១. វិភង្គវារោ

ហេតុបច្ចយោ

៣៩៤. នោឧបាទា ធម្មោ នោឧបាទា ធម្មស្ស ហេតុបច្ចយេន បច្ចយោ – នោឧបាទា ហេតូ សម្បយុត្តកានំ ខន្ធានំ នោឧបាទា ច ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

នោឧបាទា ធម្មោ ឧបាទា ធម្មស្ស ហេតុបច្ចយេន បច្ចយោ – នោឧបាទា ហេតូ ឧបាទា ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (២)

នោឧបាទា ធម្មោ ឧបាទា ច នោឧបាទា ច ធម្មស្ស ហេតុបច្ចយេន បច្ចយោ – នោឧបាទា ហេតូ សម្បយុត្តកានំ ខន្ធានំ ឧបាទា ច នោឧបាទា ច ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (៣)

អារម្មណបច្ចយោ

៣៩៥. ឧបាទា ធម្មោ នោឧបាទា ធម្មស្ស អារម្មណបច្ចយេន បច្ចយោ – ចក្ខុំ…បេ… កាយំ… រូបេ…បេ… រសេ វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… រសាយតនំ ជិវ្ហាវិញ្ញាណស្ស អារម្មណបច្ចយេន បច្ចយោ, ឧបាទា ខន្ធា ឥទ្ធិវិធញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នោឧបាទា ធម្មោ នោឧបាទា ធម្មស្ស អារម្មណបច្ចយេន បច្ចយោ – ទានំ…បេ… សីលំ …បេ… ឧបោសថកម្មំ កត្វា តំ បច្ចវេក្ខតិ, អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ; បុព្ពេ…បេ… ឈានា…បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ…បេ… និព្ពានំ…បេ… និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ. អរិយា បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ…បេ… បុព្ពេ…បេ… ផោដ្ឋព្ពេ នោឧបាទា ខន្ធេ អនិច្ចតោ…បេ… ទោមនស្សំ ឧប្បជ្ជតិ; ចេតោបរិយញាណេន នោឧបាទាចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… ផោដ្ឋព្ពាយតនំ កាយវិញ្ញាណស្ស អារម្មណបច្ចយេន បច្ចយោ; នោឧបាទា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អធិបតិបច្ចយោ

៣៩៦. ឧបាទា ធម្មោ នោឧបាទា ធម្មស្ស អធិបតិបច្ចយេន បច្ចយោ. អារម្មណាធិបតិ – ចក្ខុំ…បេ… កាយំ… រូបេ…បេ… រសេ វត្ថុំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (១)

នោឧបាទា ធម្មោ នោឧបាទា ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… អរិយា មគ្គា វុដ្ឋហិត្វា មគ្គំ គរុំ កត្វា…បេ… ផលំ…បេ… និព្ពានំ គរុំ កត្វា បច្ចវេក្ខន្តិ. និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ; ផោដ្ឋព្ពេ នោឧបាទា ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នោឧបាទាធិបតិ សម្បយុត្តកានំ ខន្ធានំ នោឧបាទា ច ចិត្តសមុដ្ឋានានំ រូបានំ អធិបតិបច្ចយេន បច្ចយោ. (១)

នោឧបាទា ធម្មោ ឧបាទា ធម្មស្ស អធិបតិបច្ចយេន បច្ចយោ. សហជាតាធិបតិ – នោឧបាទាធិបតិ ឧបាទា ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

នោឧបាទា ធម្មោ ឧបាទា ច នោឧបាទា ច ធម្មស្ស អធិបតិបច្ចយេន បច្ចយោ. សហជាតាធិបតិ – នោឧបាទាធិបតិ សម្បយុត្តកានំ ខន្ធានំ ឧបាទា ច នោឧបាទា ច ចិត្តសមុដ្ឋានានំ រូបានំ អធិបតិបច្ចយេន បច្ចយោ. (៣)

អនន្តរបច្ចយាទិ

៣៩៧. នោឧបាទា ធម្មោ នោឧបាទា ធម្មស្ស អនន្តរបច្ចយេន បច្ចយោ – បុរិមា បុរិមា នោឧបាទា ខន្ធា បច្ឆិមានំ បច្ឆិមានំ នោឧបាទា ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… ផលសមាបត្តិយា អនន្តរបច្ចយេន បច្ចយោ. (១)

សមនន្តរបច្ចយេន បច្ចយោ… សហជាតបច្ចយេន បច្ចយោ (បដិច្ចសទិសំ)… អញ្ញមញ្ញបច្ចយេន បច្ចយោ (បដិច្ចសទិសំ)… និស្សយបច្ចយេន បច្ចយោ (បច្ចយវារេ និស្សយសទិសំ).

