១. វិភង្គវារោ

នហេតុបច្ចយោ

៦. សារម្មណំ ធម្មំ បដិច្ច សារម្មណោ ធម្មោ ឧប្បជ្ជតិ នហេតុបច្ចយា – អហេតុកំ សារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

សារម្មណំ ធម្មំ បដិច្ច អនារម្មណោ ធម្មោ ឧប្បជ្ជតិ នហេតុបច្ចយា – អហេតុកេ សារម្មណេ ខន្ធេ បដិច្ច ចិត្តសមុដ្ឋានំ រូបំ; អហេតុកបដិសន្ធិក្ខណេ…បេ…. (២)

សារម្មណំ ធម្មំ បដិច្ច សារម្មណោ ច អនារម្មណោ ច ធម្មា ឧប្បជ្ជន្តិ នហេតុបច្ចយា – អហេតុកំ សារម្មណំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ…. (៣)

៧. អនារម្មណំ ធម្មំ បដិច្ច អនារម្មណោ ធម្មោ ឧប្បជ្ជតិ នហេតុបច្ចយា – ឯកំ មហាភូតំ…បេ… អសញ្ញសត្តានំ ឯកំ មហាភូតំ…បេ…. (១)

អនារម្មណំ ធម្មំ បដិច្ច សារម្មណោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច សារម្មណា ខន្ធា. (២)

អនារម្មណំ ធម្មំ បដិច្ច សារម្មណោ ច អនារម្មណោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច សារម្មណា ខន្ធា, មហាភូតេ បដិច្ច កដត្តារូបំ. (៣)

៨. សារម្មណញ្ច អនារម្មណញ្ច ធម្មំ បដិច្ច សារម្មណោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ សារម្មណំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ ច…បេ…. (១)

សារម្មណញ្ច អនារម្មណញ្ច ធម្មំ បដិច្ច អនារម្មណោ ធម្មោ ឧប្បជ្ជតិ នហេតុបច្ចយា – អហេតុកេ សារម្មណេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ; អហេតុកបដិសន្ធិក្ខណេ…បេ…. (២)

សារម្មណញ្ច អនារម្មណញ្ច ធម្មំ បដិច្ច សារម្មណោ ច អនារម្មណោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ សារម្មណំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ ច…បេ… សារម្មណេ ខន្ធេ ច មហាភូតេ ច បដិច្ច កដត្តារូបំ. (៣)

នអារម្មណបច្ចយោ

៩. សារម្មណំ ធម្មំ បដិច្ច អនារម្មណោ ធម្មោ ឧប្បជ្ជតិ នអារម្មណបច្ចយា – សារម្មណេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (១)

អនារម្មណំ ធម្មំ បដិច្ច អនារម្មណោ ធម្មោ ឧប្បជ្ជតិ នអារម្មណបច្ចយា (យាវ អសញ្ញសត្តា). (១)

សារម្មណញ្ច អនារម្មណញ្ច ធម្មំ បដិច្ច អនារម្មណោ ធម្មោ ឧប្បជ្ជតិ នអារម្មណបច្ចយា – សារម្មណេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… (សំខិត្តំ). (១)