១. វិភង្គវារោ

ហេតុបច្ចយោ

១. ហេតុំ ធម្មំ បដិច្ច ហេតុ ធម្មោ ឧប្បជ្ជតិ ហេតុបច្ចយា – អលោភំ បដិច្ច អទោសោ អមោហោ, អទោសំ បដិច្ច អលោភោ អមោហោ, អមោហំ បដិច្ច អលោភោ អទោសោ, លោភំ បដិច្ច មោហោ, មោហំ បដិច្ច លោភោ, ទោសំ បដិច្ច មោហោ, មោហំ បដិច្ច ទោសោ; បដិសន្ធិក្ខណេ…បេ…. (១)

ហេតុំ ធម្មំ បដិច្ច នហេតុ ធម្មោ ឧប្បជ្ជតិ ហេតុបច្ចយា – ហេតុំ ធម្មំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ…បេ…. (២)

ហេតុំ ធម្មំ បដិច្ច ហេតុ ច នហេតុ ច ធម្មា ឧប្បជ្ជន្តិ ហេតុបច្ចយា – អលោភំ បដិច្ច អទោសោ អមោហោ សម្បយុត្តកា ច ខន្ធា ចិត្តសមុដ្ឋានញ្ច រូបំ (ចក្កំ). លោភំ បដិច្ច មោហោ សម្បយុត្តកា ច ខន្ធា ចិត្តសមុដ្ឋានញ្ច រូបំ…បេ… បដិសន្ធិក្ខណេ…បេ…. (៣)

២. នហេតុំ ធម្មំ បដិច្ច នហេតុ ធម្មោ ឧប្បជ្ជតិ ហេតុបច្ចយា – នហេតុំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ…បេ…. (១)

នហេតុំ ធម្មំ បដិច្ច ហេតុ ធម្មោ ឧប្បជ្ជតិ ហេតុបច្ចយា – នហេតូ ខន្ធេ បដិច្ច ហេតូ; បដិសន្ធិក្ខណេ…បេ… វត្ថុំ បដិច្ច ហេតូ. (២)

នហេតុំ ធម្មំ បដិច្ច ហេតុ ច នហេតុ ច ធម្មា ឧប្បជ្ជន្តិ ហេតុបច្ចយា – នហេតុំ ឯកំ ខន្ធំ បដិច្ច តយោ ខន្ធា ហេតុ ច ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ហេតុ ច ចិត្តសមុដ្ឋានញ្ច រូបំ; បដិសន្ធិក្ខណេ…បេ… បដិសន្ធិក្ខណេ វត្ថុំ បដិច្ច ហេតូ សម្បយុត្តកា ច ខន្ធា. (៣)

៣. ហេតុញ្ច នហេតុញ្ច ធម្មំ បដិច្ច ហេតុ ធម្មោ ឧប្បជ្ជតិ ហេតុបច្ចយា – អលោភញ្ច សម្បយុត្តកេ ច ខន្ធេ បដិច្ច អទោសោ អមោហោ (ចក្កំ). លោភញ្ច សម្បយុត្តកេ ច ខន្ធេ បដិច្ច មោហោ, ទោសញ្ច សម្បយុត្តកេ ច ខន្ធេ បដិច្ច មោហោ…បេ… បដិសន្ធិក្ខណេ…បេ… អលោភញ្ច វត្ថុញ្ច បដិច្ច អទោសោ អមោហោ…បេ…. (១)

ហេតុញ្ច នហេតុញ្ច ធម្មំ បដិច្ច នហេតុ ធម្មោ ឧប្បជ្ជតិ ហេតុបច្ចយា – នហេតុំ ឯកំ ខន្ធញ្ច ហេតុញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច ហេតុញ្ច បដិច្ច ទ្វេ ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ…បេ… បដិសន្ធិក្ខណេ វត្ថុញ្ច ហេតុញ្ច បដិច្ច សម្បយុត្តកា ខន្ធា. (២)

ហេតុញ្ច នហេតុញ្ច ធម្មំ បដិច្ច ហេតុ ច នហេតុ ច ធម្មា ឧប្បជ្ជន្តិ ហេតុបច្ចយា – នហេតុំ ឯកំ ខន្ធញ្ច អលោភញ្ច បដិច្ច តយោ ខន្ធា អទោសោ អមោហោ ច ចិត្តសមុដ្ឋានញ្ច រូបំ…បេ… ទ្វេ ខន្ធេ ច អលោភញ្ច បដិច្ច ទ្វេ ខន្ធា អទោសោ អមោហោ ច ចិត្តសមុដ្ឋានញ្ច រូបំ (ចក្កំ). នហេតុំ ឯកំ ខន្ធញ្ច លោភញ្ច បដិច្ច តយោ ខន្ធា មោហោ ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… វត្ថុញ្ច អលោភញ្ច បដិច្ច អទោសោ អមោហោ សម្បយុត្តកា ច ខន្ធា. (៣)

អារម្មណបច្ចយាទិ

៤. ហេតុំ ធម្មំ បដិច្ច ហេតុ ធម្មោ ឧប្បជ្ជតិ អារម្មណបច្ចយា (រូបំ ឆឌ្ឌេត្វា អរូបេយេវ នវ បញ្ហា)… អធិបតិបច្ចយា (បដិសន្ធិ នត្ថិ, បរិបុណ្ណំ) ឯកំ មហាភូតំ បដិច្ច…បេ… មហាភូតេ បដិច្ច ចិត្តសមុដ្ឋានំ រូបំ ឧបាទារូបំ… (ឥមំ នានំ) អនន្តរបច្ចយា… សមនន្តរបច្ចយា… សហជាតបច្ចយា (សព្ពេ មហាភូតា យាវ អសញ្ញសត្តា)… អញ្ញមញ្ញបច្ចយា… និស្សយបច្ចយា… ឧបនិស្សយបច្ចយា… បុរេជាតបច្ចយា… អាសេវនបច្ចយា (ទ្វីសុបិ បដិសន្ធិ នត្ថិ)… កម្មបច្ចយា… វិបាកបច្ចយា (សំខិត្តំ)… អវិគតបច្ចយា.