ឧបនិស្សយបច្ចយោ

៣៩៨. ឧបាទា ធម្មោ នោឧបាទា ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – ចក្ខុសម្បទំ…បេ… កាយសម្បទំ… វណ្ណសម្បទំ… សទ្ទសម្បទំ… គន្ធសម្បទំ… រសសម្បទំ… ភោជនំ ឧបនិស្សាយ ទានំ ទេតិ…បេ… សង្ឃំ ភិន្ទតិ, ចក្ខុសម្បទា…បេ… កាយសម្បទា… វណ្ណសម្បទា… សទ្ទសម្បទា… គន្ធសម្បទា… រសសម្បទា… ភោជនំ សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

នោឧបាទា ធម្មោ នោឧបាទា ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; សីលំ…បេ… បញ្ញំ… រាគំ …បេ… បត្ថនំ… កាយិកំ សុខំ… កាយិកំ ទុក្ខំ… ឧតុំ… សេនាសនំ ឧបនិស្សាយ ទានំ ទេតិ…បេ… សង្ឃំ ភិន្ទតិ; សទ្ធា…បេ… សេនាសនំ សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

បុរេជាតបច្ចយោ

៣៩៩. ឧបាទា ធម្មោ នោឧបាទា ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… រសាយតនំ ជិវ្ហាវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ…បេ… វត្ថុ នោឧបាទា ខន្ធានំ បុរេជាតបច្ចយេន បច្ចយោ. (១)

នោឧបាទា ធម្មោ នោឧបាទា ធម្មស្ស បុរេជាតបច្ចយេន បច្ចយោ. អារម្មណបុរេជាតំ – ផោដ្ឋព្ពេ អនិច្ចតោ…បេ… ទោមនស្សំ ឧប្បជ្ជតិ; ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. (១)

ឧបាទា ច នោឧបាទា ច ធម្មា នោឧបាទា ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. ផោដ្ឋព្ពាយតនញ្ច កាយាយតនញ្ច កាយវិញ្ញាណស្ស បុរេជាតបច្ចយេន បច្ចយោ; ផោដ្ឋព្ពាយតនញ្ច វត្ថុ ច នោឧបាទា ខន្ធានំ បុរេជាតបច្ចយេន បច្ចយោ. (១)

បច្ឆាជាតាសេវនបច្ចយា

៤០០. នោឧបាទា ធម្មោ នោឧបាទា ធម្មស្ស បច្ឆាជាតបច្ចយេន បច្ចយោ – បច្ឆាជាតា នោឧបាទា ខន្ធា បុរេជាតស្ស ឥមស្ស នោឧបាទា កាយស្ស បច្ឆាជាតបច្ចយេន បច្ចយោ. (មូលំ បុច្ឆិតព្ពំ) បច្ឆាជាតា នោឧបាទា ខន្ធា បុរេជាតស្ស ឥមស្ស ឧបាទា កាយស្ស បច្ឆាជាតបច្ចយេន បច្ចយោ. (មូលំ បុច្ឆិតព្ពំ) បច្ឆាជាតា នោឧបាទា ខន្ធា បុរេជាតស្ស ឥមស្ស ឧបាទា កាយស្ស ច នោឧបាទា កាយស្ស ច បច្ឆាជាតបច្ចយេន បច្ចយោ. (៣)

អាសេវនបច្ចយេន បច្ចយោ… ឯកំ.

