៥៥-១. សារម្មណទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

១. សារម្មណំ កុសលំ ធម្មំ បដិច្ច សារម្មណោ កុសលោ ធម្មោ ឧប្បជ្ជតិ ហេតុបច្ចយា (យថា សប្បច្ចយំ កុសលំ, ឯវំ វិត្ថារេតព្ពំ.)

២. សារម្មណំ អកុសលំ ធម្មំ បដិច្ច សារម្មណោ អកុសលោ ធម្មោ ឧប្បជ្ជតិ ហេតុបច្ចយា (យថា សប្បច្ចយំ អកុសលំ, ឯវំ កាតព្ពំ.)

៣. សារម្មណំ អព្យាកតំ ធម្មំ បដិច្ច សារម្មណោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

អនារម្មណំ អព្យាកតំ ធម្មំ បដិច្ច អនារម្មណោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

សារម្មណំ អព្យាកតញ្ច អនារម្មណំ អព្យាកតញ្ច ធម្មំ បដិច្ច សារម្មណោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ (សំខិត្តំ).

៤. ហេតុយា នវ, អារម្មណេ តីណិ, អធិបតិយា បញ្ច…បេ… អញ្ញមញ្ញេ ឆ…បេ… បុរេជាតេ ឯកំ, អាសេវនេ ឯកំ (សំខិត្តំ).

នហេតុយា នវ, នអារម្មណេ តីណិ, នអធិបតិយា នវ…បេ… នកម្មេ ទ្វេ, នវិបាកេ បញ្ច, នអាហារេ ឯកំ, នឥន្ទ្រិយេ ឯកំ, នឈានេ ទ្វេ, នមគ្គេ នវ, នសម្បយុត្តេ តីណិ, នវិប្បយុត្តេ ទ្វេ, នោនត្ថិយា តីណិ, នោវិគតេ តីណិ (សំខិត្តំ).

ហេតុ-អារម្មណ-អធិបតិបច្ចយា

៥. សារម្មណោ អព្យាកតោ ធម្មោ សារម្មណស្ស អព្យាកតស្ស ធម្មស្ស ហេតុបច្ចយេន បច្ចយោ… តីណិ.

៦. សារម្មណោ អព្យាកតោ ធម្មោ សារម្មណស្ស អព្យាកតស្ស ធម្មស្ស អារម្មណបច្ចយេន បច្ចយោ. (១)

អនារម្មណោ អព្យាកតោ ធម្មោ សារម្មណស្ស អព្យាកតស្ស ធម្មស្ស អារម្មណបច្ចយេន បច្ចយោ.

៧. សារម្មណោ អព្យាកតោ ធម្មោ សារម្មណស្ស អព្យាកតស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ… តីណិ. អនារម្មណោ អព្យាកតោ ធម្មោ សារម្មណស្ស អព្យាកតស្ស ធម្មស្ស អធិបតិបច្ចយេន បច្ចយោ – អារម្មណាធិបតិ (សំខិត្តំ).

៨. ហេតុយា តីណិ, អារម្មណេ ទ្វេ, អធិបតិយា ចត្តារិ, អនន្តរេ ឯកំ…បេ… សហជាតេ សត្ត, អញ្ញមញ្ញេ ឆ, និស្សយេ សត្ត, ឧបនិស្សយេ ទ្វេ, បុរេជាតេ ឯកំ, បច្ឆាជាតេ ឯកំ, អាសេវនេ ឯកំ, កម្មេ តីណិ, វិបាកេ តីណិ, សម្បយុត្តេ ឯកំ, វិប្បយុត្តេ ទ្វេ (សំខិត្តំ).

៥៦-១. ចិត្តទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

៩. ចិត្តំ កុសលំ ធម្មំ បដិច្ច នោចិត្តោ កុសលោ ធម្មោ ឧប្បជ្ជតិ ហេតុបច្ចយា. (១)

នោចិត្តំ កុសលំ ធម្មំ បដិច្ច នោចិត្តោ កុសលោ ធម្មោ ឧប្បជ្ជតិ ហេតុបច្ចយា. នោចិត្តំ កុសលំ ធម្មំ បដិច្ច ចិត្តោ កុសលោ ធម្មោ ឧប្បជ្ជតិ ហេតុបច្ចយា. នោចិត្តំ កុសលំ ធម្មំ បដិច្ច ចិត្តោ កុសលោ ច នោចិត្តោ កុសលោ ច ធម្មា ឧប្បជ្ជន្តិ ហេតុបច្ចយា. (៣)

ចិត្តំ កុសលញ្ច នោចិត្តំ កុសលញ្ច ធម្មំ បដិច្ច នោចិត្តោ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១០. ហេតុយា បញ្ច, អារម្មណេ បញ្ច (សព្ពត្ថ បញ្ច), អវិគតេ បញ្ច (សំខិត្តំ).

