១. វិភង្គវារោ

នហេតុបច្ចយោ

១៨. សារម្មណំ ធម្មំ បច្ចយា សារម្មណោ ធម្មោ ឧប្បជ្ជតិ នហេតុបច្ចយា… តីណិ (បដិច្ចវារសទិសំ).

អនារម្មណំ ធម្មំ បច្ចយា អនារម្មណោ ធម្មោ ឧប្បជ្ជតិ នហេតុបច្ចយា – ឯកំ មហាភូតំ…បេ… អសញ្ញសត្តានំ ឯកំ មហាភូតំ…បេ…. (១)

អនារម្មណំ ធម្មំ បច្ចយា សារម្មណោ ធម្មោ ឧប្បជ្ជតិ នហេតុបច្ចយា – ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា សារម្មណា ខន្ធា; បដិសន្ធិក្ខណេ…បេ… វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

អនារម្មណំ ធម្មំ បច្ចយា សារម្មណោ ច អនារម្មណោ ច ធម្មា ឧប្បជ្ជន្តិ នហេតុបច្ចយា – វត្ថុំ បច្ចយា អហេតុកា សារម្មណា ខន្ធា, មហាភូតេ បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (៣)

១៩. សារម្មណញ្ច អនារម្មណញ្ច ធម្មំ បច្ចយា សារម្មណោ ធម្មោ ឧប្បជ្ជតិ នហេតុបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… កាយវិញ្ញាណសហគតំ…បេ… អហេតុកំ សារម្មណំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… អហេតុកបដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

សារម្មណញ្ច អនារម្មណញ្ច ធម្មំ បច្ចយា អនារម្មណោ ធម្មោ ឧប្បជ្ជតិ នហេតុបច្ចយា – អហេតុកេ សារម្មណេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (២)

សារម្មណញ្ច អនារម្មណញ្ច ធម្មំ បច្ចយា សារម្មណោ ច អនារម្មណោ ច ធម្មា ឧប្បជ្ជន្តិ នហេតុបច្ចយា – អហេតុកំ សារម្មណំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… អហេតុកេ សារម្មណេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; អហេតុកបដិសន្ធិក្ខណេ អហេតុកំ សារម្មណំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ ច…បេ… អហេតុកេ សារម្មណេ ខន្ធេ ច មហាភូតេ ច បច្ចយា កដត្តារូបំ…បេ… (សំខិត្តំ). (៣)