១. វិភង្គវារោ

ហេតុបច្ចយោ

២៧. សារម្មណោ ធម្មោ សារម្មណស្ស ធម្មស្ស ហេតុបច្ចយេន បច្ចយោ – សារម្មណា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

សារម្មណោ ធម្មោ អនារម្មណស្ស ធម្មស្ស ហេតុបច្ចយេន បច្ចយោ – សារម្មណា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (២)

សារម្មណោ ធម្មោ សារម្មណស្ស ច អនារម្មណស្ស ច ធម្មស្ស ហេតុបច្ចយេន បច្ចយោ – សារម្មណា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (៣)

អារម្មណបច្ចយោ

២៨. សារម្មណោ ធម្មោ សារម្មណស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ បច្ចវេក្ខតិ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ; បុព្ពេ សុចិណ្ណានិ…បេ… ឈានា…បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, បហីនេ កិលេសេ…បេ… វិក្ខម្ភិតេ កិលេសេ…បេ… បុព្ពេ សមុទាចិណ្ណេ កិលេសេ ជានន្តិ, សារម្មណេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ចេតោបរិយញាណេន សារម្មណចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… សារម្មណា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

២៩. អនារម្មណោ ធម្មោ សារម្មណស្ស ធម្មស្ស អារម្មណបច្ចយេន បច្ចយោ – អរិយា និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… អនារម្មណា ខន្ធា ឥទ្ធិវិធញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អធិបតិបច្ចយោ

៣០. សារម្មណោ ធម្មោ សារម្មណស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ, បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… អរិយា មគ្គា វុដ្ឋហិត្វា មគ្គំ គរុំ…បេ… ផលំ គរុំ…បេ… សារម្មណេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – សារម្មណាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

សារម្មណោ ធម្មោ អនារម្មណស្ស ធម្មស្ស អធិបតិបច្ចយេន បច្ចយោ. សហជាតាធិបតិ – សារម្មណាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

សារម្មណោ ធម្មោ សារម្មណស្ស ច អនារម្មណស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – សារម្មណាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៣១. អនារម្មណោ ធម្មោ សារម្មណស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា និព្ពានំ គរុំ កត្វា បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស, អធិបតិបច្ចយេន បច្ចយោ; ចក្ខុំ…បេ… វត្ថុំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (១)

អនន្តរបច្ចយាទិ

៣២. សារម្មណោ ធម្មោ សារម្មណស្ស ធម្មស្ស អនន្តរបច្ចយេន បច្ចយោ – បុរិមា បុរិមា សារម្មណា…បេ… ផលសមាបត្តិយា អនន្តរបច្ចយេន បច្ចយោ… សមនន្តរបច្ចយេន បច្ចយោ… ឯកំ… សហជាតបច្ចយេន បច្ចយោ… សត្ត (បដិច្ចវារេ សហជាតសទិសា)… អញ្ញមញ្ញបច្ចយេន បច្ចយោ… ឆ (បដិច្ចវារេ អញ្ញមញ្ញសទិសំ)… និស្សយបច្ចយេន បច្ចយោ… សត្ត (បច្ចយវារេ និស្សយសទិសោ).

ឧបនិស្សយបច្ចយោ

៣៣. សារម្មណោ ធម្មោ សារម្មណស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… មានំ ជប្បេតិ, ទិដ្ឋិំ គណ្ហាតិ. សីលំ…បេ… បញ្ញំ, រាគំ…បេ… បត្ថនំ, កាយិកំ សុខំ… កាយិកំ ទុក្ខំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, បាណំ ហនតិ…បេ… សង្ឃំ ភិន្ទតិ. សទ្ធា…បេ… បញ្ញា, រាគោ…បេ… បត្ថនា, កាយិកំ សុខំ… កាយិកំ ទុក្ខំ សទ្ធាយ…បេ… បញ្ញាយ, រាគស្ស…បេ… បត្ថនាយ, កាយិកស្ស សុខស្ស, កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

អនារម្មណោ ធម្មោ សារម្មណស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – ឧតុំ, ភោជនំ, សេនាសនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, បាណំ ហនតិ…បេ… សង្ឃំ ភិន្ទតិ. ឧតុ… ភោជនំ… សេនាសនំ សទ្ធាយ…បេ… បត្ថនាយ, កាយិកស្ស សុខស្ស, កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

បុរេជាតបច្ចយោ

៣៤. អនារម្មណោ ធម្មោ សារម្មណស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ សារម្មណានំ ខន្ធានំ បុរេជាតបច្ចយេន បច្ចយោ. (១)

បច្ឆាជាតាសេវនបច្ចយា

៣៥. សារម្មណោ ធម្មោ អនារម្មណស្ស ធម្មស្ស បច្ឆាជាតបច្ចយេន បច្ចយោ… ឯកំ.

សារម្មណោ ធម្មោ សារម្មណស្ស ធម្មស្ស អាសេវនបច្ចយេន បច្ចយោ… ឯកំ.

