១. វិភង្គវារោ

ហេតុបច្ចយោ

៧០. នោចិត្តោ ធម្មោ នោចិត្តស្ស ធម្មស្ស ហេតុបច្ចយេន បច្ចយោ – នោចិត្តា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

នោចិត្តោ ធម្មោ ចិត្តស្ស ធម្មស្ស ហេតុបច្ចយេន បច្ចយោ – នោចិត្តា ហេតូ ចិត្តស្ស ហេតុបច្ចយេន បច្ចយោ; បដិសន្ធិក្ខណេ…បេ…. (២)

នោចិត្តោ ធម្មោ ចិត្តស្ស ច នោចិត្តស្ស ច ធម្មស្ស ហេតុបច្ចយេន បច្ចយោ – នោចិត្តា ហេតូ សម្បយុត្តកានំ ខន្ធានំ ចិត្តស្ស ច ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (៣)

អារម្មណបច្ចយោ

៧១. ចិត្តោ ធម្មោ ចិត្តស្ស ធម្មស្ស អារម្មណបច្ចយេន បច្ចយោ – ចិត្តំ អារព្ភ ចិត្តំ ឧប្បជ្ជតិ. (មូលំ កាតព្ពំ) ចិត្តំ អារព្ភ នោចិត្តា ខន្ធា ឧប្បជ្ជន្តិ. (មូលំ កាតព្ពំ) ចិត្តំ អារព្ភ ចិត្តញ្ច សម្បយុត្តកា ច ខន្ធា ឧប្បជ្ជន្តិ. (៣)

៧២. នោចិត្តោ ធម្មោ នោចិត្តស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ…បេ… ឧបោសថកម្មំ កត្វា តំ បច្ចវេក្ខតិ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ, បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ. និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; អរិយា នោចិត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ, ចក្ខុំ…បេ… វត្ថុំ នោចិត្តេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. ចេតោបរិយញាណេន នោចិត្តសមង្គិស្ស ចិត្តំ ជានាតិ, អាកាសានញ្ចាយតនំ…បេ… អាកិញ្ចញ្ញាយតនំ…បេ… រូបាយតនំ ចក្ខុវិញ្ញាណសហគតានំ ខន្ធានំ…បេ… ផោដ្ឋព្ពាយតនំ កាយវិញ្ញាណសហគតានំ ខន្ធានំ…បេ… នោចិត្តា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នោចិត្តោ ធម្មោ ចិត្តស្ស ធម្មស្ស អារម្មណបច្ចយេន បច្ចយោ – ទានំ ទត្វា…បេ… (បឋមគមនសទិសំ និន្នានាករណំ, ឥមំ នានំ) រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… នោចិត្តា ខន្ធា ឥទ្ធិវិធញាណស្ស…បេ… អាវជ្ជនាយ អារម្មណបច្ចយេន បច្ចយោ. (២)

នោចិត្តោ ធម្មោ ចិត្តស្ស ច នោចិត្តស្ស ច ធម្មស្ស អារម្មណបច្ចយេន បច្ចយោ – ទានំ ទត្វា…បេ… (បឋមគមនសទិសំ និន្នានាករណំ, ឥមំ នានំ), រូបាយតនំ ចក្ខុវិញ្ញាណស្ស សម្បយុត្តកានញ្ច ខន្ធានំ…បេ… ផោដ្ឋព្ពាយតនំ កាយវិញ្ញាណស្ស សម្បយុត្តកានញ្ច ខន្ធានំ…បេ… នោចិត្តា ខន្ធា ឥទ្ធិវិធញាណស្ស…បេ… អាវជ្ជនាយ អារម្មណបច្ចយេន បច្ចយោ. (៣)

ចិត្តោ ច នោចិត្តោ ច ធម្មា ចិត្តស្ស ធម្មស្ស អារម្មណបច្ចយេន បច្ចយោ – ចិត្តញ្ច សម្បយុត្តកេ ច ខន្ធេ អារព្ភ ចិត្តំ ឧប្បជ្ជតិ… តីណិ.

