១. វិភង្គវារោ

នហេតុបច្ចយោ

៤៣៨. ឧបាទិន្នំ ធម្មំ បច្ចយា ឧបាទិន្នោ ធម្មោ ឧប្បជ្ជតិ នហេតុបច្ចយា – អហេតុកំ ឧបាទិន្នំ ឯកំ ខន្ធំ បច្ចយា តយោ ខន្ធា…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា, ឯកំ មហាភូតំ…បេ… មហាភូតេ បច្ចយា កដត្តារូបំ ឧបាទារូបំ, អសញ្ញសត្តានំ ឯកំ មហាភូតំ…បេ… ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ…បេ… វត្ថុំ បច្ចយា អហេតុកា ឧបាទិន្នា ខន្ធា. (១)

ឧបាទិន្នំ ធម្មំ បច្ចយា អនុបាទិន្នោ ធម្មោ ឧប្បជ្ជតិ នហេតុបច្ចយា – អហេតុកេ ឧបាទិន្នេ ខន្ធេ បច្ចយា ចិត្តសមុដ្ឋានំ រូបំ, វត្ថុំ បច្ចយា អហេតុកា អនុបាទិន្នា ខន្ធា, វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

ឧបាទិន្នំ ធម្មំ បច្ចយា ឧបាទិន្នោ ច អនុបាទិន្នោ ច ធម្មា ឧប្បជ្ជន្តិ នហេតុបច្ចយា – អហេតុកំ ឧបាទិន្នំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៤៣៩. អនុបាទិន្នំ ធម្មំ បច្ចយា អនុបាទិន្នោ ធម្មោ ឧប្បជ្ជតិ នហេតុបច្ចយា – អហេតុកំ អនុបាទិន្នំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

ឧបាទិន្នញ្ច អនុបាទិន្នញ្ច ធម្មំ បច្ចយា អនុបាទិន្នោ ធម្មោ ឧប្បជ្ជតិ នហេតុបច្ចយា – អហេតុកេ ឧបាទិន្នេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ, អហេតុកំ អនុបាទិន្នំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១) (សំខិត្តំ.)