១-៧. បដិច្ចវារាទិ

បច្ចយចតុក្កំ

ហេតុបច្ចយោ

២៨. ឧបាទានវិប្បយុត្តំ ឧបាទានិយំ កុសលំ ធម្មំ បដិច្ច ឧបាទានវិប្បយុត្តោ ឧបាទានិយោ កុសលោ ធម្មោ ឧប្បជ្ជតិ ហេតុបច្ចយា. (១)

ឧបាទានវិប្បយុត្តំ អនុបាទានិយំ កុសលំ ធម្មំ បដិច្ច ឧបាទានវិប្បយុត្តោ អនុបាទានិយោ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

២៩. ហេតុយា ទ្វេ, អារម្មណេ ទ្វេ…បេ… អវិគតេ ទ្វេ (សំខិត្តំ. លោកិយទុកកុសលសទិសំ. សហជាតវារម្បិ…បេ… បញ្ហាវារម្បិ វិត្ថារេតព្ពំ).

៣០. ឧបាទានវិប្បយុត្តំ ឧបាទានិយំ អកុសលំ ធម្មំ បដិច្ច ឧបាទានវិប្បយុត្តោ ឧបាទានិយោ អកុសលោ ធម្មោ ឧប្បជ្ជតិ ហេតុបច្ចយា (សព្ពត្ថ ឯកំ).

ឧបាទានវិប្បយុត្តំ ឧបាទានិយំ អព្យាកតំ ធម្មំ បដិច្ច ឧបាទានវិប្បយុត្តោ ឧបាទានិយោ អព្យាកតោ ធម្មោ ឧប្បជ្ជតិ ហេតុបច្ចយា. (១)

ឧបាទានវិប្បយុត្តំ អនុបាទានិយំ អព្យាកតំ ធម្មំ បដិច្ច ឧបាទានវិប្បយុត្តោ អនុបាទានិយោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

ឧបាទានវិប្បយុត្តំ ឧបាទានិយំ អព្យាកតញ្ច ឧបាទានវិប្បយុត្តំ អនុបាទានិយំ អព្យាកតញ្ច ធម្មំ បដិច្ច ឧបាទានវិប្បយុត្តោ ឧបាទានិយោ អព្យាកតោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៣១. ហេតុយា បញ្ច, អារម្មណេ ទ្វេ…បេ… អវិគតេ បញ្ច (សំខិត្តំ. លោកិយទុកអព្យាកតសទិសំ. សហជាតវារម្បិ…បេ… បញ្ហាវារម្បិ សព្ពត្ថ វិត្ថារេតព្ពំ).

ឧបាទានគោច្ឆកកុសលត្តិកំ និដ្ឋិតំ.