១. វិភង្គវារោ

នហេតុបច្ចយោ

៦. នហេតុំ ធម្មំ បដិច្ច នហេតុ ធម្មោ ឧប្បជ្ជតិ នហេតុបច្ចយា – អហេតុកំ នហេតុំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ….(១)

នហេតុំ ធម្មំ បដិច្ច ហេតុ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (២)

នអារម្មណបច្ចយាទិ

៧. ហេតុំ ធម្មំ បដិច្ច នហេតុ ធម្មោ ឧប្បជ្ជតិ នអារម្មណបច្ចយា – ហេតុំ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (១)

នហេតុំ ធម្មំ បដិច្ច នហេតុ ធម្មោ ឧប្បជ្ជតិ នអារម្មណបច្ចយា – នហេតូ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… សព្ពេ មហាភូតា…បេ…. (១)

ហេតុញ្ច នហេតុញ្ច ធម្មំ បដិច្ច នហេតុ ធម្មោ ឧប្បជ្ជតិ នអារម្មណបច្ចយា – ហេតុញ្ច នហេតុញ្ច ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… នអធិបតិបច្ចយា… (បរិបុណ្ណំ) នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា.

នបុរេជាតបច្ចយោ

៨. ហេតុំ ធម្មំ បដិច្ច ហេតុ ធម្មោ ឧប្បជ្ជតិ នបុរេជាតបច្ចយា – អរូបេ អលោភំ បដិច្ច អទោសោ អមោហោ (ចក្កំ). លោភំ បដិច្ច មោហោ, មោហំ បដិច្ច លោភោ; បដិសន្ធិក្ខណេ…បេ…. (១)

ហេតុំ ធម្មំ បដិច្ច នហេតុ ធម្មោ ឧប្បជ្ជតិ នបុរេជាតបច្ចយា – អរូបេ ហេតុំ បដិច្ច សម្បយុត្តកា ខន្ធា, ហេតុំ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (២)

ហេតុំ ធម្មំ បដិច្ច ហេតុ ច នហេតុ ច ធម្មា ឧប្បជ្ជន្តិ នបុរេជាតបច្ចយា – អរូបេ អលោភំ បដិច្ច អទោសោ អមោហោ សម្បយុត្តកា ច ខន្ធា (ចក្កំ). លោភំ បដិច្ច មោហោ សម្បយុត្តកា ច ខន្ធា (ចក្កំ); បដិសន្ធិក្ខណេ…បេ…. (៣)

៩. នហេតុំ ធម្មំ បដិច្ច នហេតុ ធម្មោ ឧប្បជ្ជតិ នបុរេជាតបច្ចយា – អរូបេ នហេតុំ ឯកំ ខន្ធំ បដិច្ច តយោ ខន្ធា…បេ… នហេតូ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… ឯកំ មហាភូតំ…បេ…. (១)

នហេតុំ ធម្មំ បដិច្ច ហេតុ ធម្មោ ឧប្បជ្ជតិ នបុរេជាតបច្ចយា – អរូបេ នហេតូ ខន្ធេ បដិច្ច ហេតូ; បដិសន្ធិក្ខណេ…បេ…. (២)

នហេតុំ ធម្មំ បដិច្ច ហេតុ ច នហេតុ ច ធម្មា ឧប្បជ្ជន្តិ នបុរេជាតបច្ចយា – អរូបេ នហេតុំ ឯកំ ខន្ធំ បដិច្ច តយោ ខន្ធា ហេតុ ច…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)

១០. ហេតុញ្ច នហេតុញ្ច ធម្មំ បដិច្ច ហេតុ ធម្មោ ឧប្បជ្ជតិ នបុរេជាតបច្ចយា – អរូបេ អលោភញ្ច សម្បយុត្តកេ ច ខន្ធេ បដិច្ច អទោសោ អមោហោ (ចក្កំ). អរូបេ លោភញ្ច សម្បយុត្តកេ ច ខន្ធេ បដិច្ច មោហោ (ចក្កំ); បដិសន្ធិក្ខណេ…បេ…. (១)

