១. វិភង្គវារោ

ហេតុបច្ចយោ

៥០. ចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ ហេតុបច្ចយា – ចិត្តំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ ចិត្តំ បដិច្ច សម្បយុត្តកា ខន្ធា កដត្តា ច រូបំ. (១)

នោចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ ហេតុបច្ចយា – នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ បដិច្ច ឯកោ ខន្ធោ ចិត្តសមុដ្ឋានញ្ច រូបំ; បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ បដិច្ច…បេ…. (១)

នោចិត្តំ ធម្មំ បដិច្ច ចិត្តោ ធម្មោ ឧប្បជ្ជតិ ហេតុបច្ចយា – នោចិត្តេ ខន្ធេ បដិច្ច ចិត្តំ; បដិសន្ធិក្ខណេ នោចិត្តេ ខន្ធេ បដិច្ច ចិត្តំ; បដិសន្ធិក្ខណេ វត្ថុំ បដិច្ច ចិត្តំ. (២)

នោចិត្តំ ធម្មំ បដិច្ច ចិត្តោ ច នោចិត្តោ ច ធម្មា ឧប្បជ្ជន្តិ ហេតុបច្ចយា – នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តញ្ច ចិត្តសមុដ្ឋានញ្ច រូបំ, ទ្វេ ខន្ធេ…បេ… បដិសន្ធិក្ខណេ នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តញ្ច កដត្តា ច រូបំ, ទ្វេ ខន្ធេ បដិច្ច ឯកោ ខន្ធោ ចិត្តញ្ច កដត្តា ច រូបំ; បដិសន្ធិក្ខណេ វត្ថុំ បដិច្ច ចិត្តញ្ច សម្បយុត្តកា ច ខន្ធា. (៣)

ចិត្តញ្ច នោចិត្តញ្ច ធម្មំ បដិច្ច នោចិត្តោ ធម្មោ ឧប្បជ្ជតិ ហេតុបច្ចយា – នោចិត្តំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ ច…បេ… ចិត្តញ្ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ នោចិត្តំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា កដត្តា ច រូបំ, ទ្វេ ខន្ធេ…បេ… បដិសន្ធិក្ខណេ ចិត្តញ្ច វត្ថុញ្ច បដិច្ច នោចិត្តា ខន្ធា; បដិសន្ធិក្ខណេ ចិត្តញ្ច មហាភូតេ ច បដិច្ច កដត្តារូបំ. (១)

អារម្មណបច្ចយោ

៥១. ចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ អារម្មណបច្ចយា – ចិត្តំ បដិច្ច សម្បយុត្តកា ខន្ធា; បដិសន្ធិក្ខណេ…បេ…. (១)

នោចិត្តំ ធម្មំ បដិច្ច នោចិត្តោ ធម្មោ ឧប្បជ្ជតិ អារម្មណបច្ចយា – នោចិត្តំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ…បេ… បដិសន្ធិក្ខណេ…បេ… បដិសន្ធិក្ខណេ វត្ថុំ បដិច្ច ខន្ធា. (១)

នោចិត្តំ ធម្មំ បដិច្ច ចិត្តោ ធម្មោ ឧប្បជ្ជតិ អារម្មណបច្ចយា – នោចិត្តេ ខន្ធេ បដិច្ច ចិត្តំ; បដិសន្ធិក្ខណេ នោចិត្តេ ខន្ធេ បដិច្ច ចិត្តំ; បដិសន្ធិក្ខណេ វត្ថុំ បដិច្ច ចិត្តំ. (២)

នោចិត្តំ ធម្មំ បដិច្ច ចិត្តោ ច នោចិត្តោ ច ធម្មា ឧប្បជ្ជន្តិ អារម្មណបច្ចយា – នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តញ្ច, ទ្វេ ខន្ធេ បដិច្ច…បេ… បដិសន្ធិក្ខណេ នោចិត្តំ ឯកំ ខន្ធំ បដិច្ច ទ្វេ ខន្ធា ចិត្តញ្ច, ទ្វេ ខន្ធេ…បេ… បដិសន្ធិក្ខណេ វត្ថុំ បដិច្ច ចិត្តញ្ច សម្បយុត្តកា ច ខន្ធា. (៣)

ចិត្តញ្ច នោចិត្តញ្ច ធម្មំ បដិច្ច នោចិត្តោ ធម្មោ ឧប្បជ្ជតិ អារម្មណបច្ចយា – នោចិត្តំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា, ទ្វេ ខន្ធេ ច…បេ… បដិសន្ធិក្ខណេ…បេ… បដិសន្ធិក្ខណេ ចិត្តញ្ច វត្ថុញ្ច បដិច្ច នោចិត្តា ខន្ធា. (១) (សំខិត្តំ).