នអធិបតិយា បញ្ច, នបុរេជាតេ បញ្ច, នបច្ឆាជាតេ បញ្ច, នអាសេវនេ បញ្ច, នកម្មេ តីណិ, នវិបាកេ បញ្ច, នវិប្បយុត្តេ បញ្ច (សំខិត្តំ).

(សហជាតវារម្បិ…បេ… សម្បយុត្តវារម្បិ វិត្ថារេតព្ពំ.)

១១. នោចិត្តោ កុសលោ ធម្មោ នោចិត្តស្ស កុសលស្ស ធម្មស្ស ហេតុបច្ចយេន បច្ចយោ. នោចិត្តោ កុសលោ ធម្មោ ចិត្តស្ស កុសលស្ស ធម្មស្ស ហេតុបច្ចយេន បច្ចយោ. នោចិត្តោ កុសលោ ធម្មោ ចិត្តស្ស កុសលស្ស ច នោចិត្តស្ស កុសលស្ស ច ធម្មស្ស ហេតុបច្ចយេន បច្ចយោ. (៣) (សំខិត្តំ.)

១២. ហេតុយា តីណិ, អារម្មណេ នវ, អធិបតិយា នវ, អនន្តរេ នវ…បេ… សហជាតេ អញ្ញមញ្ញេ និស្សយេ បញ្ច, ឧបនិស្សយេ អាសេវនេ នវ, កម្មេ តីណិ, អាហារេ ឥន្ទ្រិយេ បញ្ច, ឈានេ មគ្គេ តីណិ, សម្បយុត្តេ បញ្ច…បេ… អវិគតេ បញ្ច (សំខិត្តំ).

នហេតុយា នវ, នអារម្មណេ នវ (សំខិត្តំ).

ហេតុបច្ចយា នអារម្មណេ តីណិ (សំខិត្តំ).

នហេតុបច្ចយា អារម្មណេ នវ (សំខិត្តំ).

(យថា កុសលត្តិកេ បញ្ហាវារស្ស អនុលោមម្បិ បច្ចនីយម្បិ អនុលោមបច្ចនីយម្បិ បច្ចនីយានុលោមម្បិ គណិតំ, ឯវំ គណេតព្ពំ.)

១៣. ចិត្តំ អកុសលំ ធម្មំ បដិច្ច នោចិត្តោ អកុសលោ ធម្មោ ឧប្បជ្ជតិ ហេតុបច្ចយា. (១)

នោចិត្តំ អកុសលំ ធម្មំ បដិច្ច នោចិត្តោ អកុសលោ ធម្មោ ឧប្បជ្ជតិ ហេតុបច្ចយា. នោចិត្តំ អកុសលំ ធម្មំ បដិច្ច ចិត្តោ អកុសលោ ធម្មោ ឧប្បជ្ជតិ ហេតុបច្ចយា. នោចិត្តំ អកុសលំ ធម្មំ បដិច្ច ចិត្តោ អកុសលោ ច នោចិត្តោ អកុសលោ ច ធម្មា ឧប្បជ្ជន្តិ ហេតុបច្ចយា. (៣)

ចិត្តំ អកុសលញ្ច នោចិត្តំ អកុសលញ្ច ធម្មំ បដិច្ច នោចិត្តោ អកុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១៤. ហេតុយា បញ្ច, អារម្មណេ បញ្ច…បេ… អវិគតេ បញ្ច. (សំខិត្តំ. ចិត្តទុកកុសលសទិសំ, នហេតុយាបិ កត្តព្ពំ. សហជាតវារម្បិ…បេ… បញ្ហាវារម្បិ កាតព្ពំ).

១៥. ចិត្តំ អព្យាកតំ ធម្មំ បដិច្ច នោចិត្តោ អព្យាកតោ ធម្មោ ឧប្បជ្ជតិ ហេតុបច្ចយា. (១)

នោចិត្តំ អព្យាកតំ ធម្មំ បដិច្ច នោចិត្តោ អព្យាកតោ ធម្មោ ឧប្បជ្ជតិ ហេតុបច្ចយា. នោចិត្តំ អព្យាកតំ ធម្មំ បដិច្ច ចិត្តោ អព្យាកតោ ធម្មោ ឧប្បជ្ជតិ ហេតុបច្ចយា. នោចិត្តំ អព្យាកតំ ធម្មំ បដិច្ច ចិត្តោ អព្យាកតោ ច នោចិត្តោ អព្យាកតោ ច ធម្មា ឧប្បជ្ជន្តិ ហេតុបច្ចយា. (៣)

ចិត្តំ អព្យាកតញ្ច នោចិត្តំ អព្យាកតញ្ច ធម្មំ បដិច្ច នោចិត្តោ អព្យាកតោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១៦. ហេតុយា បញ្ច, អារម្មណេ បញ្ច…បេ… វិបាកេ បញ្ច…បេ… អវិគតេ បញ្ច (សំខិត្តំ).