អធិបតិបច្ចយោ

៧៣. ចិត្តោ ធម្មោ ចិត្តស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ចិត្តំ គរុំ កត្វា ចិត្តំ ឧប្បជ្ជតិ. (១)

ចិត្តោ ធម្មោ នោចិត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ចិត្តំ គរុំ កត្វា នោចិត្តា ខន្ធា ឧប្បជ្ជន្តិ. សហជាតាធិបតិ – ចិត្តាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (២)

ចិត្តោ ធម្មោ ចិត្តស្ស ច នោចិត្តស្ស ច ធម្មស្ស អធិបតិបច្ចយេន បច្ចយោ. អារម្មណាធិបតិ – ចិត្តំ គរុំ កត្វា ចិត្តញ្ច សម្បយុត្តកា ច ខន្ធា ឧប្បជ្ជន្តិ. (៣)

៧៤. នោចិត្តោ ធម្មោ នោចិត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ, បុព្ពេ…បេ… ឈានា…បេ… អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស, អធិបតិបច្ចយេន បច្ចយោ; ចក្ខុំ…បេ… វត្ថុំ នោចិត្តេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នោចិត្តាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នោចិត្តោ ធម្មោ ចិត្តស្ស ធម្មស្ស អធិបតិបច្ចយេន បច្ចយោ (ទ្វេបិ គមនា បឋមគមនសទិសំ និន្នានាករណំ. អារម្មណាធិបតិ សហជាតាធិបតិ កាតព្ពា). (២)

ចិត្តោ ច នោចិត្តោ ច ធម្មា ចិត្តស្ស ធម្មស្ស អធិបតិបច្ចយេន បច្ចយោ… អារម្មណាធិបតិ (តីណិបិ គរុការម្មណា កាតព្ពា, អារម្មណាធិបតិយេវ).

អនន្តរបច្ចយាទិ

៧៥. ចិត្តោ ធម្មោ ចិត្តស្ស ធម្មស្ស អនន្តរបច្ចយេន បច្ចយោ – បុរិមំ បុរិមំ ចិត្តំ បច្ឆិមស្ស បច្ឆិមស្ស ចិត្តស្ស អនន្តរបច្ចយេន បច្ចយោ. (១)

ចិត្តោ ធម្មោ នោចិត្តស្ស ធម្មស្ស អនន្តរបច្ចយេន បច្ចយោ – បុរិមំ បុរិមំ ចិត្តំ បច្ឆិមានំ បច្ឆិមានំ នោចិត្តានំ ខន្ធានំ អនន្តរបច្ចយេន បច្ចយោ; ចិត្តំ វុដ្ឋានស្ស អនន្តរបច្ចយេន បច្ចយោ. (២)

ចិត្តោ ធម្មោ ចិត្តស្ស ច នោចិត្តស្ស ច ធម្មស្ស អនន្តរបច្ចយេន បច្ចយោ – បុរិមំ បុរិមំ ចិត្តំ បច្ឆិមស្ស បច្ឆិមស្ស ចិត្តស្ស សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

៧៦. នោចិត្តោ ធម្មោ នោចិត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា នោចិត្តា ខន្ធា…បេ… ផលសមាបត្តិយា អនន្តរបច្ចយេន បច្ចយោ (ឥមេ ទ្វេ បូរេតុកាមេន កាតព្ពា, បុរិមគមនសទិសំ).

ចិត្តោ ច នោចិត្តោ ច ធម្មា ចិត្តស្ស ធម្មស្ស អនន្តរបច្ចយេន បច្ចយោ – បុរិមំ បុរិមំ ចិត្តញ្ច សម្បយុត្តកា ច ខន្ធា បច្ឆិមស្ស បច្ឆិមស្ស ចិត្តស្ស អនន្តរបច្ចយេន បច្ចយោ. (មូលំ បុច្ឆិតព្ពំ) បុរិមំ បុរិមំ ចិត្តញ្ច សម្បយុត្តកា ច ខន្ធា បច្ឆិមានំ បច្ឆិមានំ នោចិត្តានំ ខន្ធានំ អនន្តរបច្ចយេន បច្ចយោ – ចិត្តញ្ច សម្បយុត្តកា ច ខន្ធា វុដ្ឋានស្ស អនន្តរបច្ចយេន បច្ចយោ. (មូលំ បុច្ឆិតព្ពំ) បុរិមំ បុរិមំ ចិត្តញ្ច សម្បយុត្តកា ច ខន្ធា បច្ឆិមស្ស បច្ឆិមស្ស ចិត្តស្ស សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

សមនន្តរបច្ចយេន បច្ចយោ… សហជាតបច្ចយេន បច្ចយោ… អញ្ញមញ្ញបច្ចយេន បច្ចយោ (បដិច្ចវារសទិសា)… និស្សយបច្ចយេន បច្ចយោ… បញ្ច (បច្ចយវារសទិសា).

