ជតិ ហេតុបច្ចយា. (១)

កុសលំ នោឧបាទា ច អព្យាកតំ នោឧបាទា ច ធម្មំ បដិច្ច អព្យាកតោ នោឧបាទា ធម្មោ ឧប្បជ្ជតិ ហេតុបច្ចយា. (១)

អកុសលំ នោឧបាទា ច អព្យាកតំ នោឧបាទា ច ធម្មំ បដិច្ច អព្យាកតោ នោឧបាទា ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

២៥. ហេតុយា នវ… (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

២៦. កុសលោ នោឧបាទា ធម្មោ កុសលស្ស នោឧបាទា ធម្មស្ស ហេតុបច្ចយេន បច្ចយោ… តីណិ.

អកុសលោ នោឧបាទា ធម្មោ អកុសលស្ស នោឧបាទា ធម្មស្ស ហេតុបច្ចយេន បច្ចយោ… តីណិ.

អព្យាកតោ នោឧបាទា ធម្មោ អព្យាកតស្ស នោឧបាទា ធម្មស្ស ហេតុបច្ចយេន បច្ចយោ. (១)

២៧. កុសលោ នោឧបាទា ធម្មោ កុសលស្ស នោឧបាទា ធម្មស្ស អារម្មណបច្ចយេន បច្ចយោ… តីណិ.

អកុសលោ នោឧបាទា ធម្មោ អកុសលស្ស នោឧបាទា ធម្មស្ស អារម្មណបច្ចយេន បច្ចយោ… តីណិ.

អព្យាកតោ នោឧបាទា ធម្មោ អព្យាកតស្ស នោឧបាទា ធម្មស្ស អារម្មណបច្ចយេន បច្ចយោ… តីណិ (សំខិត្តំ).

២៨. ហេតុយា សត្ត, អារម្មណេ នវ, អធិបតិយា ទស…បេ… អវិគតេ ឯកាទស (សំខិត្តំ).

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)

១-៦៨. កុសលត្តិក-ឧបាទិន្នទុកំ

១-៧. បដិច្ចវារាទិ

បច្ចយចតុក្កំ

២៩. អព្យាកតំ ឧបាទិន្នំ ធម្មំ បដិច្ច អព្យាកតោ ឧបាទិន្នោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

៣០. កុសលំ អនុបាទិន្នំ ធម្មំ បដិច្ច កុសលោ អនុបាទិន្នោ ធម្មោ ឧប្បជ្ជតិ ហេតុបច្ចយា… តីណិ.

អកុសលំ អនុបាទិន្នំ ធម្មំ បដិច្ច អកុសលោ អនុបាទិន្នោ ធម្មោ ឧប្បជ្ជតិ ហេតុបច្ចយា… តីណិ.

អព្យាកតំ អនុបាទិន្នំ ធម្មំ បដិច្ច អព្យាកតោ អនុបាទិន្នោ ធម្មោ ឧប្បជ្ជតិ ហេតុបច្ចយា. (១)

កុសលំ អនុបាទិន្នញ្ច អព្យាកតំ អនុបាទិន្នញ្ច ធម្មំ បដិច្ច អព្យាកតោ អនុបាទិន្នោ ធម្មោ ឧប្បជ្ជតិ ហេតុបច្ចយា. (១)

អកុសលំ អនុបាទិន្នញ្ច អព្យាកតំ អនុបាទិន្នញ្ច ធម្មំ បដិច្ច អព្យាកតោ អនុបាទិន្នោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៣១. ហេតុយា នវ, អារម្មណេ តីណិ…បេ… អវិគតេ នវ (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ).

ហេតុ-អារម្មណបច្ចយា

៣២. កុសលោ អនុបាទិន្នោ ធម្មោ កុសលស្ស អនុបាទិន្នស្ស ធម្មស្ស ហេតុបច្ចយេន បច្ចយោ… តីណិ.

អកុសលោ អនុបាទិន្នោ ធម្មោ អកុសលស្ស អនុបាទិន្នស្ស ធម្មស្ស ហេតុបច្ចយេន បច្ចយោ… តីណិ.

អព្យាកតោ អនុបាទិន្នោ ធម្មោ អព្យាកតស្ស អនុបាទិន្នស្ស ធម្មស្ស ហេតុបច្ចយេន បច្ចយោ. (១)

៣៣. កុសលោ អនុបាទិន្នោ ធម្មោ កុសលស្ស អនុបាទិន្នស្ស ធម្មស្ស អារម្មណបច្ចយេន បច្ចយោ… តីណិ.

អកុសលោ អនុបាទិន្នោ ធម្មោ អកុសលស្ស អនុបាទិន្នស្ស ធម្មស្ស អារម្មណបច្ចយេន បច្ចយោ… តីណិ.

អព្យាកតោ អនុបាទិន្នោ ធម្មោ អព្យាកតស្ស អនុបាទិន្នស្ស ធម្មស្ស អារម្មណបច្ចយេន បច្ចយោ. អព្យាកតោ អនុបាទិន្នោ ធម្មោ កុសលស្ស អនុបាទិន្នស្ស ធម្មស្ស អារម្មណបច្ចយេន បច្ចយោ. អព្យាកតោ អនុបាទិន្នោ ធម្មោ អកុសលស្ស អនុបាទិន្នស្ស ធម្មស្ស អារម្មណបច្ចយេន បច្ចយោ… តីណិ (សំខិត្តំ).

៣៤. ហេតុយា សត្ត, អារម្មណេ នវ, អធិបតិយា ទស, អនន្តរេ ឆ…បេ… សហជាតេ នវ, និស្សយេ នវ, ឧបនិស្សយេ នវ…បេ… អវិគតេ ឯកាទស (សំខិត្តំ).

កុសលត្តិកមហន្តរទុកំ និដ្ឋិតំ.

១-៦៩-៧៤. កុសលត្តិក-ឧបាទានាទិទុកានិ

៣៥. អកុសលំ ឧបាទានំ ធម្មំ បដិច្ច អកុសលោ ឧបាទានោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ, អារម្មណេ ឯកំ…បេ… អវិគតេ ឯកំ (ឧបាទានគោច្ឆកំ វិត្ថារេតព្ពំ).

កុសលត្តិកឧបាទានគោច្ឆកំ និដ្ឋិតំ.