នហេតុយា បញ្ច, នអារម្មណេ តីណិ, នអធិបតិយា បញ្ច…បេ… នបុរេជាតេ នបច្ឆាជាតេ នអាសេវនេ បញ្ច, នកម្មេ តីណិ, នវិបាកេ បញ្ច, នអាហារេ ឯកំ, នឥន្ទ្រិយេ ឯកំ, នឈានេ បញ្ច, នមគ្គេ បញ្ច, នសម្បយុត្តេ តីណិ, នវិប្បយុត្តេ បញ្ច…បេ… នោវិគតេ តីណិ (សំខិត្តំ).

(សហជាតវារម្បិ…បេ… សម្បយុត្តវារម្បិ វិត្ថារេតព្ពំ.)

១៧. នោចិត្តោ អព្យាកតោ ធម្មោ នោចិត្តស្ស អព្យាកតស្ស ធម្មស្ស ហេតុបច្ចយេន បច្ចយោ… តីណិ (ចិត្តទុកកុសលសទិសំ វិត្ថារេតព្ពំ).

១៨. ហេតុយា តីណិ, អារម្មណេ នវ, អធិបតិយា នវ, អនន្តរេ នវ…បេ… សហជាតេ បញ្ច, បុរេជាតេ តីណិ, អាសេវនេ នវ, កម្មេ តីណិ, វិបាកេ បញ្ច, វិប្បយុត្តេ បញ្ច, អត្ថិយា បញ្ច, នត្ថិយា នវ…បេ… អវិគតេ បញ្ច (សំខិត្តំ).

៥៧-១. ចេតសិកទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

១៩. ចេតសិកំ កុសលំ ធម្មំ បដិច្ច ចេតសិកោ កុសលោ ធម្មោ ឧប្បជ្ជតិ ហេតុបច្ចយា. ចេតសិកំ កុសលំ ធម្មំ បដិច្ច អចេតសិកោ កុសលោ ធម្មោ ឧប្បជ្ជតិ ហេតុបច្ចយា. ចេតសិកំ កុសលំ ធម្មំ បដិច្ច ចេតសិកោ កុសលោ ច អចេតសិកោ កុសលោ ច ធម្មា ឧប្បជ្ជន្តិ ហេតុបច្ចយា. (៣)

អចេតសិកំ កុសលំ ធម្មំ បដិច្ច ចេតសិកោ កុសលោ ធម្មោ ឧប្បជ្ជតិ ហេតុបច្ចយា. (១)

ចេតសិកំ កុសលញ្ច អចេតសិកំ កុសលញ្ច ធម្មំ បដិច្ច ចេតសិកោ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

២០. ហេតុយា បញ្ច, អារម្មណេ បញ្ច, អធិបតិយា បញ្ច…បេ… អវិគតេ បញ្ច.

នអធិបតិយា បញ្ច, នបុរេជាតេ បញ្ច…បេ… នកម្មេ តីណិ, នវិបាកេ បញ្ច…បេ… នវិប្បយុត្តេ បញ្ច (សំខិត្តំ, សហជាតវារាទិ វិត្ថារេតព្ពោ).

២១. ចេតសិកោ កុសលោ ធម្មោ ចេតសិកស្ស កុសលស្ស ធម្មស្ស ហេតុបច្ចយេន បច្ចយោ (សំខិត្តំ).

២២. ហេតុយា តីណិ, អារម្មណេ នវ, អធិបតិយា នវ (អាទិម្ហិ តីណិ, សហជាតាធិបតិ, មជ្ឈិមេសុ តីសុ មជ្ឈិមានុលោមិកាយេវ បញ្ហា, សហជាតាធិបតិ,) អនន្តរេ នវ…បេ… សហជាតេ បញ្ច…បេ… ឧបនិស្សយេ នវ, អាសេវនេ នវ, កម្មេ តីណិ, អាហារេ បញ្ច, ឥន្ទ្រិយេ បញ្ច, ឈានេ តីណិ, មគ្គេ តីណិ, សម្បយុត្តេ បញ្ច, អត្ថិយា បញ្ច, នត្ថិយា នវ…បេ… អវិគតេ បញ្ច (សំខិត្តំ).

