អព្យាកតបទំ

ហេតុបច្ចយោ

៥១. សប្បីតិកំ អព្យាកតំ ធម្មំ បដិច្ច សប្បីតិកោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

អប្បីតិកំ អព្យាកតំ ធម្មំ បដិច្ច អប្បីតិកោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

សប្បីតិកំ អព្យាកតញ្ច អប្បីតិកំ អព្យាកតញ្ច ធម្មំ បដិច្ច សប្បីតិកោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ (សំខិត្តំ).

៥២. ហេតុយា នវ, អារម្មណេ នវ…បេ… បុរេជាតេ ឆ, អាសេវនេ ឆ…បេ… អវិគតេ នវ (សំខិត្តំ).

នហេតុយា នវ, នអារម្មណេ តីណិ, នអធិបតិយា នវ…បេ… នកម្មេ ចត្តារិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ នវ, នសម្បយុត្តេ តីណិ, នវិប្បយុត្តេ ឆ…បេ… (សំខិត្តំ. សហជាតវារាទិ វិត្ថារេតព្ពោ).

៥៣. សប្បីតិកោ អព្យាកតោ ធម្មោ សប្បីតិកស្ស អព្យាកតស្ស ធម្មស្ស ហេតុបច្ចយេន បច្ចយោ (សំខិត្តំ).

៥៤. ហេតុយា ចត្តារិ, អារម្មណេ នវ, អធិបតិយា នវ, អនន្តរេ នវ…បេ… (សព្ពត្ថ នវ), ឧបនិស្សយេ នវ, បុរេជាតេ តីណិ, បច្ឆាជាតេ តីណិ, អាសេវនេ នវ, កម្មេ ចត្តារិ, វិបាកេ នវ, អាហារេ ចត្តារិ, ឥន្ទ្រិយេ ចត្តារិ, ឈានេ នវ, មគ្គេ ចត្តារិ, សម្បយុត្តេ ឆ, វិប្បយុត្តេ បញ្ច, អត្ថិយា នវ…បេ… អវិគតេ នវ (សំខិត្តំ).