កម្មបច្ចយោ

៤០១. នោឧបាទា ធម្មោ នោឧបាទា ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោឧបាទា ចេតនា សម្បយុត្តកានំ ខន្ធានំ នោឧបាទា ច ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោឧបាទា ចេតនា វិបាកានំ ខន្ធានំ នោឧបាទា ច កដត្តារូបានំ កម្មបច្ចយេន បច្ចយោ. (១)

នោឧបាទា ធម្មោ ឧបាទា ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោឧបាទា ចេតនា ឧបាទា ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោឧបាទា ចេតនា ឧបាទា កដត្តារូបានំ កម្មបច្ចយេន បច្ចយោ. (២)

នោឧបាទា ធម្មោ ឧបាទា ច នោឧបាទា ច ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោឧបាទា ចេតនា សម្បយុត្តកានំ ខន្ធានំ ឧបាទា ច នោឧបាទា ច ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោឧបាទា ចេតនា វិបាកានំ ខន្ធានំ ឧបាទា ច នោឧបាទា ច កដត្តារូបានំ កម្មបច្ចយេន បច្ចយោ. (៣)

វិបាកបច្ចយោ

៤០២. នោឧបាទា ធម្មោ នោឧបាទា ធម្មស្ស វិបាកបច្ចយេន បច្ចយោ – វិបាកោ នោឧបាទា ឯកោ ខន្ធោ តិណ្ណន្នំ ខន្ធានំ…បេ… ទ្វេ ខន្ធា…បេ… បដិសន្ធិក្ខណេ…បេ… តីណិ.

អាហារបច្ចយោ

៤០៣. ឧបាទា ធម្មោ ឧបាទា ធម្មស្ស អាហារបច្ចយេន បច្ចយោ – កពឡីការោ អាហារោ ឥមស្ស ឧបាទា កាយស្ស អាហារបច្ចយេន បច្ចយោ. (មូលំ បុច្ឆិតព្ពំ) កពឡីការោ អាហារោ ឥមស្ស នោឧបាទា កាយស្ស អាហារបច្ចយេន បច្ចយោ. (មូលំ បុច្ឆិតព្ពំ) កពឡីការោ អាហារោ ឥមស្ស ឧបាទា កាយស្ស ច នោឧបាទា កាយស្ស ច អាហារបច្ចយេន បច្ចយោ. (៣)

នោឧបាទា ធម្មោ នោឧបាទា ធម្មស្ស អាហារបច្ចយេន បច្ចយោ – នោឧបាទា អាហារា សម្បយុត្តកានំ ខន្ធានំ នោឧបាទា ច ចិត្តសមុដ្ឋានានំ រូបានំ អាហារបច្ចយេន បច្ចយោ; បដិសន្ធិក្ខណេ…បេ… (នោឧបាទាមូលកេ តីណិ, បដិសន្ធិក្ខណេ តីណិបិ កាតព្ពា). (៣)

ឥន្ទ្រិយបច្ចយោ

៤០៤. ឧបាទា ធម្មោ ឧបាទា ធម្មស្ស ឥន្ទ្រិយបច្ចយេន បច្ចយោ – រូបជីវិតិន្ទ្រិយំ ឧបាទា កដត្តារូបានំ ឥន្ទ្រិយបច្ចយេន បច្ចយោ. (មូលំ កាតព្ពំ) ចក្ខុន្ទ្រិយំ ចក្ខុវិញ្ញាណស្ស…បេ… កាយិន្ទ្រិយំ កាយវិញ្ញាណស្ស រូបជីវិតិន្ទ្រិយំ នោឧបាទា កដត្តារូបានំ ឥន្ទ្រិយបច្ចយេន បច្ចយោ. (មូលំ កាតព្ពំ) រូបជីវិតិន្ទ្រិយំ ឧបាទា ច នោឧបាទា ច កដត្តារូបានំ ឥន្ទ្រិយបច្ចយេន បច្ចយោ. (៣)

នោឧបាទា ធម្មោ នោឧបាទា ធម្មស្ស ឥន្ទ្រិយបច្ចយេន បច្ចយោ… តីណិ; បដិសន្ធិក្ខណេ…បេ….

ឧបាទា ច នោឧបាទា ច ធម្មា នោឧបាទា ធម្មស្ស ឥន្ទ្រិយបច្ចយេន បច្ចយោ – ចក្ខុន្ទ្រិយញ្ច ចក្ខុវិញ្ញាណញ្ច ចក្ខុវិញ្ញាណសហគតានំ ខន្ធានំ ឥន្ទ្រិយបច្ចយេន បច្ចយោ…បេ… កាយិន្ទ្រិយញ្ច…បេ….

ឈានបច្ចយាទិ

៤០៥. នោ ឧបាទា ធម្មោ នោឧបាទា ធម្មស្ស ឈានបច្ចយេន បច្ចយោ… តីណិ, មគ្គបច្ចយេន បច្ចយោ… តីណិ; បដិសន្ធិក្ខណេ…បេ… សម្បយុត្តបច្ចយេន បច្ចយោ… ឯកំ.

