៧. បញ្ហាវារោ

បច្ចយចតុក្កំ

អារម្មណបច្ចយាទិ

៣២. សុខាយ វេទនាយ សម្បយុត្តោ នហេតុ ធម្មោ សុខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. សុខាយ វេទនាយ សម្បយុត្តោ នហេតុ ធម្មោ ទុក្ខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. សុខាយ វេទនាយ សម្បយុត្តោ នហេតុ ធម្មោ អទុក្ខមសុខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. (៣)

ទុក្ខាយ វេទនាយ សម្បយុត្តោ នហេតុ ធម្មោ ទុក្ខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. ទុក្ខាយ វេទនាយ សម្បយុត្តោ នហេតុ ធម្មោ សុខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. ទុក្ខាយ វេទនាយ សម្បយុត្តោ នហេតុ ធម្មោ អទុក្ខមសុខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. (៣)

អទុក្ខមសុខាយ វេទនាយ សម្បយុត្តោ នហេតុ ធម្មោ អទុក្ខមសុខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. អទុក្ខមសុខាយ វេទនាយ សម្បយុត្តោ នហេតុ ធម្មោ សុខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. អទុក្ខមសុខាយ វេទនាយ សម្បយុត្តោ នហេតុ ធម្មោ ទុក្ខាយ វេទនាយ សម្បយុត្តស្ស នហេតុស្ស ធម្មស្ស អារម្មណបច្ចយេន បច្ចយោ. (៣)

៣៣. សុខាយ វេទនាយ សម្បយុត្តោ នហេតុ ធម្មោ សុខាយ វេទនាយ សម្បយុត្តស្ស នហេតុស្ស ធម្មស្ស អធិបតិបច្ចយេន បច្ចយោ. សុខាយ វេទនាយ សម្បយុត្តោ នហេតុ ធម្មោ អទុក្ខមសុខាយ វេទនាយ សម្បយុត្តស្ស នហេតុស្ស ធម្មស្ស អធិបតិបច្ចយេន បច្ចយោ. (២)

ទុក្ខាយ វេទនាយ សម្បយុត្តោ នហេតុ ធម្មោ ទុក្ខាយ វេទនាយ សម្បយុត្តស្ស នហេតុស្ស ធម្មស្ស អធិបតិបច្ចយេន បច្ចយោ. (១)

អទុក្ខមសុខាយ វេទនាយ សម្បយុត្តោ នហេតុ ធម្មោ អទុក្ខមសុខាយ វេទនាយ សម្បយុត្តស្ស នហេតុស្ស ធម្មស្ស អធិបតិបច្ចយេន បច្ចយោ. អទុក្ខមសុខាយ វេទនាយ សម្បយុត្តោ នហេតុ ធម្មោ សុខាយ វេទនាយ សម្បយុត្តស្ស នហេតុស្ស ធម្មស្ស អធិបតិបច្ចយេន បច្ចយោ. (២)

អនន្តរ-ឧបនិស្សយបច្ចយា

៣៤. សុខាយ វេទនាយ សម្បយុត្តោ នហេតុ ធម្មោ សុខាយ វេទនាយ សម្បយុត្តស្ស នហេតុស្ស ធម្មស្ស អនន្តរបច្ចយេន បច្ចយោ… ទ្វេ.

ទុក្ខាយ វេទនាយ សម្បយុត្តោ នហេតុ ធម្មោ ទុក្ខាយ វេទនាយ សម្បយុត្តស្ស នហេតុស្ស ធម្មស្ស អនន្តរបច្ចយេន បច្ចយោ… ទ្វេ.

អទុក្ខមសុខាយ វេទនាយ សម្បយុត្តោ នហេតុ ធម្មោ អទុក្ខមសុខាយ វេទនាយ សម្បយុត្តស្ស នហេតុស្ស ធម្មស្ស អនន្តរបច្ចយេន បច្ចយោ… តីណិ…បេ….

៣៥. សុខាយ វេទនាយ សម្បយុត្តោ នហេតុ ធម្មោ សុខាយ វេទនាយ សម្បយុត្តស្ស នហេតុស្ស ធម្មស្ស ឧបនិស្សយបច្ចយេន បច្ចយោ… តីណិ.

ទុក្ខាយ វេទនាយ សម្បយុត្តោ នហេតុ ធម្មោ ទុក្ខាយ វេទនាយ សម្បយុត្តស្ស នហេតុស្ស ធម្មស្ស ឧបនិស្សយបច្ចយេន បច្ចយោ… តីណិ.

អទុក្ខមសុខាយ វេទនាយ សម្បយុត្តោ នហេតុ ធម្មោ អទុក្ខមសុខាយ វេទនាយ សម្បយុត្តស្ស នហេតុស្ស ធម្មស្ស ឧបនិស្សយបច្ចយេន បច្ចយោ… តីណិ (សំខិត្តំ).

៣៦. អារម្មណេ នវ, អធិបតិយា បញ្ច, អនន្តរេ សត្ត, សមនន្តរេ សត្ត, សហជាតេ តីណិ, អញ្ញមញ្ញេ តីណិ, និស្សយេ តីណិ, ឧបនិស្សយេ នវ, អាសេវនេ តីណិ, កម្មេ អដ្ឋ, វិបាកេ តីណិ, អាហារេ តីណិ, ឥន្ទ្រិយេ តីណិ, ឈានេ តីណិ, មគ្គេ តីណិ, សម្បយុត្តេ តីណិ, អត្ថិយា តីណិ, នត្ថិយា សត្ត, វិគតេ សត្ត, អវិគតេ តីណិ (សំខិត្តំ).

នហេតុយា នវ, នអារម្មណេ នវ (សំខិត្តំ).

អារម្មណបច្ចយា នហេតុយា នវ (សំខិត្តំ).

នហេតុបច្ចយា អារម្មណេ នវ (សំខិត្តំ).

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)