១. វិភង្គវារោ

នហេតុបច្ចយោ

៦៤. ចិត្តំ ធម្មំ បច្ចយា នោចិត្តោ ធម្មោ ឧប្បជ្ជតិ នហេតុបច្ចយា – អហេតុកំ ចិត្តំ បច្ចយា សម្បយុត្តកា ខន្ធា ចិត្តសមុដ្ឋានញ្ច រូបំ; អហេតុកបដិសន្ធិក្ខណេ…បេ… វិចិកិច្ឆាសហគតំ ឧទ្ធច្ចសហគតំ ចិត្តំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

៦៥. នោចិត្តំ ធម្មំ បច្ចយា នោចិត្តោ ធម្មោ ឧប្បជ្ជតិ នហេតុបច្ចយា – អហេតុកំ នោចិត្តំ ឯកំ ខន្ធំ បច្ចយា ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ…បេ… អហេតុកបដិសន្ធិក្ខណេ…បេ… (យាវ អសញ្ញសត្តា), ចក្ខាយតនំ បច្ចយា ចក្ខុវិញ្ញាណសហគតា ខន្ធា…បេ… កាយាយតនំ បច្ចយា កាយវិញ្ញាណសហគតា ខន្ធា, វត្ថុំ បច្ចយា អហេតុកា នោចិត្តេ ខន្ធា វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នោចិត្តំ ធម្មំ បច្ចយា ចិត្តោ ធម្មោ ឧប្បជ្ជតិ នហេតុបច្ចយា – អហេតុកេ នោចិត្តេ ខន្ធេ បច្ចយា ចិត្តំ, វត្ថុំ បច្ចយា ចិត្តំ; អហេតុកបដិសន្ធិក្ខណេ…បេ… អហេតុកបដិសន្ធិក្ខណេ វត្ថុំ បច្ចយា ចិត្តំ, ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ. (២)

នោចិត្តំ ធម្មំ បច្ចយា ចិត្តោ ច នោចិត្តោ ច ធម្មា ឧប្បជ្ជន្តិ នហេតុបច្ចយា – អហេតុកំ នោចិត្តំ ឯកំ ខន្ធំ បច្ចយា ទ្វេ ខន្ធា ចិត្តញ្ច ចិត្តសមុដ្ឋានញ្ច រូបំ, ទ្វេ ខន្ធេ…បេ… វត្ថុំ បច្ចយា ចិត្តញ្ច សម្បយុត្តកា ច ខន្ធា; អហេតុកបដិសន្ធិក្ខណេ…បេ… អហេតុកបដិសន្ធិក្ខណេ វត្ថុំ បច្ចយា ចិត្តញ្ច សម្បយុត្តកា ច ខន្ធា, ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ. (៣)

ចិត្តញ្ច នោចិត្តញ្ច ធម្មំ បច្ចយា នោចិត្តោ ធម្មោ ឧប្បជ្ជតិ នហេតុបច្ចយា – អហេតុកំ នោចិត្តំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ ច…បេ… ចិត្តញ្ច វត្ថុញ្ច បច្ចយា នោចិត្តា ខន្ធា; អហេតុកបដិសន្ធិក្ខណេ…បេ… អហេតុកបដិសន្ធិក្ខណេ ចិត្តញ្ច វត្ថុញ្ច បច្ចយា នោចិត្តា ខន្ធា, ចក្ខាយតនញ្ច ចក្ខុវិញ្ញាណញ្ច បច្ចយា ចក្ខុវិញ្ញាណសហគតា ខន្ធា…បេ… កាយាយតនំ ច…បេ… វិចិកិច្ឆាសហគតេ ឧទ្ធច្ចសហគតេ ខន្ធេ ច ចិត្តញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១) (សំខិត្តំ.)