១. វិភង្គវារោ

ហេតុបច្ចយោ

៣១៨. អជ្ឈត្តិកំ ធម្មំ បដិច្ច អជ្ឈត្តិកោ ធម្មោ ឧប្បជ្ជតិ ហេតុបច្ចយា – បដិសន្ធិក្ខណេ ចិត្តំ បដិច្ច អជ្ឈត្តិកំ កដត្តារូបំ. (១)

អជ្ឈត្តិកំ ធម្មំ បដិច្ច ពាហិរោ ធម្មោ ឧប្បជ្ជតិ ហេតុបច្ចយា – ចិត្តំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ ចិត្តំ បដិច្ច សម្បយុត្តកា ខន្ធា ពាហិរំ កដត្តា ច រូបំ. (២)

អជ្ឈត្តិកំ ធម្មំ បដិច្ច អជ្ឈត្តិកោ ច ពាហិរោ ច ធម្មា ឧប្បជ្ជន្តិ ហេតុបច្ចយា – បដិសន្ធិក្ខណេ ចិត្តំ បដិច្ច សម្បយុត្តកា ខន្ធា អជ្ឈត្តិកញ្ច ពាហិរញ្ច កដត្តារូបំ. (៣)

៣១៩. ពាហិរំ ធម្មំ បដិច្ច ពាហិរោ ធម្មោ ឧប្បជ្ជតិ ហេតុបច្ចយា – ពាហិរំ ឯកំ ខន្ធំ បដិច្ច ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ…បេ… បដិសន្ធិក្ខណេ ពាហិរំ ឯកំ ខន្ធំ បដិច្ច ទ្វេ ខន្ធា ពាហិរំ កដត្តា ច រូបំ, ទ្វេ ខន្ធេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

ពាហិរំ ធម្មំ បដិច្ច អជ្ឈត្តិកោ ធម្មោ ឧប្បជ្ជតិ ហេតុបច្ចយា – ពាហិរេ ខន្ធេ បដិច្ច ចិត្តំ; បដិសន្ធិក្ខណេ ពាហិរេ ខន្ធេ បដិច្ច ចិត្តំ អជ្ឈត្តិកំ កដត្តា ច រូបំ, បដិសន្ធិក្ខណេ ពាហិរំ វត្ថុំ បដិច្ច ចិត្តំ. (២)

ពាហិរំ ធម្មំ បដិច្ច អជ្ឈត្តិកោ ច ពាហិរោ ច ធម្មា ឧប្បជ្ជន្តិ ហេតុបច្ចយា – ពាហិរំ ឯកំ ខន្ធំ បដិច្ច ទ្វេ ខន្ធា ចិត្តញ្ច ចិត្តសមុដ្ឋានញ្ច រូបំ, ទ្វេ ខន្ធេ…បេ… បដិសន្ធិក្ខណេ ពាហិរំ ឯកំ ខន្ធំ បដិច្ច ទ្វេ ខន្ធា ចិត្តញ្ច អជ្ឈត្តិកញ្ច ពាហិរញ្ច កដត្តារូបំ, ទ្វេ ខន្ធេ…បេ… បដិសន្ធិក្ខណេ វត្ថុំ បដិច្ច ចិត្តំ សម្បយុត្តកា ច ខន្ធា. (៣)

៣២០. អជ្ឈត្តិកញ្ច ពាហិរញ្ច ធម្មំ បដិច្ច អជ្ឈត្តិកោ ធម្មោ ឧប្បជ្ជតិ ហេតុបច្ចយា – បដិសន្ធិក្ខណេ ចិត្តញ្ច សម្បយុត្តកេ ច ខន្ធេ បដិច្ច អជ្ឈត្តិកំ កដត្តារូបំ. (១)