២៣. ចេតសិកំ អកុសលំ ធម្មំ បដិច្ច ចេតសិកោ អកុសលោ ធម្មោ ឧប្បជ្ជតិ ហេតុបច្ចយា. ចេតសិកំ អកុសលំ ធម្មំ បដិច្ច អចេតសិកោ អកុសលោ ធម្មោ ឧប្បជ្ជតិ ហេតុបច្ចយា. ចេតសិកំ អកុសលំ ធម្មំ បដិច្ច ចេតសិកោ អកុសលោ ច អចេតសិកោ អកុសលោ ច ធម្មា ឧប្បជ្ជន្តិ ហេតុបច្ចយា. (៣)

អចេតសិកំ អកុសលំ ធម្មំ បដិច្ច ចេតសិកោ អកុសលោ ធម្មោ ឧប្បជ្ជតិ ហេតុបច្ចយា. (១)

ចេតសិកំ អកុសលញ្ច អចេតសិកំ អកុសលញ្ច ធម្មំ បដិច្ច ចេតសិកោ អកុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

២៤. ហេតុយា បញ្ច, អារម្មណេ បញ្ច…បេ… អវិគតេ បញ្ច (សំខិត្តំ, យថា កុសលនយំ ឯវំ នហេតុបច្ចយម្បិ កាតព្ពំ). (សហជាតវារម្បិ…បេ… បញ្ហាវារម្បិ វិត្ថារេតព្ពំ).

២៥. ចេតសិកំ អព្យាកតំ ធម្មំ បដិច្ច ចេតសិកោ អព្យាកតោ ធម្មោ ឧប្បជ្ជតិ ហេតុបច្ចយា. ចេតសិកំ អព្យាកតំ ធម្មំ បដិច្ច អចេតសិកោ អព្យាកតោ ធម្មោ ឧប្បជ្ជតិ ហេតុបច្ចយា. ចេតសិកំ អព្យាកតំ ធម្មំ បដិច្ច ចេតសិកោ អព្យាកតោ ច អចេតសិកោ អព្យាកតោ ច ធម្មា ឧប្បជ្ជន្តិ ហេតុបច្ចយា. (៣)

អចេតសិកំ អព្យាកតំ ធម្មំ បដិច្ច អចេតសិកោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

ចេតសិកំ អព្យាកតញ្ច អចេតសិកំ អព្យាកតញ្ច ធម្មំ បដិច្ច ចេតសិកោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ (សំខិត្តំ).

២៦. ហេតុយា នវ, អារម្មណេ នវ, អធិបតិយា នវ…បេ… បុរេជាតេ អាសេវនេ បញ្ច, កម្មេ នវ, វិបាកេ នវ…បេ… អវិគតេ នវ (សំខិត្តំ).

នហេតុយា នវ, នអារម្មណេ តីណិ, នអធិបតិយា នវ (សព្ពេ កាតព្ពា)…បេ… នកម្មេ ចត្តារិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឆ, នមគ្គេ នវ, នសម្បយុត្តេ តីណិ, នវិប្បយុត្តេ ឆ…បេ… នោវិគតេ តីណិ. (សំខិត្តំ, សហជាតវារាទិ វិត្ថារេតព្ពោ).

២៧. ចេតសិកោ អព្យាកតោ ធម្មោ ចេតសិកស្ស អព្យាកតស្ស ធម្មស្ស ហេតុបច្ចយេន បច្ចយោ (សំខិត្តំ).

២៨. ហេតុយា តីណិ, អារម្មណេ នវ, អធិបតិយា នវ (ឯត្ថ ឆសុ សហជាតាធិបតិ), អនន្តរេ នវ…បេ… សហជាតេ នវ, អញ្ញមញ្ញេ នវ, និស្សយេ នវ, ឧបនិស្សយេ នវ, បុរេជាតេ តីណិ, អាសេវនេ នវ, កម្មេ តីណិ, វិបាកេ នវ, អាហារេ នវ, ឥន្ទ្រិយេ នវ, ឈានេ តីណិ, មគ្គេ តីណិ, សម្បយុត្តេ បញ្ច, វិប្បយុត្តេ បញ្ច, អត្ថិយា នវ…បេ… អវិគតេ នវ (សំខិត្តំ).

៥៨-១. ចិត្តសម្បយុត្តទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

២៩. ចិត្តសម្បយុត្តំ កុសលំ ធម្មំ បដិច្ច ចិត្តសម្បយុត្តោ កុសលោ ធម្មោ ឧប្បជ្ជតិ ហេតុបច្ចយា (សំខិត្តំ).

៣០. ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

៣១. ចិត្តសម្បយុត្តំ អកុសលំ ធម្មំ បដិច្ច ចិត្តសម្បយុត្តោ អកុសលោ ធម្មោ ឧប្បជ្ជតិ ហេតុបច្ចយា (សំខិត្តំ).

៣២. ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ). (សហជាតវារេបិ…បេ… បញ្ហាវារេបិ សព្ពត្ថ ឯកំ.)