ឧបនិស្សយបច្ចយោ

៧៧. ចិត្តោ ធម្មោ ចិត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ចិត្តំ ចិត្តស្ស ឧបនិស្សយបច្ចយេន បច្ចយោ… តីណិ.

នោចិត្តោ ធម្មោ នោចិត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… មានំ ជប្បេតិ, ទិដ្ឋិំ គណ្ហាតិ; សីលំ…បេ… សេនាសនំ ឧបនិស្សាយ ទានំ ទេតិ …បេ… សង្ឃំ ភិន្ទតិ; សទ្ធា…បេ… សេនាសនំ សទ្ធាយ…បេ… មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

នោចិត្តោ ធម្មោ ចិត្តស្ស ធម្មស្ស ឧបនិស្សយបច្ចយេន បច្ចយោ (ឥមេ ទ្វេបិ បូរេតុកាមេន សព្ពត្ថ កាតព្ពា, បឋមគមនសទិសំ និន្នានាករណំ).

ចិត្តោ ច នោចិត្តោ ច ធម្មា ចិត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ចិត្តញ្ច សម្បយុត្តកា ច ខន្ធា ចិត្តស្ស ឧបនិស្សយបច្ចយេន បច្ចយោ… តីណិ.

បុរេជាតបច្ចយោ

៧៨. នោចិត្តោ ធម្មោ នោចិត្តស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណសហគតានំ ខន្ធានំ…បេ… ផោដ្ឋព្ពាយតនំ កាយវិញ្ញាណសហគតានំ ខន្ធានំ បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណសហគតានំ ខន្ធានំ…បេ… កាយាយតនំ…បេ… វត្ថុ នោចិត្តានំ ខន្ធានំ បុរេជាតបច្ចយេន បច្ចយោ. (១)

នោចិត្តោ ធម្មោ ចិត្តស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស …បេ… កាយាយតនំ កាយវិញ្ញាណស្ស…បេ… វត្ថុ ចិត្តស្ស បុរេជាតបច្ចយេន បច្ចយោ. (២)

នោចិត្តោ ធម្មោ ចិត្តស្ស ច នោចិត្តស្ស ច ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស ច សម្បយុត្តកានញ្ច ខន្ធានំ…បេ… ផោដ្ឋព្ពាយតនំ…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស សម្បយុត្តកានញ្ច ខន្ធានំ បុរេជាតបច្ចយេន បច្ចយោ…បេ… កាយាយតនំ កាយវិញ្ញាណស្ស សម្បយុត្តកានញ្ច ខន្ធានំ…បេ… វត្ថុ ចិត្តស្ស ច សម្បយុត្តកានញ្ច ខន្ធានំ បុរេជាតបច្ចយេន បច្ចយោ. (៣)

បច្ឆាជាតាសេវនបច្ចយា

៧៩. ចិត្តោ ធម្មោ នោចិត្តស្ស ធម្មស្ស បច្ឆាជាតបច្ចយេន បច្ចយោ (សំខិត្តំ). (១)

នោចិត្តោ ធម្មោ នោចិត្តស្ស ធម្មស្ស បច្ឆាជាតបច្ចយេន បច្ចយោ (សំខិត្តំ). (១)

ចិត្តោ ច នោចិត្តោ ច ធម្មា នោចិត្តស្ស ធម្មស្ស បច្ឆាជាតបច្ចយេន បច្ចយោ (សំខិត្តំ). (១)

ចិត្តោ ធម្មោ ចិត្តស្ស ធម្មស្ស អាសេវនបច្ចយេន បច្ចយោ… នវ.

កម្មបច្ចយោ

៨០. នោចិត្តោ ធម្មោ នោចិត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោចិត្តា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោចិត្តា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

នោចិត្តោ ធម្មោ ចិត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោចិត្តា ចេតនា ចិត្តស្ស កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោចិត្តា ចេតនា វិបាកស្ស ចិត្តស្ស កម្មបច្ចយេន បច្ចយោ. (២)

នោចិត្តោ ធម្មោ ចិត្តស្ស ច នោចិត្តស្ស ច ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោចិត្តា ចេតនា សម្បយុត្តកានំ ខន្ធានំ ចិត្តស្ស ច ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោចិត្តា ចេតនា វិបាកានំ ខន្ធានំ ចិត្តស្ស ច កដត្តា ច រូបានំ កម្មបច្ចយេន បច្ចយោ. (៣)

