១. វិភង្គវារោ

ហេតុបច្ចយោ

៣៣២. អជ្ឈត្តិកំ ធម្មំ បច្ចយា អជ្ឈត្តិកោ ធម្មោ ឧប្បជ្ជតិ ហេតុបច្ចយា… តីណិ (បដិច្ចសទិសា).

ពាហិរំ ធម្មំ បច្ចយា ពាហិរោ ធម្មោ ឧប្បជ្ជតិ ហេតុបច្ចយា – ពាហិរំ ឯកំ ខន្ធំ បច្ចយា ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ…បេ… (បដិសន្ធិក្ខណេ ទ្វេបិ កាតព្ពា, យាវ អជ្ឈត្តិកា មហាភូតា) វត្ថុំ បច្ចយា ពាហិរា ខន្ធា. ពាហិរំ ធម្មំ បច្ចយា អជ្ឈត្តិកោ ធម្មោ ឧប្បជ្ជតិ ហេតុបច្ចយា – ពាហិរេ ខន្ធេ បច្ចយា ចិត្តំ, វត្ថុំ បច្ចយា ចិត្តំ (បដិសន្ធិក្ខណេ ទ្វេបិ កាតព្ពា). ពាហិរំ ធម្មំ បច្ចយា អជ្ឈត្តិកោ ច ពាហិរោ ច ធម្មា ឧប្បជ្ជន្តិ ហេតុបច្ចយា – ពាហិរំ ឯកំ ខន្ធំ បច្ចយា ទ្វេ ខន្ធា ចិត្តញ្ច ចិត្តសមុដ្ឋានញ្ច រូបំ, ទ្វេ ខន្ធេ…បេ… វត្ថុំ បច្ចយា ចិត្តំ សម្បយុត្តកា ច ខន្ធា (បដិសន្ធិក្ខណេ ទ្វេបិ កាតព្ពា). (៣)

៣៣៣. អជ្ឈត្តិកញ្ច ពាហិរញ្ច ធម្មំ បច្ចយា អជ្ឈត្តិកោ ធម្មោ ឧប្បជ្ជតិ ហេតុបច្ចយា – បដិសន្ធិក្ខណេ ចិត្តញ្ច សម្បយុត្តកេ ច ខន្ធេ បច្ចយា អជ្ឈត្តិកំ កដត្តារូបំ. អជ្ឈត្តិកញ្ច ពាហិរញ្ច ធម្មំ បច្ចយា ពាហិរោ ធម្មោ ឧប្បជ្ជតិ ហេតុបច្ចយា – ពាហិរំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ…បេ… ចិត្តញ្ច មហាភូតេ ច បច្ចយា ចិត្តសមុដ្ឋានំ រូបំ, ចិត្តញ្ច វត្ថុញ្ច បច្ចយា ពាហិរា ខន្ធា (បដិសន្ធិក្ខណេ តីណិបិ កាតព្ពា). អជ្ឈត្តិកញ្ច ពាហិរញ្ច ធម្មំ បច្ចយា អជ្ឈត្តិកោ ច ពាហិរោ ច ធម្មា ឧប្បជ្ជន្តិ ហេតុបច្ចយា – បដិសន្ធិក្ខណេ ពាហិរំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា អជ្ឈត្តិកញ្ច ពាហិរញ្ច កដត្តារូបំ, ទ្វេ ខន្ធេ…បេ…. (៣)

អារម្មណបច្ចយោ

៣៣៤. អជ្ឈត្តិកំ ធម្មំ បច្ចយា អជ្ឈត្តិកោ ធម្មោ ឧប្បជ្ជតិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ …បេ…. អជ្ឈត្តិកំ ធម្មំ បច្ចយា ពាហិរោ ធម្មោ ឧប្បជ្ជតិ អារម្មណបច្ចយា – ចក្ខាយតនញ្ច ចក្ខុវិញ្ញាណញ្ច បច្ចយា ចក្ខុវិញ្ញាណសហគតា ខន្ធា…បេ… កាយាយតនញ្ច…បេ… ចិត្តំ បច្ចយា សម្បយុត្តកា ខន្ធា; បដិសន្ធិក្ខណេ…បេ…. អជ្ឈត្តិកំ ធម្មំ បច្ចយា អជ្ឈត្តិកោ ច ពាហិរោ ច ធម្មា ឧប្បជ្ជន្តិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ សម្បយុត្តកា ច ខន្ធា…បេ… កាយាយតនំ…បេ…. (៣)

ពាហិរំ ធម្មំ បច្ចយា ពាហិរោ ធម្មោ ឧប្បជ្ជតិ អារម្មណបច្ចយា – ពាហិរំ ឯកំ ខន្ធំ បច្ចយា ទ្វេ ខន្ធា, ទ្វេ ខន្ធេ…បេ… បដិសន្ធិក្ខណេ…បេ… វត្ថុំ បច្ចយា ពាហិរា ខន្ធា. ពាហិរំ ធម្មំ បច្ចយា អជ្ឈត្តិកោ ធម្មោ ឧប្បជ្ជតិ អារម្មណបច្ចយា – ពាហិរេ ខន្ធេ បច្ចយា ចិត្តំ, វត្ថុំ បច្ចយា ចិត្តំ (បដិសន្ធិក្ខណេ ទ្វេបិ កាតព្ពា). ពាហិរំ ធម្មំ បច្ចយា អជ្ឈត្តិកោ ច ពាហិរោ ច ធម្មា ឧប្បជ្ជន្តិ អារម្មណបច្ចយា – វត្ថុំ បច្ចយា ចិត្តញ្ច សម្បយុត្តកា ច ខន្ធា (បដិសន្ធិក្ខណេ ឯកំ កាតព្ពំ). (៣)

៣៣៥. អជ្ឈត្តិកញ្ច ពាហិរញ្ច ធម្មំ បច្ចយា អជ្ឈត្តិកោ ធម្មោ ឧប្បជ្ជតិ អារម្មណបច្ចយា – ចក្ខុវិញ្ញាណសហគតេ ខន្ធេ ច ចក្ខាយតនញ្ច បច្ចយា ចក្ខុវិញ្ញាណំ…បេ… កាយវិញ្ញាណសហគតេ…បេ….

អជ្ឈត្តិកញ្ច ពាហិរញ្ច ធម្មំ បច្ចយា ពាហិរោ ធម្មោ ឧប្បជ្ជតិ អារម្មណបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច ចក្ខុវិញ្ញាណញ្ច បច្ចយា ទ្វេ ខន្ធា, ទ្វេ ខន្ធេ…បេ… កាយវិញ្ញាណសហគតំ…បេ… ពាហិរំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា, ទ្វេ ខន្ធេ…បេ… ចិត្តញ្ច វត្ថុញ្ច បច្ចយា ពាហិរា ខន្ធា (បដិសន្ធិក្ខណេ ទ្វេបិ កាតព្ពា). អជ្ឈត្តិកញ្ច ពាហិរញ្ច ធម្មំ បច្ចយា អជ្ឈត្តិកោ ច ពាហិរោ ច ធម្មា ឧប្បជ្ជន្តិ អារម្មណបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច បច្ចយា ទ្វេ ខន្ធា ចក្ខុវិញ្ញាណញ្ច, ទ្វេ ខន្ធេ…បេ… (សំខិត្តំ). (៣)