អព្យាកតបទំ – ហេតុបច្ចយោ

៣៣. ចិត្តសម្បយុត្តំ អព្យាកតំ ធម្មំ បដិច្ច ចិត្តសម្បយុត្តោ អព្យាកតោ ធម្មោ ឧប្បជ្ជតិ ហេតុបច្ចយា. ចិត្តសម្បយុត្តំ អព្យាកតំ ធម្មំ បដិច្ច ចិត្តវិប្បយុត្តោ អព្យាកតោ ធម្មោ ឧប្បជ្ជតិ ហេតុបច្ចយា. ចិត្តសម្បយុត្តំ អព្យាកតំ ធម្មំ បដិច្ច ចិត្តសម្បយុត្តោ អព្យាកតោ ច ចិត្តវិប្បយុត្តោ អព្យាកតោ ច ធម្មា ឧប្បជ្ជន្តិ ហេតុបច្ចយា. (៣)

ចិត្តវិប្បយុត្តំ អព្យាកតំ ធម្មំ បដិច្ច ចិត្តវិប្បយុត្តោ អព្យាកតោ ធម្មោ ឧប្បជ្ជតិ ហេតុបច្ចយា. ចិត្តវិប្បយុត្តំ អព្យាកតំ ធម្មំ បដិច្ច ចិត្តសម្បយុត្តោ អព្យាកតោ ធម្មោ ឧប្បជ្ជតិ ហេតុបច្ចយា. ចិត្តវិប្បយុត្តំ អព្យាកតំ ធម្មំ បដិច្ច ចិត្តសម្បយុត្តោ អព្យាកតោ ច ចិត្តវិប្បយុត្តោ អព្យាកតោ ច ធម្មា ឧប្បជ្ជន្តិ ហេតុបច្ចយា. (៣)

ចិត្តសម្បយុត្តំ អព្យាកតញ្ច ចិត្តវិប្បយុត្តំ អព្យាកតញ្ច ធម្មំ បដិច្ច ចិត្តសម្បយុត្តោ អព្យាកតោ ធម្មោ ឧប្បជ្ជតិ ហេតុបច្ចយា. ចិត្តសម្បយុត្តំ អព្យាកតញ្ច ចិត្តវិប្បយុត្តំ អព្យាកតញ្ច ធម្មំ បដិច្ច ចិត្តវិប្បយុត្តោ អព្យាកតោ ធម្មោ ឧប្បជ្ជតិ ហេតុបច្ចយា. ចិត្តសម្បយុត្តំ អព្យាកតញ្ច ចិត្តវិប្បយុត្តំ អព្យាកតញ្ច ធម្មំ បដិច្ច ចិត្តសម្បយុត្តោ អព្យាកតោ ច ចិត្តវិប្បយុត្តោ អព្យាកតោ ច ធម្មា ឧប្បជ្ជន្តិ ហេតុបច្ចយា. (៣) (សំខិត្តំ.)

៣៤. ហេតុយា នវ, អារម្មណេ តីណិ, អធិបតិយា បញ្ច…បេ… អញ្ញមញ្ញេ ឆ…បេ… បុរេជាតេ ឯកំ, អាសេវនេ ឯកំ, កម្មេ នវ, វិបាកេ នវ…បេ… អវិគតេ នវ (សំខិត្តំ).

នហេតុយា នវ, នអារម្មណេ តីណិ, នអធិបតិយា នវ…បេ… នបុរេជាតេ នវ…បេ… នកម្មេ ទ្វេ, នវិបាកេ បញ្ច, នអាហារេ ឯកំ, នឥន្ទ្រិយេ ឯកំ, នឈានេ ទ្វេ, នមគ្គេ នវ, នសម្បយុត្តេ តីណិ, នវិប្បយុត្តេ ទ្វេ (សំខិត្តំ, សហជាតវារាទិ វិត្ថារេតព្ពោ).

ហេតុ-អារម្មណបច្ចយា

៣៥. ចិត្តសម្បយុត្តោ អព្យាកតោ ធម្មោ ចិត្តសម្បយុត្តស្ស អព្យាកតស្ស ធម្មស្ស ហេតុបច្ចយេន បច្ចយោ… តីណិ.

ចិត្តសម្បយុត្តោ អព្យាកតោ ធម្មោ ចិត្តសម្បយុត្តស្ស អព្យាកតស្ស ធម្មស្ស អារម្មណបច្ចយេន បច្ចយោ. (១)

ចិត្តវិប្បយុត្តោ អព្យាកតោ ធម្មោ ចិត្តសម្បយុត្តស្ស អព្យាកតស្ស ធម្មស្ស អារម្មណបច្ចយេន បច្ចយោ. (១) (សំខិត្តំ.)

