១. វិភង្គវារោ

នហេតុបច្ចយោ

៥៣. ចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នហេតុបច្ចយា – អហេតុកំ ចិត្តំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ; អហេតុកបដិសន្ធិក្ខណេ ចិត្តំ…បេ… វិចិកិច្ឆាសហគតំ ឧទ្ធច្ចសហគតំ ចិត្តំ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

នោចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នហេតុបច្ចយា – អហេតុកំ នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ…បេ… អហេតុកបដិសន្ធិក្ខណេ …បេ… (យាវ អសញ្ញសត្តា) វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

នោចិត្តំ ធម្មំ បដិច្ច ចិត្តោ ធម្មោ ឧប្បជ្ជតិ នហេតុបច្ចយា – អហេតុកេ នោចិត្តេ ខន្ធេ បដិច្ច ចិត្តំ; អហេតុកបដិសន្ធិក្ខណេ នោចិត្តេ ខន្ធេ បដិច្ច ចិត្តំ; អហេតុកបដិសន្ធិក្ខណេ វត្ថុំ បដិច្ច ចិត្តំ. (២)

នោចិត្តំ ធម្មំ បដិច្ច ចិត្តោ ច នោចិត្តោ ច ធម្មា ឧប្បជ្ជន្តិ នហេតុបច្ចយា – អហេតុកំ នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តញ្ច ចិត្តសមុដ្ឋានញ្ច រូបំ, ទ្វេ ខន្ធេ…បេ… អហេតុកបដិសន្ធិក្ខណេ…បេ… អហេតុកបដិសន្ធិក្ខណេ វត្ថុំ បដិច្ច ចិត្តញ្ច សម្បយុត្តកា ច ខន្ធា. (៣)

ចិត្តញ្ច នោចិត្តញ្ច ធម្មំ បដិច្ច នោចិត្តោ ធម្មោ ឧប្បជ្ជតិ នហេតុបច្ចយា – អហេតុកំ នោចិត្តំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ ច…បេ… អហេតុកបដិសន្ធិក្ខណេ នោចិត្តំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា កដត្តា ច រូបំ, ទ្វេ ខន្ធេ ច…បេ… អហេតុកបដិសន្ធិក្ខណេ ចិត្តញ្ច វត្ថុញ្ច បដិច្ច នោចិត្តា ខន្ធា, វិចិកិច្ឆាសហគតំ ឧទ្ធច្ចសហគតំ ចិត្តញ្ច សម្បយុត្តកេ ច ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយោ

៥៤. ចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នអារម្មណបច្ចយា – ចិត្តំ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (១)

នោចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នអារម្មណបច្ចយា – នោចិត្តេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… (យាវ អសញ្ញសត្តា). (២)

ចិត្តញ្ច នោចិត្តញ្ច ធម្មំ បដិច្ច នោចិត្តោ ធម្មោ ឧប្បជ្ជតិ នអារម្មណបច្ចយា – ចិត្តញ្ច សម្បយុត្តកេ ច ខន្ធេ បដិច្ច ចិត្តសមុដ្ឋានំ រូបំ, ចិត្តញ្ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ ចិត្តញ្ច សម្បយុត្តកេ ច ខន្ធេ បដិច្ច កដត្តារូបំ, ចិត្តញ្ច មហាភូតេ ច បដិច្ច កដត្តារូបំ. (១)

នអធិបតិបច្ចយាទិ

៥៥. ចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នអធិបតិបច្ចយា … បញ្ច… នអនន្តរបច្ចយា…បេ… នឧបនិស្សយបច្ចយា… តីណិ.

នបុរេជាតបច្ចយាទិ

៥៦. ចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នបុរេជាតបច្ចយា – អរូបេ ចិត្តំ បដិច្ច សម្បយុត្តកា ខន្ធា, ចិត្តំ បដិច្ច ចិត្តសមុដ្ឋានំ រូបំ; បដិសន្ធិក្ខណេ ចិត្តំ បដិច្ច សម្បយុត្តកា ខន្ធា កដត្តា ច រូបំ. (១)

នោចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នបុរេជាតបច្ចយា – អរូបេ នោចិត្តំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ…បេ… នោចិត្តេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… (យាវ អសញ្ញសត្តា). (១)

នោចិត្តំ ធម្មំ បដិច្ច ចិត្តោ ធម្មោ ឧប្បជ្ជតិ នបុរេជាតបច្ចយា – អរូបេ នោចិត្តេ ខន្ធេ បដិច្ច ចិត្តំ; បដិសន្ធិក្ខណេ… វត្ថុំ បដិច្ច ចិត្តំ. (២)

នោចិត្តំ ធម្មំ បដិច្ច ចិត្តោ ច នោចិត្តោ ច ធម្មា ឧប្បជ្ជន្តិ នបុរេជាតបច្ចយា – អរូបេ នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តញ្ច, ទ្វេ ខន្ធេ…បេ… បដិសន្ធិក្ខណេ វត្ថុំ បដិច្ច ចិត្តញ្ច សម្បយុត្តកា ច ខន្ធា. (៣)

ចិត្តញ្ច នោចិត្តញ្ច ធម្មំ បដិច្ច នោចិត្តោ ធម្មោ ឧប្បជ្ជតិ នបុរេជាតបច្ចយា – អរូបេ នោចិត្តំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា, ទ្វេ ខន្ធេ ច…បេ… នោចិត្តេ ខន្ធេ ច ចិត្តញ្ច បដិច្ច ចិត្តសមុដ្ឋានំ រូបំ, ចិត្តញ្ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ ចិត្តញ្ច វត្ថុញ្ច បដិច្ច នោចិត្តា ខន្ធា; បដិសន្ធិក្ខណេ ចិត្តញ្ច សម្បយុត្តកេ ច ខន្ធេ បដិច្ច កដត្តារូបំ, ចិត្តញ្ច មហាភូតេ ច បដិច្ច កដត្តារូបំ. (១)

នបច្ឆាជាតបច្ចយា… នអាសេវនបច្ចយា….

នកម្មបច្ចយោ

៥៧. ចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នកម្មបច្ចយា – ចិត្តំ បដិច្ច សម្បយុត្តកា ចេតនា. (១)

នោចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ នកម្មបច្ចយា – នោចិត្តេ ខន្ធេ បដិច្ច សម្បយុត្តកា ចេតនា; ពាហិរំ… អាហារសមុដ្ឋានំ… ឧតុសមុដ្ឋានំ…បេ…. (១)

ចិត្តញ្ច នោចិត្តញ្ច ធម្មំ បដិច្ច នោចិត្តោ ធម្មោ ឧប្បជ្ជតិ នកម្មបច្ចយា – នោចិត្តេ ខន្ធេ ច ចិត្តញ្ច បដិច្ច សម្បយុត្តកា ចេតនា (សំខិត្តំ). (១)