១. វិភង្គវារោ

ហេតុបច្ចយោ

២៨៩. ចិត្តសំសដ្ឋសមុដ្ឋានំ ធម្មំ បច្ចយា ចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា (សំខិត្តំ) តីណិ (បដិច្ចវារសទិសា).

នោចិត្តសំសដ្ឋសមុដ្ឋានំ ធម្មំ បច្ចយា នោចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តំ បច្ចយា ចិត្តសមុដ្ឋានំ រូបំ, វត្ថុំ បច្ចយា ចិត្តំ; បដិសន្ធិក្ខណេ…បេ… (យាវ មហាភូតា). (១)

នោចិត្តសំសដ្ឋសមុដ្ឋានំ ធម្មំ បច្ចយា ចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តំ បច្ចយា សម្បយុត្តកា ខន្ធា, វត្ថុំ បច្ចយា ចិត្តសំសដ្ឋសមុដ្ឋានា ខន្ធា (បដិសន្ធិក្ខណេ ទ្វេបិ កាតព្ពា) តីណិ. (៣)

២៩០. ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បច្ចយា ចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសំសដ្ឋសមុដ្ឋានំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា, ទ្វេ ខន្ធេ ច…បេ… ចិត្តសំសដ្ឋសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា, ទ្វេ ខន្ធេ ច…បេ… (បដិសន្ធិក្ខណេ ទ្វេបិ កាតព្ពា). (១)

ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បច្ចយា នោចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសំសដ្ឋសមុដ្ឋានេ ខន្ធេ ច ចិត្តញ្ច បច្ចយា នោចិត្តសំសដ្ឋសមុដ្ឋានំ រូបំ, ចិត្តសំសដ្ឋសមុដ្ឋានេ ខន្ធេ ច មហាភូតេ ច បច្ចយា នោចិត្តសំសដ្ឋសមុដ្ឋានំ រូបំ, ចិត្តសំសដ្ឋសមុដ្ឋានេ ខន្ធេ ច វត្ថុញ្ច បច្ចយា ចិត្តំ (បដិសន្ធិក្ខណេ តីណិបិ កាតព្ពា). (២)

ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បច្ចយា ចិត្តសំសដ្ឋសមុដ្ឋានោ ច នោចិត្តសំសដ្ឋសមុដ្ឋានោ ច ធម្មា ឧប្បជ្ជន្តិ ហេតុបច្ចយា – ចិត្តសំសដ្ឋសមុដ្ឋានំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា ចិត្តសំសដ្ឋសមុដ្ឋានញ្ច រូបំ, ទ្វេ ខន្ធេ…បេ… ចិត្តសំសដ្ឋសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា ចិត្តញ្ច, ទ្វេ ខន្ធេ…បេ… (បដិសន្ធិក្ខណេ ទ្វេបិ កាតព្ពា). (៣)

អារម្មណបច្ចយោ

២៩១. ចិត្តសំសដ្ឋសមុដ្ឋានំ ធម្មំ បច្ចយា ចិត្តសំសដ្ឋសមុដ្ឋានោ ធម្មោ ឧប្បជ្ជតិ អារម្មណបច្ចយា… តីណិ (បដិច្ចសទិសា).

នោចិត្តសំសដ្ឋសមុដ្ឋានំ ធម្មំ បច្ចយា នោចិត្តសំសដ្ឋសមុដ្ឋានោ ធម្មោ ឧប្បជ្ជតិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ…បេ… វត្ថុំ បច្ចយា ចិត្តំ; បដិសន្ធិក្ខណេ…បេ…. (១)

នោចិត្តសំសដ្ឋសមុដ្ឋានំ ធម្មំ បច្ចយា ចិត្តសំសដ្ឋសមុដ្ឋានោ ធម្មោ ឧប្បជ្ជតិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណសហគតា ខន្ធា…បេ… កាយាយតនំ…បេ… ចិត្តំ បច្ចយា សម្បយុត្តកា ខន្ធា, វត្ថុំ បច្ចយា ចិត្តសំសដ្ឋសមុដ្ឋានា ខន្ធា (បដិសន្ធិក្ខណេ ទ្វេបិ កាតព្ពា). (២)

នោចិត្តសំសដ្ឋសមុដ្ឋានំ ធម្មំ បច្ចយា ចិត្តសំសដ្ឋសមុដ្ឋានោ ច នោចិត្តសំសដ្ឋសមុដ្ឋានោ ច ធម្មា ឧប្បជ្ជន្តិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ សម្បយុត្តកា ច ខន្ធា…បេ… កាយាយតនំ…បេ… វត្ថុំ បច្ចយា ចិត្តំ សម្បយុត្តកា ច ខន្ធា (បដិសន្ធិក្ខណេ ឯកំ កាតព្ពំ). (៣)

២៩២. ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បច្ចយា ចិត្តសំសដ្ឋសមុដ្ឋានោ ធម្មោ ឧប្បជ្ជតិ អារម្មណបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច ចក្ខុវិញ្ញាណញ្ច បច្ចយា ទ្វេ ខន្ធា, ទ្វេ ខន្ធេ…បេ… កាយវិញ្ញាណសហគតំ…បេ… ចិត្តសំសដ្ឋសមុដ្ឋានំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា, ទ្វេ ខន្ធេ…បេ… ចិត្តសំសដ្ឋសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា, ទ្វេ ខន្ធេ…បេ… (បដិសន្ធិក្ខណេ ទ្វេ កាតព្ពា). (១)

ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បច្ចយា នោចិត្តសំសដ្ឋសមុដ្ឋានោ ធម្មោ ឧប្បជ្ជតិ អារម្មណបច្ចយា – ចក្ខុវិញ្ញាណសហគតេ ខន្ធេ ច ចក្ខាយតនញ្ច បច្ចយា ចក្ខុវិញ្ញាណំ …បេ… កាយវិញ្ញាណសហគតេ…បេ… ចិត្តសំសដ្ឋសមុដ្ឋានេ ខន្ធេ ច វត្ថុញ្ច បច្ចយា ចិត្តំ (បដិសន្ធិក្ខណេ ឯកំ កាតព្ពំ). (២)

ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បច្ចយា ចិត្តសំសដ្ឋសមុដ្ឋានោ ច នោចិត្តសំសដ្ឋសមុដ្ឋានោ ច ធម្មា ឧប្បជ្ជន្តិ អារម្មណបច្ចយា – ចិត្តសំសដ្ឋសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា ចិត្តញ្ច, ទ្វេ ខន្ធេ…បេ… (បដិសន្ធិក្ខណេ ឯកំ កាតព្ពំ, សំខិត្តំ). (៣)