៣៦. ហេតុយា តីណិ, អារម្មណេ ទ្វេ, អធិបតិយា ចត្តារិ, អនន្តរេ ឯកំ…បេ… សហជាតេ សត្ត, អញ្ញមញ្ញេ ឆ, និស្សយេ សត្ត, ឧបនិស្សយេ ទ្វេ, បុរេជាតេ ឯកំ, បច្ឆាជាតេ ឯកំ, អាសេវនេ ឯកំ, កម្មេ តីណិ, វិបាកេ តីណិ, អាហារេ ចត្តារិ, ឥន្ទ្រិយេ ឆ, ឈានេ តីណិ, មគ្គេ តីណិ, សម្បយុត្តេ ឯកំ, វិប្បយុត្តេ ទ្វេ (សំខិត្តំ).

៥៩-១. ចិត្តសំសដ្ឋទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

៣៧. ចិត្តសំសដ្ឋំ កុសលំ ធម្មំ បដិច្ច ចិត្តសំសដ្ឋោ កុសលោ ធម្មោ ឧប្បជ្ជតិ ហេតុបច្ចយា (សំខិត្តំ).

៣៨. ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ). (សហជាតវារេបិ…បេ… បញ្ហាវារេបិ សព្ពត្ថ ឯកំ.)

៣៩. ចិត្តសំសដ្ឋំ អកុសលំ ធម្មំ បដិច្ច ចិត្តសំសដ្ឋោ អកុសលោ ធម្មោ ឧប្បជ្ជតិ ហេតុបច្ចយា (សំខិត្តំ).

៤០. ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ). (សហជាតវារេបិ…បេ… បញ្ហាវារេបិ សព្ពត្ថ ឯកំ.)

៤១. ចិត្តសំសដ្ឋំ អព្យាកតំ ធម្មំ បដិច្ច ចិត្តសំសដ្ឋោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

នោចិត្តសំសដ្ឋំ អព្យាកតំ ធម្មំ បដិច្ច នោចិត្តសំសដ្ឋោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

ចិត្តសំសដ្ឋំ អព្យាកតញ្ច នោចិត្តសំសដ្ឋំ អព្យាកតញ្ច ធម្មំ បដិច្ច ចិត្តសំសដ្ឋោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ (សំខិត្តំ).

៤២. ហេតុយា នវ, អារម្មណេ តីណិ…បេ… អវិគតេ នវ (សំខិត្តំ).

(យថា ចិត្តសម្បយុត្តទុកំ អព្យាកតសទិសំ. សហជាតវារម្បិ…បេ… បញ្ហាវារម្បិ វិត្ថារេតព្ពំ.)

៦០-១. ចិត្តសមុដ្ឋានទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

៤៣. ចិត្តសមុដ្ឋានំ កុសលំ ធម្មំ បដិច្ច ចិត្តសមុដ្ឋានោ កុសលោ ធម្មោ ឧប្បជ្ជតិ ហេតុបច្ចយា. ចិត្តសមុដ្ឋានំ កុសលំ ធម្មំ បដិច្ច នោចិត្តសមុដ្ឋានោ កុសលោ ធម្មោ ឧប្បជ្ជតិ ហេតុបច្ចយា. ចិត្តសមុដ្ឋានំ កុសលំ ធម្មំ បដិច្ច ចិត្តសមុដ្ឋានោ កុសលោ ច នោចិត្តសមុដ្ឋានោ កុសលោ ច ធម្មា ឧប្បជ្ជន្តិ ហេតុបច្ចយា. (៣)

នោចិត្តសមុដ្ឋានំ កុសលំ ធម្មំ បដិច្ច ចិត្តសមុដ្ឋានោ កុសលោ ធម្មោ ឧប្បជ្ជតិ ហេតុបច្ចយា. (១)

ចិត្តសមុដ្ឋានំ កុសលញ្ច នោចិត្តសមុដ្ឋានំ កុសលញ្ច ធម្មំ បដិច្ច ចិត្តសមុដ្ឋានោ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៤៤. ហេតុយា បញ្ច, អារម្មណេ បញ្ច (សព្ពត្ថ បញ្ច), អវិគតេ បញ្ច (សំខិត្តំ).

នអធិបតិយា បញ្ច, នបុរេជាតេ បញ្ច…បេ… នកម្មេ តីណិ, នវិបាកេ បញ្ច…បេ… នវិប្បយុត្តេ បញ្ច (សំខិត្តំ, សហជាតវារាទិ វិត្ថារេតព្ពោ).

៤៥. ចិត្តសមុដ្ឋានោ កុសលោ ធម្មោ ចិត្តសមុដ្ឋានស្ស កុសលស្ស ធម្មស្ស ហេតុបច្ចយេន បច្ចយោ (សំខិត្តំ).

