៧. បញ្ហាវារោ

បច្ចយចតុក្កំ

២១០. បច្ចុប្បន្នោ ហេតុ ធម្មោ បច្ចុប្បន្នស្ស ហេតុស្ស ធម្មស្ស ហេតុបច្ចយេន បច្ចយោ. (១)

អតីតោ ហេតុ ធម្មោ បច្ចុប្បន្នស្ស ហេតុស្ស ធម្មស្ស អារម្មណបច្ចយេន បច្ចយោ. អនាគតោ ហេតុ ធម្មោ បច្ចុប្បន្នស្ស ហេតុស្ស ធម្មស្ស អារម្មណបច្ចយេន បច្ចយោ. (២) (សំខិត្តំ.)

២១១. ហេតុយា ឯកំ, អារម្មណេ ទ្វេ, អធិបតិយា តីណិ…បេ… សហជាតេ ឯកំ, អញ្ញមញ្ញេ ឯកំ, និស្សយេ ឯកំ, ឧបនិស្សយេ ទ្វេ…បេ… វិបាកេ ឯកំ, ឥន្ទ្រិយេ ឯកំ, មគ្គេ ឯកំ, សម្បយុត្តេ ឯកំ, អត្ថិយា ឯកំ…បេ… អវិគតេ ឯកំ (សំខិត្តំ).

នហេតុយា ទ្វេ, នអារម្មណេ ទ្វេ (សំខិត្តំ).

ហេតុបច្ចយា នអារម្មណេ ឯកំ (សំខិត្តំ).

នហេតុបច្ចយា អារម្មណេ ទ្វេ (សំខិត្តំ).

នហេតុបទំ

អារម្មណបច្ចយោ

២១២. អតីតោ នហេតុ ធម្មោ បច្ចុប្បន្នស្ស នហេតុស្ស ធម្មស្ស អារម្មណបច្ចយេន បច្ចយោ. (១)

អនាគតោ នហេតុ ធម្មោ បច្ចុប្បន្នស្ស នហេតុស្ស ធម្មស្ស អារម្មណបច្ចយេន បច្ចយោ. (១)

បច្ចុប្បន្នោ នហេតុ ធម្មោ បច្ចុប្បន្នស្ស នហេតុស្ស ធម្មស្ស អារម្មណបច្ចយេន បច្ចយោ. (១) (សំខិត្តំ.)

២១៣. អារម្មណេ តីណិ, អធិបតិយា តីណិ…បេ… សហជាតេ ឯកំ, អញ្ញមញ្ញេ ឯកំ, និស្សយេ ឯកំ, ឧបនិស្សយេ តីណិ…បេ… អាសេវនេ ឯកំ, កម្មេ ទ្វេ, វិបាកេ ឯកំ…បេ… ឥន្ទ្រិយេ ឯកំ, មគ្គេ ឯកំ, សម្បយុត្តេ ឯកំ, អត្ថិយា ឯកំ…បេ… អវិគតេ ឯកំ (សំខិត្តំ).

នហេតុយា តីណិ, នអារម្មណេ តីណិ (សំខិត្តំ).

អារម្មណបច្ចយា នហេតុយា តីណិ (សំខិត្តំ).

នហេតុបច្ចយា អារម្មណេ តីណិ (សំខិត្តំ).