១. វិភង្គវារោ

ហេតុបច្ចយោ

១០៦. ចេតសិកំ ធម្មំ បច្ចយា ចេតសិកោ ធម្មោ ឧប្បជ្ជតិ ហេតុបច្ចយា… តីណិ (បដិច្ចសទិសា).

អចេតសិកំ ធម្មំ បច្ចយា អចេតសិកោ ធម្មោ ឧប្បជ្ជតិ ហេតុបច្ចយា – ចិត្តំ បច្ចយា ចិត្តសមុដ្ឋានំ រូបំ, វត្ថុំ បច្ចយា ចិត្តំ; បដិសន្ធិក្ខណេ ចិត្តំ បច្ចយា កដត្តារូបំ, ចិត្តំ បច្ចយា វត្ថុ, វត្ថុំ បច្ចយា ចិត្តំ, ឯកំ មហាភូតំ…បេ…. (១)

អចេតសិកំ ធម្មំ បច្ចយា ចេតសិកោ ធម្មោ ឧប្បជ្ជតិ ហេតុបច្ចយា – ចិត្តំ បច្ចយា សម្បយុត្តកា ខន្ធា, វត្ថុំ បច្ចយា ចេតសិកា ខន្ធា (បដិសន្ធិក្ខណេ ទ្វេបិ កាតព្ពា). (២)

អចេតសិកំ ធម្មំ បច្ចយា ចេតសិកោ ច អចេតសិកោ ច ធម្មា ឧប្បជ្ជន្តិ ហេតុបច្ចយា – ចិត្តំ បច្ចយា សម្បយុត្តកា ខន្ធា ចិត្តសមុដ្ឋានញ្ច រូបំ, វត្ថុំ បច្ចយា ចិត្តញ្ច សម្បយុត្តកា ច ខន្ធា (បដិសន្ធិក្ខណេ ទ្វេបិ កាតព្ពា). (៣)

១០៧. ចេតសិកញ្ច អចេតសិកញ្ច ធម្មំ បច្ចយា ចេតសិកោ ធម្មោ ឧប្បជ្ជតិ ហេតុបច្ចយា – ចេតសិកំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា, ទ្វេ ខន្ធេ ច…បេ… ចេតសិកំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា, ទ្វេ ខន្ធេ ច…បេ… (បដិសន្ធិក្ខណេ ទ្វេបិ កាតព្ពា). (១)

ចេតសិកញ្ច អចេតសិកញ្ច ធម្មំ បច្ចយា អចេតសិកោ ធម្មោ ឧប្បជ្ជតិ ហេតុបច្ចយា – ចេតសិកេ ខន្ធេ ច ចិត្តញ្ច បច្ចយា ចិត្តសមុដ្ឋានំ រូបំ, ចេតសិកេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ, ចេតសិកេ ខន្ធេ ច វត្ថុញ្ច បច្ចយា ចិត្តំ (បដិសន្ធិក្ខណេ តីណិបិ កាតព្ពា). (២)

ចេតសិកញ្ច អចេតសិកញ្ច ធម្មំ បច្ចយា ចេតសិកោ ច អចេតសិកោ ច ធម្មា ឧប្បជ្ជន្តិ ហេតុបច្ចយា – ចេតសិកំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ ច…បេ… ចេតសិកំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា ចិត្តញ្ច, ទ្វេ ខន្ធេ ច…បេ… (បដិសន្ធិក្ខណេ ទ្វេបិ កាតព្ពា). (៣)

អារម្មណបច្ចយោ

១០៨. ចេតសិកំ ធម្មំ បច្ចយា ចេតសិកោ ធម្មោ ឧប្បជ្ជតិ អារម្មណបច្ចយា… តីណិ (បដិច្ចសទិសា).

អចេតសិកំ ធម្មំ បច្ចយា អចេតសិកោ ធម្មោ ឧប្បជ្ជតិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា ចិត្តំ; បដិសន្ធិក្ខណេ…បេ…. (១)

អចេតសិកំ ធម្មំ បច្ចយា ចេតសិកោ ធម្មោ ឧប្បជ្ជតិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណសហគតា ខន្ធា…បេ… កាយាយតនំ បច្ចយា…បេ… ចិត្តំ បច្ចយា សម្បយុត្តកា ខន្ធា, វត្ថុំ បច្ចយា ចេតសិកា ខន្ធា (បដិសន្ធិក្ខណេ ទ្វេបិ កាតព្ពា). (២)

អចេតសិកំ ធម្មំ បច្ចយា ចេតសិកោ ច អចេតសិកោ ច ធម្មា ឧប្បជ្ជន្តិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ សម្បយុត្តកា ច ខន្ធា…បេ… កាយាយតនំ បច្ចយា…បេ… វត្ថុំ បច្ចយា ចិត្តំ សម្បយុត្តកា ច ខន្ធា (បដិសន្ធិក្ខណេ ឯកំ). (៣)

១០៩. ចេតសិកញ្ច អចេតសិកញ្ច ធម្មំ បច្ចយា ចេតសិកោ ធម្មោ ឧប្បជ្ជតិ អារម្មណបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខុវិញ្ញាណញ្ច បច្ចយា ទ្វេ ខន្ធា, ទ្វេ ខន្ធេ ច…បេ… ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច បច្ចយា ទ្វេ ខន្ធា, ទ្វេ ខន្ធេ ច…បេ… កាយវិញ្ញាណសហគតំ…បេ… ចេតសិកំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា, ទ្វេ ខន្ធេ ច…បេ… ចេតសិកំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា, ទ្វេ ខន្ធេ ច…បេ… (បដិសន្ធិក្ខណេ ទ្វេ). (១)

ចេតសិកញ្ច អចេតសិកញ្ច ធម្មំ បច្ចយា អចេតសិកោ ធម្មោ ឧប្បជ្ជតិ អារម្មណបច្ចយា – ចក្ខុវិញ្ញាណសហគតេ ខន្ធេ ច ចក្ខាយតនញ្ច បច្ចយា ចក្ខុវិញ្ញាណំ…បេ… កាយវិញ្ញាណសហគតេ…បេ… ចេតសិកេ ខន្ធេ ច វត្ថុញ្ច បច្ចយា ចិត្តំ (បដិសន្ធិក្ខណេ ឯកំ). (២)

ចេតសិកញ្ច អចេតសិកញ្ច ធម្មំ បច្ចយា ចេតសិកោ ច អចេតសិកោ ច ធម្មា ឧប្បជ្ជន្តិ អារម្មណបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច បច្ចយា ទ្វេ ខន្ធា ចក្ខុវិញ្ញាណញ្ច, ទ្វេ ខន្ធេ ច…បេ… ចេតសិកំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា ចិត្តញ្ច, ទ្វេ ខន្ធេ ច…បេ… (បដិសន្ធិក្ខណេ ឯកំ, សំខិត្តំ). (៣)