ហេតុញ្ច នហេតុញ្ច ធម្មំ បដិច្ច នហេតុ ធម្មោ ឧប្បជ្ជតិ នបុរេជាតបច្ចយា – អរូបេ នហេតុំ ឯកំ ខន្ធញ្ច ហេតុញ្ច បដិច្ច តយោ ខន្ធា…បេ… ទ្វេ ខន្ធេ…បេ… នហេតូ ខន្ធេ ច ហេតុញ្ច បដិច្ច ចិត្តសមុដ្ឋានំ រូបំ, ហេតុញ្ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (២)

ហេតុញ្ច នហេតុញ្ច ធម្មំ បដិច្ច ហេតុ ច នហេតុ ច ធម្មា ឧប្បជ្ជន្តិ នបុរេជាតបច្ចយា – អរូបេ នហេតុំ ឯកំ ខន្ធញ្ច អលោភញ្ច បដិច្ច តយោ ខន្ធា អទោសោ អមោហោ ច…បេ… ទ្វេ ខន្ធេ…បេ… (ចក្កំ). នហេតុំ ឯកំ ខន្ធញ្ច លោភញ្ច បដិច្ច តយោ ខន្ធា មោហោ ច (ចក្កំ); បដិសន្ធិក្ខណេ…បេ…. (៣)

នបច្ឆាជាតបច្ចយាទិ

១១. ហេតុំ ធម្មំ បដិច្ច ហេតុ ធម្មោ ឧប្បជ្ជតិ នបច្ឆាជាតបច្ចយា… នអាសេវនបច្ចយា.

នកម្មបច្ចយាទិ

១២. ហេតុំ ធម្មំ បដិច្ច នហេតុ ធម្មោ ឧប្បជ្ជតិ នកម្មបច្ចយា – ហេតុំ បដិច្ច សម្បយុត្តកា ចេតនា. (១)

នហេតុំ ធម្មំ បដិច្ច នហេតុ ធម្មោ ឧប្បជ្ជតិ នកម្មបច្ចយា – នហេតូ ខន្ធេ បដិច្ច សម្បយុត្តកា ចេតនា… ពាហិរំ… អាហារសមុដ្ឋានំ… ឧតុសមុដ្ឋានំ…បេ…. (១)

ហេតុញ្ច នហេតុញ្ច ធម្មំ បដិច្ច នហេតុ ធម្មោ ឧប្បជ្ជតិ នកម្មបច្ចយា – ហេតុញ្ច សម្បយុត្តកេ ច ខន្ធេ បដិច្ច សម្បយុត្តកា ចេតនា. (១)

ហេតុំ ធម្មំ បដិច្ច ហេតុ ធម្មោ ឧប្បជ្ជតិ នវិបាកបច្ចយា… នវ.

នអាហារបច្ចយាទិ

១៣. នហេតុំ ធម្មំ បដិច្ច នហេតុ ធម្មោ ឧប្បជ្ជតិ នអាហារបច្ចយា – ពាហិរំ… ឧតុសមុដ្ឋានំ… អសញ្ញសត្តានំ…បេ… នឥន្ទ្រិយបច្ចយា – ពាហិរំ… អាហារសមុដ្ឋានំ … ឧតុសមុដ្ឋានំ…បេ… អសញ្ញសត្តានំ មហាភូតេ បដិច្ច រូបជីវិតិន្ទ្រិយំ, នឈានបច្ចយា – បញ្ចវិញ្ញាណំ …បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… នមគ្គបច្ចយា – អហេតុកំ នហេតុំ ឯកំ ខន្ធំ បដិច្ច…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… នសម្បយុត្តបច្ចយា… នវិប្បយុត្តបច្ចយា… (នបុរេជាតសទិសំ, អរូបបញ្ហាយេវ) នោនត្ថិបច្ចយា… នោវិគតបច្ចយា.