វិបាកបច្ចយាទិ

៨១. ចិត្តោ ធម្មោ នោចិត្តស្ស ធម្មស្ស វិបាកបច្ចយេន បច្ចយោ… បញ្ច… អាហារបច្ចយេន បច្ចយោ… បញ្ច… ឥន្ទ្រិយបច្ចយេន បច្ចយោ… បញ្ច. នោចិត្តោ ធម្មោ នោចិត្តស្ស ធម្មស្ស ឈានបច្ចយេន បច្ចយោ… តីណិ… មគ្គបច្ចយេន បច្ចយោ… តីណិ… សម្បយុត្តបច្ចយេន បច្ចយោ… បញ្ច.

វិប្បយុត្តបច្ចយោ

៨២. ចិត្តោ ធម្មោ នោចិត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

នោចិត្តោ ធម្មោ នោចិត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – នោចិត្តា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ នោចិត្តា ខន្ធា កដត្តារូបានំ…បេ… នោចិត្តា ខន្ធា វត្ថុស្ស វិប្បយុត្តបច្ចយេន បច្ចយោ; វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណសហគតានំ ខន្ធានំ…បេ… កាយាយតនំ កាយវិញ្ញាណសហគតានំ ខន្ធានំ…បេ… វត្ថុ នោចិត្តានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – នោចិត្តា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

នោចិត្តោ ធម្មោ ចិត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ ចិត្តស្ស វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ ចិត្តស្ស វិប្បយុត្តបច្ចយេន បច្ចយោ. (២)

នោចិត្តោ ធម្មោ ចិត្តស្ស ច នោចិត្តស្ស ច ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ ចិត្តស្ស សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ…បេ… កាយាយតនំ កាយវិញ្ញាណស្ស សម្បយុត្តកានញ្ច ខន្ធានំ…បេ… វត្ថុ ចិត្តស្ស ច សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ. (៣)

ចិត្តោ ច នោចិត្តោ ច ធម្មា នោចិត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

អត្ថិបច្ចយោ

៨៣. ចិត្តោ ធម្មោ នោចិត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

នោចិត្តោ ធម្មោ នោចិត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ). (១)

នោចិត្តោ ធម្មោ ចិត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតា – នោចិត្តា ខន្ធា ចិត្តស្ស អត្ថិបច្ចយេន បច្ចយោ; បដិសន្ធិក្ខណេ…បេ… បដិសន្ធិក្ខណេ វត្ថុ ចិត្តស្ស អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អនិច្ចតោ…បេ… (បុរេជាតសទិសំ, សំខិត្តំ). (២)

នោចិត្តោ ធម្មោ ចិត្តស្ស ច នោចិត្តស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – នោចិត្តោ ឯកោ ខន្ធោ ទ្វិន្នំ ខន្ធានំ ចិត្តស្ស ច ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ; បដិសន្ធិក្ខណេ នោចិត្តោ ឯកោ ខន្ធោ…បេ… បដិសន្ធិក្ខណេ វត្ថុ ចិត្តស្ស សម្បយុត្តកានញ្ច ខន្ធានំ អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ…បេ… (បុរេជាតសទិសំ, សំខិត្តំ). (៣)

៨៤. ចិត្តោ ច នោចិត្តោ ច ធម្មា នោចិត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – នោចិត្តោ ឯកោ ខន្ធោ ច ចិត្តញ្ច ទ្វិន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ; ទ្វេ ខន្ធា ច…បេ…. សហជាតំ – ចិត្តញ្ច វត្ថុញ្ច នោចិត្តានំ ខន្ធានំ អត្ថិបច្ចយេន បច្ចយោ (បដិសន្ធិក្ខណេបិ ទ្វេ). សហជាតំ – ចិត្តញ្ច សម្បយុត្តកា ច ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ. សហជាតំ – ចិត្តញ្ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ (បដិសន្ធិក្ខណេបិ ទ្វេ). បច្ឆាជាតំ – ចិត្តញ្ច សម្បយុត្តកា ច ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. បច្ឆាជាតំ – ចិត្តញ្ច សម្បយុត្តកា ច ខន្ធា កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតំ – ចិត្តញ្ច សម្បយុត្តកា ច ខន្ធា រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (១)