អជ្ឈត្តិកញ្ច ពាហិរញ្ច ធម្មំ បដិច្ច ពាហិរោ ធម្មោ ឧប្បជ្ជតិ ហេតុបច្ចយា – ពាហិរំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ ច…បេ… ចិត្តញ្ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ ពាហិរំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា ពាហិរំ កដត្តា ច រូបំ, ទ្វេ ខន្ធេ ច…បេ… ចិត្តញ្ច មហាភូតេ ច បដិច្ច ពាហិរំ កដត្តារូបំ, បដិសន្ធិក្ខណេ ចិត្តញ្ច វត្ថុញ្ច បដិច្ច ពាហិរា ខន្ធា. (២)

អជ្ឈត្តិកញ្ច ពាហិរញ្ច ធម្មំ បដិច្ច អជ្ឈត្តិកោ ច ពាហិរោ ច ធម្មា ឧប្បជ្ជន្តិ ហេតុបច្ចយា – បដិសន្ធិក្ខណេ ពាហិរំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា អជ្ឈត្តិកញ្ច ពាហិរញ្ច កដត្តារូបំ, ទ្វេ ខន្ធេ ច…បេ…. (៣)

អារម្មណបច្ចយោ

៣២១. អជ្ឈត្តិកំ ធម្មំ បដិច្ច ពាហិរោ ធម្មោ ឧប្បជ្ជតិ អារម្មណបច្ចយា – ចិត្តំ បដិច្ច សម្បយុត្តកា ខន្ធា; បដិសន្ធិក្ខណេ ចិត្តំ បដិច្ច សម្បយុត្តកា ខន្ធា. (១)

ពាហិរំ ធម្មំ បដិច្ច ពាហិរោ ធម្មោ ឧប្បជ្ជតិ អារម្មណបច្ចយា – ពាហិរំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ…បេ… បដិសន្ធិក្ខណេ…បេ… វត្ថុំ បដិច្ច ខន្ធា. (១)

ពាហិរំ ធម្មំ បដិច្ច អជ្ឈត្តិកោ ធម្មោ ឧប្បជ្ជតិ អារម្មណបច្ចយា – ពាហិរេ ខន្ធេ បដិច្ច ចិត្តំ; បដិសន្ធិក្ខណេ ពាហិរេ ខន្ធេ បដិច្ច ចិត្តំ, បដិសន្ធិក្ខណេ វត្ថុំ បដិច្ច ចិត្តំ. (២)

ពាហិរំ ធម្មំ បដិច្ច អជ្ឈត្តិកោ ច ពាហិរោ ច ធម្មា ឧប្បជ្ជន្តិ អារម្មណបច្ចយា – ពាហិរំ ឯកំ ខន្ធំ បដិច្ច ទ្វេ ខន្ធា ចិត្តញ្ច, ទ្វេ ខន្ធេ…បេ… បដិសន្ធិក្ខណេ ពាហិរំ ឯកំ ខន្ធំ បដិច្ច ទ្វេ ខន្ធា ចិត្តញ្ច, ទ្វេ ខន្ធេ…បេ… បដិសន្ធិក្ខណេ វត្ថុំ បដិច្ច ចិត្តំ សម្បយុត្តកា ច ខន្ធា. (៣)

អជ្ឈត្តិកញ្ច ពាហិរញ្ច ធម្មំ បដិច្ច ពាហិរោ ធម្មោ ឧប្បជ្ជតិ អារម្មណបច្ចយា – ពាហិរំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា, ទ្វេ ខន្ធេ ច…បេ… បដិសន្ធិក្ខណេ ពាហិរំ ឯកំ ខន្ធំ ចិត្តញ្ច បដិច្ច ទ្វេ ខន្ធា, ទ្វេ ខន្ធេ ច…បេ… បដិសន្ធិក្ខណេ ពាហិរំ ឯកំ ខន្ធញ្ច ចិត្តញ្ច វត្ថុញ្ច បដិច្ច ទ្វេ ខន្ធា, ទ្វេ ខន្ធេ ច…បេ… (សំខិត្តំ). (១)