វិប្បយុត្តបច្ចយោ

៤០៦. ឧបាទា ធម្មោ នោឧបាទា ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ នោឧបាទា ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ…បេ… វត្ថុ នោឧបាទា ខន្ធានំ វិប្បយុត្តបច្ចយេន បច្ចយោ. (១)

នោឧបាទា ធម្មោ នោឧបាទា ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – នោឧបាទា ខន្ធា នោឧបាទា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ នោឧបាទា ខន្ធា នោឧបាទា កដត្តារូបានំ វិប្បយុត្តបច្ចយេន បច្ចយោ. បច្ឆាជាតា – នោឧបាទា ខន្ធា បុរេជាតស្ស ឥមស្ស នោឧបាទា កាយស្ស វិប្បយុត្តបច្ចយេន បច្ចយោ. (១)

នោឧបាទា ធម្មោ ឧបាទា ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – នោឧបាទា ខន្ធា ឧបាទា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ…បេ…. បច្ឆាជាតា – នោឧបាទា ខន្ធា បុរេជាតស្ស ឥមស្ស ឧបាទា កាយស្ស វិប្បយុត្តបច្ចយេន បច្ចយោ. (២)

នោឧបាទា ធម្មោ ឧបាទា ធម្មស្ស ច នោឧបាទា ធម្មស្ស ច វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – នោឧបាទា ខន្ធា ឧបាទា ច នោឧបាទា ច ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ…បេ…. បច្ឆាជាតា – នោឧបាទា ខន្ធា បុរេជាតស្ស ឥមស្ស ឧបាទា កាយស្ស ច នោឧបាទា កាយស្ស ច វិប្បយុត្តបច្ចយេន បច្ចយោ. (៣)

អត្ថិបច្ចយោ

៤០៧. ឧបាទា ធម្មោ ឧបាទា ធម្មស្ស អត្ថិបច្ចយេន បច្ចយោ – អាហារំ, ឥន្ទ្រិយំ. កពឡីការោ អាហារោ ឥមស្ស ឧបាទា កាយស្ស អត្ថិបច្ចយេន បច្ចយោ; រូបជីវិតិន្ទ្រិយំ ឧបាទា កដត្តារូបានំ អត្ថិបច្ចយេន បច្ចយោ. (១)

ឧបាទា ធម្មោ នោឧបាទា ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, អាហារំ, ឥន្ទ្រិយំ. សហជាតំ – បដិសន្ធិក្ខណេ វត្ថុ នោឧបាទា ខន្ធានំ អត្ថិបច្ចយេន បច្ចយោ. បុរេជាតំ – ចក្ខុំ អនិច្ចតោ…បេ… (សំខិត្តំ. បុរេជាតសទិសំ និន្នានាករណំ). កពឡីការោ អាហារោ ឥមស្ស នោឧបាទា កាយស្ស អត្ថិបច្ចយេន បច្ចយោ; រូបជីវិតិន្ទ្រិយំ នោឧបាទា កដត្តារូបានំ អត្ថិបច្ចយេន បច្ចយោ. (២)

ឧបាទា ធម្មោ ឧបាទា ធម្មស្ស ច នោឧបាទា ធម្មស្ស ច អត្ថិបច្ចយេន បច្ចយោ – អាហារំ, ឥន្ទ្រិយំ. កពឡីការោ អាហារោ ឥមស្ស ឧបាទា កាយស្ស ច នោឧបាទា កាយស្ស ច អត្ថិបច្ចយេន បច្ចយោ; រូបជីវិតិន្ទ្រិយំ ឧបាទា ច នោឧបាទា ច កដត្តារូបានំ អត្ថិបច្ចយេន បច្ចយោ. (៣)

៤០៨. នោឧបាទា ធម្មោ នោឧបាទា ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតោ – នោឧបាទា ឯកោ ខន្ធោ តិណ្ណន្នំ ខន្ធានំ នោឧបាទា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ឯកំ មហាភូតំ តិណ្ណន្នំ មហាភូតានំ អត្ថិបច្ចយេន បច្ចយោ …បេ… ទ្វេ មហាភូតា ទ្វិន្នំ មហាភូតានំ អត្ថិបច្ចយេន បច្ចយោ (យាវ អសញ្ញសត្តា). បុរេជាតំ – ផោដ្ឋព្ពេ អនិច្ចតោ…បេ… ទោមនស្សំ ឧប្បជ្ជតិ. ផោដ្ឋព្ពាយតនំ កាយវិញ្ញាណស្ស អត្ថិបច្ចយេន បច្ចយោ. បច្ឆាជាតា – នោឧបាទា ខន្ធា បុរេជាតស្ស ឥមស្ស នោឧបាទា កាយស្ស អត្ថិបច្ចយេន បច្ចយោ. (១)