៤៦. ហេតុយា តីណិ, អារម្មណេ នវ, អធិបតិយា នវ, អនន្តរេ នវ, សមនន្តរេ នវ, សហជាតេ បញ្ច…បេ… ឧបនិស្សយេ នវ, អាសេវនេ នវ, កម្មេ តីណិ, អាហារេ បញ្ច, ឥន្ទ្រិយេ បញ្ច, ឈានេ តីណិ, មគ្គេ តីណិ, សម្បយុត្តេ បញ្ច, អត្ថិយា បញ្ច…បេ… អវិគតេ បញ្ច (សំខិត្តំ).

៤៧. ចិត្តសមុដ្ឋានំ អកុសលំ ធម្មំ បដិច្ច ចិត្តសមុដ្ឋានោ អកុសលោ ធម្មោ ឧប្បជ្ជតិ ហេតុបច្ចយា… តីណិ.

នោចិត្តសមុដ្ឋានំ អកុសលំ ធម្មំ បដិច្ច ចិត្តសមុដ្ឋានោ អកុសលោ ធម្មោ ឧប្បជ្ជតិ ហេតុបច្ចយា. (១)

ចិត្តសមុដ្ឋានំ អកុសលញ្ច នោចិត្តសមុដ្ឋានំ អកុសលញ្ច ធម្មំ បដិច្ច ចិត្តសមុដ្ឋានោ អកុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ).

៤៨. ហេតុយា បញ្ច, អារម្មណេ បញ្ច…បេ… អវិគតេ បញ្ច (សំខិត្តំ).

(កុសលត្តិកសទិសំ សហជាតវារម្បិ …បេ… បញ្ហាវារម្បិ វិត្ថារេតព្ពំ.)

៤៩. ចិត្តសមុដ្ឋានំ អព្យាកតំ ធម្មំ បដិច្ច ចិត្តសមុដ្ឋានោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

នោចិត្តសមុដ្ឋានំ អព្យាកតំ ធម្មំ បដិច្ច នោចិត្តសមុដ្ឋានោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

ចិត្តសមុដ្ឋានំ អព្យាកតញ្ច នោចិត្តសមុដ្ឋានំ អព្យាកតញ្ច ធម្មំ បដិច្ច ចិត្តសមុដ្ឋានោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ (សំខិត្តំ).

៥០. ហេតុយា នវ, អារម្មណេ នវ, អធិបតិយា បញ្ច (សព្ពត្ថ នវ), បុរេជាតេ បញ្ច, អាសេវនេ បញ្ច…បេ… អវិគតេ នវ (សំខិត្តំ).

នហេតុយា នវ, នអារម្មណេ ឆ, នអធិបតិយា នវ…បេ… នកម្មេ តីណិ, នវិបាកេ ឆ, នអាហារេ ឯកំ, នឥន្ទ្រិយេ ឯកំ, នឈានេ ឆ, នមគ្គេ នវ, នសម្បយុត្តេ ឆ, នវិប្បយុត្តេ ឆ, នោនត្ថិយា ឆ, នោវិគតេ ឆ (សំខិត្តំ).

(សហជាតវារម្បិ…បេ… សម្បយុត្តវារម្បិ វិត្ថារេតព្ពំ.)

៥១. ចិត្តសមុដ្ឋានោ អព្យាកតោ ធម្មោ ចិត្តសមុដ្ឋានស្ស អព្យាកតស្ស ធម្មស្ស ហេតុបច្ចយេន បច្ចយោ… តីណិ.

ចិត្តសមុដ្ឋានោ អព្យាកតោ ធម្មោ ចិត្តសមុដ្ឋានស្ស អព្យាកតស្ស ធម្មស្ស អារម្មណបច្ចយេន បច្ចយោ (សំខិត្តំ).

៥២. ហេតុយា តីណិ, អារម្មណេ នវ, អធិបតិយា នវ, អនន្តរេ នវ (សព្ពត្ថ នវ), បុរេជាតេ នវ, បច្ឆាជាតេ នវ, អាសេវនេ នវ, កម្មេ តីណិ, វិបាកេ នវ, អាហារេ នវ (ចិត្តសមុដ្ឋានមូលំ នោចិត្តសមុដ្ឋានស្ស កពឡីការោ អាហារោ កាតព្ពោ. នោចិត្តសមុដ្ឋានោ ចិត្តសមុដ្ឋានស្ស កពឡីការោ អាហារោ ឃដនេ មជ្ឈេ កពឡីការោ អាហារោ), ឥន្ទ្រិយេ នវ (រូបជីវិតិន្ទ្រិយំ ឯកំ), ឈានេ តីណិ, មគ្គេ តីណិ, សម្បយុត្តេ បញ្ច, វិប្បយុត្តេ នវ, អត្ថិយា នវ, នត្ថិយា នវ, វិគតេ នវ, អវិគតេ នវ (សំខិត្តំ).

