១. វិភង្គវារោ

នហេតុបច្ចយោ

១៥៨. ចិត្តសម្បយុត្តំ ធម្មំ បច្ចយា ចិត្តសម្បយុត្តោ ធម្មោ ឧប្បជ្ជតិ នហេតុបច្ចយា… តីណិ (បដិច្ចសទិសា).

ចិត្តវិប្បយុត្តំ ធម្មំ បច្ចយា ចិត្តវិប្បយុត្តោ ធម្មោ ឧប្បជ្ជតិ នហេតុបច្ចយា – ឯកំ មហាភូតំ…បេ… (យាវ អសញ្ញសត្តា). (១)

ចិត្តវិប្បយុត្តំ ធម្មំ បច្ចយា ចិត្តសម្បយុត្តោ ធម្មោ ឧប្បជ្ជតិ នហេតុបច្ចយា – ចក្ខាយតនំ បច្ចយា ចក្ខុវិញ្ញាណសហគតា ខន្ធា…បេ… កាយាយតនំ…បេ… វត្ថុំ បច្ចយា អហេតុកា ចិត្តសម្បយុត្តកា ខន្ធា; បដិសន្ធិក្ខណេ…បេ… វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

ចិត្តវិប្បយុត្តំ ធម្មំ បច្ចយា ចិត្តសម្បយុត្តោ ច ចិត្តវិប្បយុត្តោ ច ធម្មា ឧប្បជ្ជន្តិ នហេតុបច្ចយា – វត្ថុំ បច្ចយា អហេតុកា ចិត្តសម្បយុត្តកា ខន្ធា, មហាភូតេ បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (៣)

ចិត្តសម្បយុត្តញ្ច ចិត្តវិប្បយុត្តញ្ច ធម្មំ បច្ចយា ចិត្តសម្បយុត្តោ ធម្មោ ឧប្បជ្ជតិ នហេតុបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច បច្ចយា ទ្វេ ខន្ធា, ទ្វេ ខន្ធេ ច…បេ… កាយវិញ្ញាណសហគតំ ឯកំ ខន្ធញ្ច កាយាយតនញ្ច បច្ចយា ទ្វេ ខន្ធា, ទ្វេ ខន្ធេ ច…បេ… អហេតុកំ ចិត្តសម្បយុត្តំ ឯកំ ខន្ធញ្ច វត្ថុញ្ច បច្ចយា ទ្វេ ខន្ធា, ទ្វេ ខន្ធេ ច…បេ… អហេតុកបដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (ឯវំ ទ្វេ បញ្ហា បវត្តិបដិសន្ធិ កាតព្ពា. សំខិត្តំ.)