នោឧបាទា ធម្មោ ឧបាទា ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – នោឧបាទា ខន្ធា ឧបាទា ចិត្តសមុដ្ឋានានំ រូបានំ អត្ថិបច្ចយេន បច្ចយោ; បដិសន្ធិក្ខណេ…បេ…. បច្ឆាជាតា – នោឧបាទា ខន្ធា បុរេជាតស្ស ឥមស្ស ឧបាទា កាយស្ស អត្ថិបច្ចយេន បច្ចយោ. (២)

នោឧបាទា ធម្មោ ឧបាទា ច នោឧបាទា ច ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតោ – នោឧបាទា ឯកោ ខន្ធោ តិណ្ណន្នំ ខន្ធានំ ឧបាទា ច នោឧបាទា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ; ទ្វេ ខន្ធា…បេ… បដិសន្ធិក្ខណេ…បេ…. បច្ឆាជាតា – នោឧបាទា ខន្ធា បុរេជាតស្ស ឥមស្ស ឧបាទា កាយស្ស ច នោឧបាទា កាយស្ស ច អត្ថិបច្ចយេន បច្ចយោ. (៣)

៤០៩. ឧបាទា ច នោឧបាទា ច ធម្មា ឧបាទា ធម្មស្ស អត្ថិបច្ចយេន បច្ចយោ – បច្ឆាជាតំ, អាហារំ, ឥន្ទ្រិយំ. បច្ឆាជាតា – នោឧបាទា ខន្ធា ច កពឡីការោ អាហារោ ច ឥមស្ស ឧបាទា កាយស្ស អត្ថិបច្ចយេន បច្ចយោ. បច្ឆាជាតា – នោឧបាទា ខន្ធា ច រូបជីវិតិន្ទ្រិយញ្ច ឧបាទា កដត្តារូបានំ អត្ថិបច្ចយេន បច្ចយោ. (១)

ឧបាទា ច នោឧបាទា ច ធម្មា នោឧបាទា ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – ចក្ខុវិញ្ញាណសហគតោ ឯកោ ខន្ធោ ច ចក្ខាយតនញ្ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… នោឧបាទា ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… បដិសន្ធិក្ខណេ នោឧបាទា ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. បុរេជាតំ – ផោដ្ឋព្ពាយតនញ្ច កាយាយតនញ្ច កាយវិញ្ញាណស្ស អត្ថិបច្ចយេន បច្ចយោ. ផោដ្ឋព្ពាយតនញ្ច វត្ថុ ច នោឧបាទា ខន្ធានំ អត្ថិបច្ចយេន បច្ចយោ. បច្ឆាជាតា – នោឧបាទា ខន្ធា ច កពឡីការោ អាហារោ ច ឥមស្ស នោឧបាទា កាយស្ស អត្ថិបច្ចយេន បច្ចយោ. បច្ឆាជាតា – នោឧបាទា ខន្ធា ច រូបជីវិតិន្ទ្រិយញ្ច នោឧបាទា កដត្តារូបានំ អត្ថិបច្ចយេន បច្ចយោ. (២)

ឧបាទា ច នោឧបាទា ច ធម្មា ឧបាទា ធម្មស្ស ច នោឧបាទា ធម្មស្ស ច អត្ថិបច្ចយេន បច្ចយោ – បច្ឆាជាតំ, អាហារំ, ឥន្ទ្រិយំ. បច្ឆាជាតា – នោឧបាទា ខន្ធា ច កពឡីការោ អាហារោ ច ឥមស្ស ឧបាទា កាយស្ស ច នោឧបាទា កាយស្ស ច អត្ថិបច្ចយេន បច្ចយោ. បច្ឆាជាតា – នោឧបាទា ខន្ធា ច រូបជីវិតិន្ទ្រិយញ្ច ឧបាទា ច នោឧបាទា ច កដត្តារូបានំ អត្ថិបច្ចយេន បច្ចយោ. (៣)