១. វិភង្គវារោ

នហេតុបច្ចយោ

៣៧៥. ឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច នោឧបាទា ខន្ធា. (១)

នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នហេតុបច្ចយា – អហេតុកំ នោឧបាទា ឯកំ ខន្ធំ បដិច្ច តយោ ខន្ធា នោឧបាទា ច ចិត្តសមុដ្ឋានំ រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ឯកំ មហាភូតំ…បេ… អសញ្ញសត្តានំ ឯកំ មហាភូតំ បដិច្ច តយោ មហាភូតា…បេ… ទ្វេ មហាភូតេ បដិច្ច ទ្វេ មហាភូតា, វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

នោឧបាទា ធម្មំ បដិច្ច ឧបាទា ធម្មោ ឧប្បជ្ជតិ នហេតុបច្ចយា – អហេតុកេ នោឧបាទា ខន្ធេ បដិច្ច ឧបាទា ចិត្តសមុដ្ឋានំ រូបំ; អហេតុកបដិសន្ធិក្ខណេ…បេ… មហាភូតេ បដិច្ច ឧបាទា ចិត្តសមុដ្ឋានំ រូបំ កដត្តារូបំ ឧបាទារូបំ…បេ… (យាវ អសញ្ញសត្តា). (២)

នោឧបាទា ធម្មំ បដិច្ច ឧបាទា ច នោឧបាទា ច ធម្មា ឧប្បជ្ជន្តិ នហេតុបច្ចយា – អហេតុកំ នោឧបាទា ឯកំ ខន្ធំ បដិច្ច តយោ ខន្ធា ឧបាទា ច នោឧបាទា ច ចិត្តសមុដ្ឋានំ រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ…. (៣)

ឧបាទា ច នោឧបាទា ច ធម្មំ បដិច្ច នោឧបាទា ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ នោឧបាទា ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ ច…បេ…. (១)

នអារម្មណបច្ចយាទិ

៣៧៦. នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នអារម្មណបច្ចយា – នោឧបាទា ខន្ធេ បដិច្ច នោឧបាទា ចិត្តសមុដ្ឋានំ រូបំ; បដិសន្ធិក្ខណេ…បេ… ឯកំ មហាភូតំ…បេ… (យាវ អសញ្ញសត្តា) ទ្វេ មហាភូតេ បដិច្ច ទ្វេ មហាភូតា. (១)

នោឧបាទា ធម្មំ បដិច្ច ឧបាទា ធម្មោ ឧប្បជ្ជតិ នអារម្មណបច្ចយា – នោឧបាទា ខន្ធេ បដិច្ច ឧបាទា ចិត្តសមុដ្ឋានំ រូបំ; បដិសន្ធិក្ខណេ…បេ… មហាភូតេ បដិច្ច ឧបាទា ចិត្តសមុដ្ឋានំ រូបំ កដត្តារូបំ ឧបាទារូបំ (យាវ អសញ្ញសត្តា). (២)

នោឧបាទា ធម្មំ បដិច្ច ឧបាទា ច នោឧបាទា ច ធម្មា ឧប្បជ្ជន្តិ នអារម្មណបច្ចយា – នោឧបាទា ខន្ធេ បដិច្ច ឧបាទា ច នោឧបាទា ច ចិត្តសមុដ្ឋានំ រូបំ; បដិសន្ធិក្ខណេ…បេ…. (៣)

នអធិបតិបច្ចយា បញ្ច, នអនន្តរបច្ចយា តីណិ…បេ… នឧបនិស្សយបច្ចយា បញ្ច, នបុរេជាតបច្ចយា បញ្ច, នបច្ឆាជាតបច្ចយា បញ្ច, នអាសេវនបច្ចយា បញ្ច.

នកម្មបច្ចយោ

៣៧៧. នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នកម្មបច្ចយា – នោឧបាទា ខន្ធេ បដិច្ច សម្បយុត្តកា ចេតនា; ពាហិរំ អាហារសមុដ្ឋានំ ឧតុសមុដ្ឋានំ…បេ… ទ្វេ មហាភូតេ បដិច្ច ទ្វេ មហាភូតា. (១)

នោឧបាទា ធម្មំ បដិច្ច ឧបាទា ធម្មោ ឧប្បជ្ជតិ នកម្មបច្ចយា – ពាហិរេ អាហារសមុដ្ឋានេ ឧតុសមុដ្ឋានេ មហាភូតេ បដិច្ច ឧបាទារូបំ. (២)

នោឧបាទា ធម្មំ បដិច្ច ឧបាទា ច នោឧបាទា ច ធម្មា ឧប្បជ្ជន្តិ នកម្មបច្ចយា – ពាហិរំ អាហារសមុដ្ឋានំ ឧតុសមុដ្ឋានំ ឯកំ មហាភូតំ បដិច្ច តយោ មហាភូតា ឧបាទា ច រូបំ…បេ… ទ្វេ មហាភូតេ…បេ…. (៣)

នវិបាកបច្ចយោ

៣៧៨. នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នវិបាកបច្ចយា – នោឧបាទា ឯកំ ខន្ធំ បដិច្ច តយោ ខន្ធា នោឧបាទា ច ចិត្តសមុដ្ឋានំ រូបំ…បេ… ទ្វេ ខន្ធេ…បេ… ឯកំ មហាភូតំ…បេ… (យាវ អសញ្ញសត្តា, ឯវំ តីណិ នោឧបាទាមូលកេ).

