៧. បញ្ហាវារោ

បច្ចយចតុក្កំ

ហេតុអារម្មណបច្ចយាទិ

៦៦. សំកិលិដ្ឋសំកិលេសិកោ ហេតុ ធម្មោ សំកិលិដ្ឋសំកិលេសិកស្ស ហេតុស្ស ធម្មស្ស ហេតុបច្ចយេន បច្ចយោ. (១)

អសំកិលិដ្ឋសំកិលេសិកោ ហេតុ ធម្មោ អសំកិលិដ្ឋសំកិលេសិកស្ស ហេតុស្ស ធម្មស្ស ហេតុបច្ចយេន បច្ចយោ. (១)

អសំកិលិដ្ឋអសំកិលេសិកោ ហេតុ ធម្មោ អសំកិលិដ្ឋអសំកិលេសិកស្ស ហេតុស្ស ធម្មស្ស ហេតុបច្ចយេន បច្ចយោ. (១)

៦៧. សំកិលិដ្ឋសំកិលេសិកោ ហេតុ ធម្មោ សំកិលិដ្ឋសំកិលេសិកស្ស ហេតុស្ស ធម្មស្ស អារម្មណបច្ចយេន បច្ចយោ… ទ្វេ.

អសំកិលិដ្ឋសំកិលេសិកោ ហេតុ ធម្មោ អសំកិលិដ្ឋសំកិលេសិកស្ស ហេតុស្ស ធម្មស្ស អារម្មណបច្ចយេន បច្ចយោ… ទ្វេ.

អសំកិលិដ្ឋអសំកិលេសិកោ ហេតុ ធម្មោ អសំកិលិដ្ឋសំកិលេសិកស្ស ហេតុស្ស ធម្មស្ស អារម្មណបច្ចយេន បច្ចយោ. (១)

៦៨. សំកិលិដ្ឋសំកិលេសិកោ ហេតុ ធម្មោ សំកិលិដ្ឋសំកិលេសិកស្ស ហេតុស្ស ធម្មស្ស អធិបតិបច្ចយេន បច្ចយោ. (១)

អសំកិលិដ្ឋសំកិលេសិកោ ហេតុ ធម្មោ អសំកិលិដ្ឋសំកិលេសិកស្ស ហេតុស្ស ធម្មស្ស អធិបតិបច្ចយេន បច្ចយោ. អសំកិលិដ្ឋសំកិលេសិកោ ហេតុ ធម្មោ សំកិលិដ្ឋសំកិលេសិកស្ស ហេតុស្ស ធម្មស្ស អធិបតិបច្ចយេន បច្ចយោ. (២)

អសំកិលិដ្ឋអសំកិលេសិកោ ហេតុ ធម្មោ អសំកិលិដ្ឋអសំកិលេសិកស្ស ហេតុស្ស ធម្មស្ស អធិបតិបច្ចយេន បច្ចយោ… ទ្វេ.

៦៩. សំកិលិដ្ឋសំកិលេសិកោ ហេតុ ធម្មោ សំកិលិដ្ឋសំកិលេសិកស្ស ហេតុស្ស ធម្មស្ស អនន្តរបច្ចយេន បច្ចយោ… ឆ…បេ….

សំកិលិដ្ឋសំកិលេសិកោ ហេតុ ធម្មោ សំកិលិដ្ឋសំកិលេសិកស្ស ហេតុស្ស ធម្មស្ស ឧបនិស្សយបច្ចយេន បច្ចយោ. សំកិលិដ្ឋសំកិលេសិកោ ហេតុ ធម្មោ អសំកិលិដ្ឋសំកិលេសិកស្ស ហេតុស្ស ធម្មស្ស ឧបនិស្សយបច្ចយេន បច្ចយោ. សំកិលិដ្ឋសំកិលេសិកោ ហេតុ ធម្មោ អសំកិលិដ្ឋអសំកិលេសិកស្ស ហេតុស្ស ធម្មស្ស ឧបនិស្សយបច្ចយេន បច្ចយោ. (១)

អសំកិលិដ្ឋសំកិលេសិកោ ហេតុ ធម្មោ អសំកិលិដ្ឋសំកិលេសិកស្ស ហេតុស្ស ធម្មស្ស ឧបនិស្សយបច្ចយេន បច្ចយោ… តីណិ.

អសំកិលិដ្ឋអសំកិលេសិកោ ហេតុ ធម្មោ អសំកិលិដ្ឋអសំកិលេសិកស្ស ហេតុស្ស ធម្មស្ស ឧបនិស្សយបច្ចយេន បច្ចយោ… ទ្វេ (សំខិត្តំ).

៧០. ហេតុយា តីណិ, អារម្មណេ បញ្ច, អធិបតិយា បញ្ច, អនន្តរេ ឆ, សមនន្តរេ ឆ, សហជាតេ តីណិ, អញ្ញមញ្ញេ តីណិ, និស្សយេ តីណិ, ឧបនិស្សយេ អដ្ឋ, អាសេវនេ តីណិ, វិបាកេ ទ្វេ, ឥន្ទ្រិយេ ទ្វេ…បេ… អវិគតេ តីណិ (សំខិត្តំ).

