១. វិភង្គវារោ

ហេតុបច្ចយោ

២០១. ចិត្តសមុដ្ឋានំ ធម្មំ បច្ចយា ចិត្តសមុដ្ឋានោ ធម្មោ ឧប្បជ្ជតិ ហេតុបច្ចយា… តីណិ (បដិច្ចវារសទិសំ).

នោចិត្តសមុដ្ឋានំ ធម្មំ បច្ចយា នោចិត្តសមុដ្ឋានោ ធម្មោ ឧប្បជ្ជតិ ហេតុបច្ចយា – វត្ថុំ បច្ចយា ចិត្តំ; បដិសន្ធិក្ខណេ…បេ… (បដិច្ចវារសទិសា). (១)

នោចិត្តសមុដ្ឋានំ ធម្មំ បច្ចយា ចិត្តសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តំ បច្ចយា សម្បយុត្តកា ខន្ធា ចិត្តសមុដ្ឋានញ្ច រូបំ, វត្ថុំ បច្ចយា ចិត្តសមុដ្ឋានា ខន្ធា (បដិសន្ធិក្ខណេ ទ្វេបិ កាតព្ពា). (១)

នោចិត្តសមុដ្ឋានំ ធម្មំ បច្ចយា ចិត្តសមុដ្ឋានោ ច នោចិត្តសមុដ្ឋានោ ច ធម្មា ឧប្បជ្ជន្តិ ហេតុបច្ចយា – វត្ថុំ បច្ចយា ចិត្តំ សម្បយុត្តកា ច ខន្ធា; បដិសន្ធិក្ខណេ ទ្វេ (បដិច្ចវារសទិសំ). (៣)

២០២. ចិត្តសមុដ្ឋានញ្ច នោចិត្តសមុដ្ឋានញ្ច ធម្មំ បច្ចយា ចិត្តសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសមុដ្ឋានំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា, ទ្វេ ខន្ធេ…បេ… ចិត្តសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា, ទ្វេ ខន្ធេ…បេ… (បដិសន្ធិក្ខណេ ទ្វេបិ បដិច្ចវារសទិសា). (១)

ចិត្តសមុដ្ឋានញ្ច នោចិត្តសមុដ្ឋានញ្ច ធម្មំ បច្ចយា នោចិត្តសមុដ្ឋានោ ធម្មោ ឧប្បជ្ជតិ ហេតុបច្ចយា – ចិត្តសមុដ្ឋានេ ខន្ធេ ច វត្ថុញ្ច បច្ចយា ចិត្តំ (បដិសន្ធិក្ខណេ តីណិបិ កាតព្ពា បដិច្ចវារសទិសា). (២)

ចិត្តសមុដ្ឋានញ្ច នោចិត្តសមុដ្ឋានញ្ច ធម្មំ បច្ចយា ចិត្តសមុដ្ឋានោ ច នោចិត្តសមុដ្ឋានោ ច ធម្មា ឧប្បជ្ជន្តិ ហេតុបច្ចយា – ចិត្តសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា ចិត្តញ្ច, ទ្វេ ខន្ធេ…បេ… (បដិសន្ធិក្ខណេ ទ្វេបិ កាតព្ពា បដិច្ចវារសទិសា). (៣)

អារម្មណបច្ចយោ

២០៣. ចិត្តសមុដ្ឋានំ ធម្មំ បច្ចយា ចិត្តសមុដ្ឋានោ ធម្មោ ឧប្បជ្ជតិ អារម្មណបច្ចយា… តីណិ (បដិច្ចវារសទិសា).

នោចិត្តសមុដ្ឋានំ ធម្មំ បច្ចយា នោចិត្តសមុដ្ឋានោ ធម្មោ ឧប្បជ្ជតិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ…បេ… វត្ថុំ បច្ចយា ចិត្តំ. (១)

នោចិត្តសមុដ្ឋានំ ធម្មំ បច្ចយា ចិត្តសមុដ្ឋានោ ធម្មោ ឧប្បជ្ជតិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណសហគតា ខន្ធា…បេ… កាយាយតនំ បច្ចយា កាយវិញ្ញាណសហគតា ខន្ធា, ចិត្តំ បច្ចយា សម្បយុត្តកា ខន្ធា, វត្ថុំ បច្ចយា ចិត្តសមុដ្ឋានា ខន្ធា (បដិសន្ធិក្ខណេ ទ្វេបិ). (២)

នោចិត្តសមុដ្ឋានំ ធម្មំ បច្ចយា ចិត្តសមុដ្ឋានោ ច នោចិត្តសមុដ្ឋានោ ច ធម្មា ឧប្បជ្ជន្តិ អារម្មណបច្ចយា – ចក្ខាយតនំ បច្ចយា ចក្ខុវិញ្ញាណំ សម្បយុត្តកា ច ខន្ធា…បេ… កាយាយតនំ…បេ… វត្ថុំ បច្ចយា ចិត្តំ សម្បយុត្តកា ច ខន្ធា; បដិសន្ធិក្ខណេ…បេ…. (៣)

២០៤. ចិត្តសមុដ្ឋានញ្ច នោចិត្តសមុដ្ឋានញ្ច ធម្មំ បច្ចយា ចិត្តសមុដ្ឋានោ ធម្មោ ឧប្បជ្ជតិ អារម្មណបច្ចយា – ចិត្តសមុដ្ឋានំ ឯកំ ខន្ធញ្ច ចិត្តញ្ច បច្ចយា ទ្វេ ខន្ធា, ទ្វេ ខន្ធេ …បេ… ចិត្តសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា, ទ្វេ ខន្ធេ…បេ… (បដិសន្ធិក្ខណេ ទ្វេបិ កាតព្ពា). (១)

ចិត្តសមុដ្ឋានញ្ច នោចិត្តសមុដ្ឋានញ្ច ធម្មំ បច្ចយា នោចិត្តសមុដ្ឋានោ ធម្មោ ឧប្បជ្ជតិ អារម្មណបច្ចយា – ចក្ខុវិញ្ញាណសហគតេ ខន្ធេ ច ចក្ខាយតនញ្ច បច្ចយា ចក្ខុវិញ្ញាណំ…បេ… កាយវិញ្ញាណសហគតេ…បេ… ចិត្តសមុដ្ឋានេ ខន្ធេ ច វត្ថុញ្ច បច្ចយា ចិត្តំ; បដិសន្ធិក្ខណេ…បេ…. (២)

ចិត្តសមុដ្ឋានញ្ច នោចិត្តសមុដ្ឋានញ្ច ធម្មំ បច្ចយា ចិត្តសមុដ្ឋានោ ច នោចិត្តសមុដ្ឋានោ ច ធម្មា ឧប្បជ្ជន្តិ អារម្មណបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច បច្ចយា ទ្វេ ខន្ធា ចក្ខុវិញ្ញាណញ្ច, ទ្វេ ខន្ធេ…បេ… កាយវិញ្ញាណសហគតំ…បេ… ចិត្តសមុដ្ឋានំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា ចិត្តញ្ច, ទ្វេ ខន្ធេ…បេ… បដិសន្ធិក្ខណេ…បេ…. (៣) (សំខិត្តំ).