(យថា កុសលត្តិកេ បញ្ហាវារស្ស អនុលោមម្បិ បច្ចនីយម្បិ អនុលោមបច្ចនីយម្បិ បច្ចនីយានុលោមម្បិ គណិតំ, ឯវំ គណេតព្ពំ.)

៦១-១. ចិត្តសហភូទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

៥៣. ចិត្តសហភុំ កុសលំ ធម្មំ បដិច្ច ចិត្តសហភូ កុសលោ ធម្មោ ឧប្បជ្ជតិ ហេតុបច្ចយា. ចិត្តសហភុំ កុសលំ ធម្មំ បដិច្ច នោចិត្តសហភូ កុសលោ ធម្មោ ឧប្បជ្ជតិ ហេតុបច្ចយា. ចិត្តសហភុំ កុសលំ ធម្មំ បដិច្ច ចិត្តសហភូ កុសលោ ច នោចិត្តសហភូ កុសលោ ច ធម្មា ឧប្បជ្ជន្តិ ហេតុបច្ចយា. (៣)

នោចិត្តសហភុំ កុសលំ ធម្មំ បដិច្ច ចិត្តសហភូ កុសលោ ធម្មោ ឧប្បជ្ជតិ ហេតុបច្ចយា. (១)

ចិត្តសហភុំ កុសលញ្ច នោចិត្តសហភុំ កុសលញ្ច ធម្មំ បដិច្ច ចិត្តសហភូ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៥៤. ហេតុយា បញ្ច, អារម្មណេ បញ្ច…បេ… អវិគតេ បញ្ច (សំខិត្តំ). (សហជាតវារម្បិ…បេ… បញ្ហាវារម្បិ វិត្ថារេតព្ពំ).

៥៥. ចិត្តសហភុំ អកុសលំ ធម្មំ បដិច្ច ចិត្តសហភូ អកុសលោ ធម្មោ ឧប្បជ្ជតិ ហេតុបច្ចយា… តីណិ.

នោចិត្តសហភុំ អកុសលំ ធម្មំ បដិច្ច ចិត្តសហភូ អកុសលោ ធម្មោ ឧប្បជ្ជតិ ហេតុបច្ចយា. (១)

ចិត្តសហភុំ អកុសលញ្ច នោចិត្តសហភុំ អកុសលញ្ច ធម្មំ បដិច្ច ចិត្តសហភូ អកុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៥៦. ហេតុយា បញ្ច, អារម្មណេ បញ្ច…បេ… អវិគតេ បញ្ច (សំខិត្តំ).

(សហជាតវារម្បិ…បេ… បញ្ហាវារម្បិ វិត្ថារេតព្ពំ.)

៥៧. ចិត្តសហភុំ អព្យាកតំ ធម្មំ បដិច្ច ចិត្តសហភូ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

នោចិត្តសហភុំ អព្យាកតំ ធម្មំ បដិច្ច នោចិត្តសហភូ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

ចិត្តសហភុំ អព្យាកតញ្ច នោចិត្តសហភុំ អព្យាកតញ្ច ធម្មំ បដិច្ច ចិត្តសហភូ អព្យាកតោ ធម្មោ ឧប្បជ្ជតិ ហេតុបច្ចយា… តីណិ (សំខិត្តំ).

៥៨. ហេតុយា នវ, អារម្មណេ នវ…បេ… អវិគតេ នវ. (សំខិត្តំ. យថា ចេតសិកទុកមូលា តីណិ គមនា, ឯវំ ឥមេបិ តីណិ គមនា កាតព្ពា. សហជាតវារម្បិ…បេ… បញ្ហាវារម្បិ វិត្ថារេតព្ពំ.)

៦២-១. ចិត្តានុបរិវត្តិទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

៥៩. ចិត្តានុបរិវត្តិំ កុសលំ ធម្មំ បដិច្ច ចិត្តានុបរិវត្តី កុសលោ ធម្មោ ឧប្បជ្ជតិ ហេតុបច្ចយា… តីណិ.

នោចិត្តានុបរិវត្តិំ កុសលំ ធម្មំ បដិច្ច ចិត្តានុបរិវត្តី កុសលោ ធម្មោ ឧប្បជ្ជតិ ហេតុបច្ចយា. (១)

ចិត្តានុបរិវត្តិំ កុសលញ្ច នោចិត្តានុបរិវត្តិំ កុសលញ្ច ធម្មំ បដិច្ច ចិត្តានុបរិវត្តី កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)