កម្មបច្ចយោ

៣៦. សារម្មណោ ធម្មោ សារម្មណស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – សារម្មណា ចេតនា សម្បយុត្តកានំ ខន្ធានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – សារម្មណា ចេតនា វិបាកានំ ខន្ធានំ កម្មបច្ចយេន បច្ចយោ. (១)

សារម្មណោ ធម្មោ អនារម្មណស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – សារម្មណា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – សារម្មណា ចេតនា កដត្តារូបានំ កម្មបច្ចយេន បច្ចយោ. (២)

សារម្មណោ ធម្មោ សារម្មណស្ស ច អនារម្មណស្ស ច ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – សារម្មណា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – សារម្មណា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (៣)

វិបាក-អាហារបច្ចយា

៣៧. សារម្មណោ ធម្មោ សារម្មណស្ស ធម្មស្ស វិបាកបច្ចយេន បច្ចយោ… តីណិ.

សារម្មណោ ធម្មោ សារម្មណស្ស ធម្មស្ស អាហារបច្ចយេន បច្ចយោ… តីណិ.

អនារម្មណោ ធម្មោ អនារម្មណស្ស ធម្មស្ស អាហារបច្ចយេន បច្ចយោ – កពឡីការោ អាហារោ ឥមស្ស កាយស្ស អាហារបច្ចយេន បច្ចយោ. (១)

ឥន្ទ្រិយបច្ចយោ

៣៨. សារម្មណោ ធម្មោ សារម្មណស្ស ធម្មស្ស ឥន្ទ្រិយបច្ចយេន បច្ចយោ… តីណិ.

អនារម្មណោ ធម្មោ អនារម្មណស្ស ធម្មស្ស ឥន្ទ្រិយបច្ចយេន បច្ចយោ – រូបជីវិតិន្ទ្រិយំ កដត្តារូបានំ ឥន្ទ្រិយបច្ចយេន បច្ចយោ. (១)

អនារម្មណោ ធម្មោ សារម្មណស្ស ធម្មស្ស ឥន្ទ្រិយបច្ចយេន បច្ចយោ – ចក្ខុន្ទ្រិយំ ចក្ខុវិញ្ញាណស្ស…បេ… កាយិន្ទ្រិយំ កាយវិញ្ញាណស្ស ឥន្ទ្រិយបច្ចយេន បច្ចយោ. (១)

សារម្មណោ ច អនារម្មណោ ច ធម្មា សារម្មណស្ស ធម្មស្ស ឥន្ទ្រិយបច្ចយេន បច្ចយោ – ចក្ខុន្ទ្រិយញ្ច ចក្ខុវិញ្ញាណញ្ច ចក្ខុវិញ្ញាណសហគតានំ ខន្ធានំ ឥន្ទ្រិយបច្ចយេន បច្ចយោ…បេ… កាយិន្ទ្រិយញ្ច កាយវិញ្ញាណញ្ច កាយវិញ្ញាណសហគតានំ ខន្ធានំ ឥន្ទ្រិយបច្ចយេន បច្ចយោ. (១)

ឈានបច្ចយាទិ

៣៩. សារម្មណោ ធម្មោ សារម្មណស្ស ធម្មស្ស ឈានបច្ចយេន បច្ចយោ… តីណិ, មគ្គបច្ចយេន បច្ចយោ… តីណិ, សម្បយុត្តបច្ចយេន បច្ចយោ… ឯកំ.

វិប្បយុត្តបច្ចយោ

៤០. សារម្មណោ ធម្មោ អនារម្មណស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

អនារម្មណោ ធម្មោ សារម្មណស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ សារម្មណានំ ខន្ធានំ វិប្បយុត្តបច្ចយេន បច្ចយោ. បុរេជាតំ ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស វិប្បយុត្តបច្ចយេន បច្ចយោ; វត្ថុ សារម្មណានំ ខន្ធានំ វិប្បយុត្តបច្ចយេន បច្ចយោ. (១)

អត្ថិបច្ចយោ

៤១. សារម្មណោ ធម្មោ សារម្មណស្ស ធម្មស្ស អត្ថិបច្ចយេន បច្ចយោ – សារម្មណោ ឯកោ ខន្ធោ តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ…. (១)

សារម្មណោ ធម្មោ អនារម្មណស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ (សំខិត្តំ). (២)

សារម្មណោ ធម្មោ សារម្មណស្ស ច អនារម្មណស្ស ច ធម្មស្ស អត្ថិបច្ចយេន បច្ចយោ (បដិច្ចសទិសំ). (៣)

៤២. អនារម្មណោ ធម្មោ អនារម្មណស្ស ធម្មស្ស អត្ថិបច្ចយេន បច្ចយោ – សហជាតំ, អាហារំ, ឥន្ទ្រិយំ. សហជាតំ – ឯកំ មហាភូតំ…បេ… (យាវ អសញ្ញសត្តា). (១)

អនារម្មណោ ធម្មោ សារម្មណស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ សារម្មណានំ ខន្ធានំ អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ សារម្មណានំ ខន្ធានំ អត្ថិបច្ចយេន បច្ចយោ. (២)

៤៣. សារម្មណោ ច អនារម្មណោ ច ធម្មា សារម្មណស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – ចក្ខុវិញ្ញាណសហគតោ ឯកោ ខន្ធោ ច ចក្ខាយតនញ្ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… កាយវិញ្ញាណសហគតោ ឯកោ ខន្ធោ ច កាយាយតនញ្ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… សារម្មណោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… បដិសន្ធិក្ខណេ…បេ…. (១)

សារម្មណោ ច អនារម្មណោ ច ធម្មា អនារម្មណស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – សារម្មណា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ; បដិសន្ធិក្ខណេ…បេ…. បច្ឆាជាតា – សារម្មណា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – សារម្មណា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)