នហេតុយា អដ្ឋ, នអារម្មណេ អដ្ឋ (សំខិត្តំ).

ហេតុបច្ចយា នអារម្មណេ តីណិ (សំខិត្តំ).

នហេតុបច្ចយា អារម្មណេ បញ្ច (សំខិត្តំ).

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)

នហេតុបទបច្ចយចតុក្កំ

៧១. សំកិលិដ្ឋសំកិលេសិកំ នហេតុំ ធម្មំ បដិច្ច សំកិលិដ្ឋសំកិលេសិកោ នហេតុ ធម្មោ ឧប្បជ្ជតិ ហេតុបច្ចយា. សំកិលិដ្ឋសំកិលេសិកំ នហេតុំ ធម្មំ បដិច្ច អសំកិលិដ្ឋសំកិលេសិកោ នហេតុ ធម្មោ ឧប្បជ្ជតិ ហេតុបច្ចយា. សំកិលិដ្ឋសំកិលេសិកំ នហេតុំ ធម្មំ បដិច្ច សំកិលិដ្ឋសំកិលេសិកោ នហេតុ ច អសំកិលិដ្ឋសំកិលេសិកោ នហេតុ ច ធម្មា ឧប្បជ្ជន្តិ ហេតុបច្ចយា. (៣)

អសំកិលិដ្ឋសំកិលេសិកំ នហេតុំ ធម្មំ បដិច្ច អសំកិលិដ្ឋសំកិលេសិកោ នហេតុ ធម្មោ ឧប្បជ្ជតិ ហេតុបច្ចយា. (១)

អសំកិលិដ្ឋអសំកិលេសិកំ នហេតុំ ធម្មំ បដិច្ច អសំកិលិដ្ឋអសំកិលេសិកោ នហេតុ ធម្មោ ឧប្បជ្ជតិ ហេតុបច្ចយា… តីណិ.

សំកិលិដ្ឋសំកិលេសិកំ នហេតុញ្ច អសំកិលិដ្ឋសំកិលេសិកំ នហេតុញ្ច ធម្មំ បដិច្ច អសំកិលិដ្ឋសំកិលេសិកោ នហេតុ ធម្មោ ឧប្បជ្ជតិ ហេតុបច្ចយា. (១)

អសំកិលិដ្ឋសំកិលេសិកំ នហេតុញ្ច អសំកិលិដ្ឋអសំកិលេសិកំ នហេតុញ្ច ធម្មំ បដិច្ច អសំកិលិដ្ឋសំកិលេសិកោ នហេតុ ធម្មោ ឧប្បជ្ជតិ ហេតុបច្ចយា. (១)

៧២. សំកិលិដ្ឋសំកិលេសិកំ នហេតុំ ធម្មំ បដិច្ច សំកិលិដ្ឋសំកិលេសិកោ នហេតុ ធម្មោ ឧប្បជ្ជតិ អារម្មណបច្ចយា. (១)

អសំកិលិដ្ឋសំកិលេសិកំ នហេតុំ ធម្មំ បដិច្ច អសំកិលិដ្ឋសំកិលេសិកោ នហេតុ ធម្មោ ឧប្បជ្ជតិ អារម្មណបច្ចយា. (១)

អសំកិលិដ្ឋអសំកិលេសិកំ នហេតុំ ធម្មំ បដិច្ច អសំកិលិដ្ឋអសំកិលេសិកោ នហេតុ ធម្មោ ឧប្បជ្ជតិ អារម្មណបច្ចយា. (១) (សំខិត្តំ.)

៧៣. ហេតុយា នវ, អារម្មណេ តីណិ, អធិបតិយា នវ, អនន្តរេ តីណិ, សមនន្តរេ តីណិ, សហជាតេ នវ, អញ្ញមញ្ញេ តីណិ, និស្សយេ នវ, ឧបនិស្សយេ តីណិ, បុរេជាតេ តីណិ, អាសេវនេ តីណិ, កម្មេ នវ, វិបាកេ បញ្ច, អាហារេ នវ…បេ… អវិគតេ នវ (សំខិត្តំ).

បច្ចនីយំ –នហេតុបច្ចយោ

៧៤. អសំកិលិដ្ឋសំកិលេសិកំ នហេតុំ ធម្មំ បដិច្ច អសំកិលិដ្ឋសំកិលេសិកោ នហេតុ ធម្មោ ឧប្បជ្ជតិ នហេតុបច្ចយា (សំខិត្តំ).

នហេតុយា ឯកំ, នអារម្មណេ បញ្ច, នអធិបតិយា ឆ, នបុរេជាតេ សត្ត…បេ… នកម្មេ តីណិ…បេ… នវិប្បយុត្តេ តីណិ…បេ… នោវិគតេ បញ្ច (សំខិត្តំ).

(សហជាតវារម្បិ…បេ… សម្បយុត្តវារម្បិ វិត្ថារេតព្ពំ.)