នអាហារបច្ចយោ

៣៧៩. នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នអាហារបច្ចយា – ពាហិរំ ឧតុសមុដ្ឋានំ អសញ្ញសត្តានំ ឯកំ មហាភូតំ…បេ… ទ្វេ មហាភូតេ បដិច្ច ទ្វេ មហាភូតា. (១)

នោឧបាទា ធម្មំ បដិច្ច ឧបាទា ធម្មោ ឧប្បជ្ជតិ នអាហារបច្ចយា – ពាហិរំ ឧតុសមុដ្ឋានំ អសញ្ញសត្តានំ មហាភូតេ បដិច្ច ឧបាទារូបំ. (២)

នោឧបាទា ធម្មំ បដិច្ច ឧបាទា ច នោឧបាទា ច ធម្មា ឧប្បជ្ជន្តិ នអាហារបច្ចយា – ពាហិរំ ឧតុសមុដ្ឋានំ អសញ្ញសត្តានំ ឯកំ មហាភូតំ បដិច្ច តយោ មហាភូតា ឧបាទា ច រូបំ…បេ… ទ្វេ មហាភូតេ…បេ…. (៣)

នឥន្ទ្រិយបច្ចយោ

៣៨០. នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នឥន្ទ្រិយបច្ចយា – ពាហិរំ អាហារសមុដ្ឋានំ ឧតុសមុដ្ឋានំ ឯកំ មហាភូតំ…បេ…. (១)

នោឧបាទា ធម្មំ បដិច្ច ឧបាទា ធម្មោ ឧប្បជ្ជតិ នឥន្ទ្រិយបច្ចយា – ពាហិរេ អាហារសមុដ្ឋានេ ឧតុសមុដ្ឋានេ អសញ្ញសត្តានំ មហាភូតេ បដិច្ច រូបជីវិតិន្ទ្រិយំ.

នោឧបាទា ធម្មំ បដិច្ច ឧបាទា ច នោឧបាទា ច ធម្មា ឧប្បជ្ជន្តិ នឥន្ទ្រិយបច្ចយា – ពាហិរំ អាហារសមុដ្ឋានំ ឧតុសមុដ្ឋានំ ឯកំ មហាភូតំ…បេ…. (៣)

នឈានបច្ចយាទិ

៣៨១. នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នឈានបច្ចយា – បញ្ចវិញ្ញាណសហគតំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… ពាហិរំ អាហារសមុដ្ឋានំ ឧតុសមុដ្ឋានំ អសញ្ញសត្តានំ…បេ… ទ្វេ មហាភូតេ បដិច្ច ទ្វេ មហាភូតា. (១)

នោឧបាទា ធម្មំ បដិច្ច ឧបាទា ធម្មោ ឧប្បជ្ជតិ នឈានបច្ចយា – ពាហិរេ អាហារសមុដ្ឋានេ ឧតុសមុដ្ឋានេ អសញ្ញសត្តានំ មហាភូតេ បដិច្ច ឧបាទា កដត្តារូបំ. (២)

នោឧបាទា ធម្មំ បដិច្ច ឧបាទា ច នោឧបាទា ច ធម្មា ឧប្បជ្ជន្តិ នឈានបច្ចយា – ពាហិរំ អាហារសមុដ្ឋានំ ឧតុសមុដ្ឋានំ អសញ្ញសត្តានំ ឯកំ មហាភូតំ បដិច្ច តយោ មហាភូតា…បេ… ទ្វេ មហាភូតេ…បេ… មហាភូតេ បដិច្ច ឧបាទា កដត្តារូបំ ឧបាទារូបំ. (៣)

ឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នមគ្គបច្ចយា បញ្ច… នសម្បយុត្តបច្ចយា… តីណិ.

នវិប្បយុត្តបច្ចយាទិ

៣៨២. នោឧបាទា ធម្មំ បដិច្ច នោឧបាទា ធម្មោ ឧប្បជ្ជតិ នវិប្បយុត្តបច្ចយា – អរូបេ នោឧបាទា ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… ពាហិរំ អាហារសមុដ្ឋានំ ឧតុសមុដ្ឋានំ អសញ្ញសត្តានំ ឯកំ មហាភូតំ…បេ…. (១)

នោឧបាទា ធម្មំ បដិច្ច ឧបាទា ធម្មោ ឧប្បជ្ជតិ នវិប្បយុត្តបច្ចយា – ពាហិរេ អាហារសមុដ្ឋានេ ឧតុសមុដ្ឋានេ អសញ្ញសត្តានំ មហាភូតេ បដិច្ច ឧបាទា កដត្តារូបំ, ឧបាទារូបំ. (២)

នោឧបាទា ធម្មំ បដិច្ច ឧបាទា ច នោឧបាទា ច ធម្មា ឧប្បជ្ជន្តិ នវិប្បយុត្តបច្ចយា – ពាហិរំ អាហារសមុដ្ឋានំ ឧតុសមុដ្ឋានំ ឯកំ មហាភូតំ បដិច្ច តយោ មហាភូតា ឧបាទា ច រូបំ…បេ… ទ្វេ មហាភូតេ បដិច្ច ទ្វេ មហាភូតា ឧបាទា ច រូបំ, អសញ្ញសត្តានំ ឯកំ មហាភូតំ បដិច្ច តយោ មហាភូតា កដត្តា ច រូបំ ឧបាទារូបំ…បេ… ទ្វេ មហាភូតេ បដិច្ច ទ្វេ មហាភូតា កដត្តា ច រូបំ ឧបាទារូបំ… នោនត្ថិបច្ចយា… នោវិគតបច្ចយា. (៣)