១. វិភង្គវារោ

ហេតុបច្ចយោ

២៧៨. ចិត្តសំសដ្ឋសមុដ្ឋានំ ធម្មំ បដិច្ច ចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសំសដ្ឋសមុដ្ឋានំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ; បដិសន្ធិក្ខណេ…បេ…. (១)

ចិត្តសំសដ្ឋសមុដ្ឋានំ ធម្មំ បដិច្ច នោចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសំសដ្ឋសមុដ្ឋានេ ខន្ធេ បដិច្ច ចិត្តំ ចិត្តសមុដ្ឋានញ្ច រូបំ; បដិសន្ធិក្ខណេ ចិត្តសំសដ្ឋសមុដ្ឋានេ ខន្ធេ បដិច្ច ចិត្តំ កដត្តា ច រូបំ. (២)

ចិត្តសំសដ្ឋសមុដ្ឋានំ ធម្មំ បដិច្ច ចិត្តសំសដ្ឋសមុដ្ឋានោ ច នោចិត្តសំសដ្ឋសមុដ្ឋានោ ច ធម្មា ឧប្បជ្ជន្តិ ហេតុបច្ចយា – ចិត្តសំសដ្ឋសមុដ្ឋានំ ឯកំ ខន្ធំ បដិច្ច ទ្វេ ខន្ធា ចិត្តញ្ច ចិត្តសមុដ្ឋានញ្ច រូបំ, ទ្វេ ខន្ធេ…បេ… បដិសន្ធិក្ខណេ…បេ…. (៣)

២៧៩. នោចិត្តសំសដ្ឋសមុដ្ឋានំ ធម្មំ បដិច្ច នោចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តំ បដិច្ច ចិត្តសមុដ្ឋានំ រូបំ; បដិសន្ធិក្ខណេ ចិត្តំ បដិច្ច កដត្តារូបំ, ចិត្តំ បដិច្ច វត្ថុ, វត្ថុំ បដិច្ច ចិត្តំ, ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

នោចិត្តសំសដ្ឋសមុដ្ឋានំ ធម្មំ បដិច្ច ចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តំ បដិច្ច សម្បយុត្តកា ខន្ធា; បដិសន្ធិក្ខណេ ចិត្តំ បដិច្ច សម្បយុត្តកា ខន្ធា, បដិសន្ធិក្ខណេ វត្ថុំ បដិច្ច ចិត្តសំសដ្ឋសមុដ្ឋានា ខន្ធា. (២)

នោចិត្តសំសដ្ឋសមុដ្ឋានំ ធម្មំ បដិច្ច ចិត្តសំសដ្ឋសមុដ្ឋានោ ច នោចិត្តសំសដ្ឋសមុដ្ឋានោ ច ធម្មា ឧប្បជ្ជន្តិ ហេតុបច្ចយា – ចិត្តំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ ចិត្តំ បដិច្ច សម្បយុត្តកា ខន្ធា កដត្តា ច រូបំ, បដិសន្ធិក្ខណេ វត្ថុំ បដិច្ច ចិត្តំ សម្បយុត្តកា ច ខន្ធា. (៣)

២៨០. ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បដិច្ច ចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសំសដ្ឋសមុដ្ឋានំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា, ទ្វេ ខន្ធេ…បេ… បដិសន្ធិក្ខណេ ចិត្តសំសដ្ឋសមុដ្ឋានំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា, ទ្វេ ខន្ធេ…បេ… បដិសន្ធិក្ខណេ ចិត្តសំសដ្ឋសមុដ្ឋានំ ឯកំ ខន្ធញ្ច វត្ថុញ្ច បដិច្ច ទ្វេ ខន្ធា, ទ្វេ ខន្ធេ…បេ…. (១)

ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បដិច្ច នោចិត្តសំសដ្ឋសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសំសដ្ឋសមុដ្ឋានេ ខន្ធេ ច ចិត្តញ្ច បដិច្ច ចិត្តសមុដ្ឋានំ រូបំ, ចិត្តសំសដ្ឋសមុដ្ឋានេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ ចិត្តសំសដ្ឋសមុដ្ឋានេ ខន្ធេ ច ចិត្តញ្ច បដិច្ច កដត្តារូបំ, បដិសន្ធិក្ខណេ ចិត្តសំសដ្ឋសមុដ្ឋានេ ខន្ធេ ច មហាភូតេ ច បដិច្ច កដត្តារូបំ, បដិសន្ធិក្ខណេ ចិត្តសំសដ្ឋសមុដ្ឋានេ ខន្ធេ ច វត្ថុញ្ច បដិច្ច ចិត្តំ. (២)

ចិត្តសំសដ្ឋសមុដ្ឋានញ្ច នោចិត្តសំសដ្ឋសមុដ្ឋានញ្ច ធម្មំ បដិច្ច ចិត្តសំសដ្ឋសមុដ្ឋានោ ច នោចិត្តសំសដ្ឋសមុដ្ឋានោ ច ធម្មា ឧប្បជ្ជន្តិ ហេតុបច្ចយា – ចិត្តសំសដ្ឋសមុដ្ឋានំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ…បេ… បដិសន្ធិក្ខណេ ចិត្តសំសដ្ឋសមុដ្ឋានំ ឯកំ ខន្ធញ្ច ចិត្តញ្ច បដិច្ច ទ្វេ ខន្ធា កដត្តា ច រូបំ, ទ្វេ ខន្ធេ…បេ… បដិសន្ធិក្ខណេ ចិត្តសំសដ្ឋសមុដ្ឋានំ ឯកំ ខន្ធញ្ច វត្ថុញ្ច បដិច្ច ទ្វេ ខន្ធា ចិត្តញ្ច, ទ្វេ ខន្ធេ…បេ… (សំខិត្តំ). (៣)